O le Tusi Lona Lua o Samuelu 9:1-13
-
Alofa faamaoni Tavita iā Mefiposeta (1-13)
9 Ona fai atu lea o Tavita: “Po o iai ea se tasi o totoe o le aiga o Saulo, seʻi oʻu faaalia i ai le alofa faamaoni ona o Ionatana?”+
2 Sa iai i le aiga o Saulo se auauna e igoa iā Sipa.+ Ona latou aumaia lea o ia iā Tavita, ua fesili atu foʻi le tupu iā te ia: “Po o oe ea o Sipa?” Ona fai mai lea o ia: “O aʻu lava o lau auauna.”
3 Ua fai atu le tupu: “Po o iai ea se tasi o totoe o le aiga o Saulo, ina ia ou faaalia iā te ia le alofa faamaoni o le Atua?” Ona faapea mai lea o Sipa i le tupu: “E iai le atalii o loo totoe o Ionatana, e pipili ona vae.”+
4 Ua fai atu le tupu: “O fea o iai o ia?” Ona fai mai lea o Sipa i le tupu: “O loo i le fale o Makiro+ le atalii o Amueli i Lotapara.”
5 Ua aami faavave o ia e le tupu o Tavita, ma aumaia o ia mai i le fale o Makiro le atalii o Amueli i Lotapara.
6 Ina ua sau iā Tavita o Mefiposeta le atalii o Ionatana, le atalii o Saulo, ona ia faapaʻū faō lea ma ifo. Ua fai atu Tavita: “Mefiposeta e!” ae ua fai mai o ia: “O lau auauna lenei.”
7 Ona fai atu lea o Tavita: “Aua e te fefe, auā ou te alofa faamaoni+ lava iā te oe ona o Ionatana lou tamā; ou te toe faafoʻi atu foʻi iā te oe o fanua uma o Saulo le tamā o lou tamā, ma e te ʻai e lē aunoa i meaʻai i laʻu laulau.”+
8 Ona ifo lea o ia ma faapea mai: “O ai ea lau auauna, ua e silasila ai i se taʻifau ua mate+ e pei o aʻu nei?”
9 Ua aami e le tupu le auauna a Saulo o Sipa, ma faapea atu iā te ia: “O mea uma lava a Saulo ma lona aiga uma, ou te avatu i le atalii o le atalii o lou matai.+
10 Ia e galueaʻiina le fanua mo ia, o oe ma ou atalii ma au auauna. Ia e aoina foʻi fua, ia avea ma meaʻai e aai ai i latou o loo i le aiga o le atalii o le atalii o lou matai. A o Mefiposeta le atalii o le atalii o lou matai, e ʻai e lē aunoa i meaʻai i laʻu laulau.”+
Sa iai atalii e toʻa 15 o Sipa ma ana auauna e toʻa 20.+
11 Ua fai mai Sipa i le tupu: “O mea uma ua poloaʻia e loʻu alii le tupu mo lana auauna, e faapea lava ona fai e lana auauna.” A o Mefiposeta, na ʻai o ia i le laulau a Tavita e pei o se tasi o atalii o le tupu.
12 Sa iai le atalii o Mefiposeta e igoa iā Mika,+ ma o ē uma na nonofo i le fale o Sipa, na avea i latou ma auauna a Mefiposeta.
13 Sa nofo Mefiposeta i Ierusalema, auā sa ʻai e lē aunoa o ia i meaʻai i le laulau a le tupu;+ sa pipili foʻi o ia.+
