O le Tusi Lona Lua i le Faapotopotoga i Tesalonia 1:1-12
1 O i matou o Paulo, o Siluano* ma Timoteo,+ o le tusi lenei i le faapotopotoga i Tesalonia o ē o autasi ma le Atua lo tatou Tamā, ma le Alii o Iesu Keriso:
2 Tau ina ia iā te outou le agalelei faifua ma le filemu mai i le Atua le Tamā, ma le Alii o Iesu Keriso.
3 E tatau iā i matou ona faafetai atu e lē aunoa i le Atua mo outou le ʻauuso e. E talafeagai lea ona ua tupu tele lo outou faatuatua, ma ua faateleina foʻi le alofa o le tasi i le isi iā te outou uma lava taʻitoʻatasi.+
4 O le mea lea ua matou mitamita ai iā te outou+ i faapotopotoga a le Atua, ona o lo outou tutumau ma le faatuatua i sauāga uma ma puapuaga o loo outou mafatia* ai.+
5 O le faamaoniga lenei o le faamasinogatonu a le Atua, ua iʻu ai ina taʻuaogāina outou i le Malo o le Atua, lea o loo outou mafatia ai.+
6 O lea la, o le amiotonu o le Atua ua ia taui atu ai puapuaga i ē ua faapuapuagatiaina outou.+
7 A o outou o ē ua mafatia i puapuaga, e maua le mapusaga faatasi ma i matou, i le faaaliga o le Alii o Iesu+ mai i le lagi faatasi ma ana agelu malolosi+
8 i le afi mumū, a o ia faaoo mai le tauimasui i ē e lē iloa le Atua, ma ē e lē usiusitaʻi i le tala lelei a lo tatou Alii o Iesu.+
9 O i latou lava ia e oo i ai le faasalaga tonu o le faaumatiaga e faavavau,+ e teʻa ese mai i luma o le Alii ma lona malosi tele,
10 i le taimi e afio mai ai o ia e faamamaluina faatasi ma lana ʻaupaia, ma e taufaiofo ai i lenā aso i latou uma e faatuatua, auā na outou faatuatua i la matou molimau.
11 O le mea lava lea e matou te tatalo ai pea mo outou, ina ia taʻuaogāina outou e lo tatou Atua e tusa ma lana valaau,+ ma tau ina ia faia atoatoa e lona mana o mea lelei uma ua ia finagalo i ai, ma galuega o le faatuatua.
12 Ua matou faia faapea ina ia faamamaluina ai iā te outou le suafa o lo tatou Alii o Iesu, atoa foʻi ma outou o loo autasi ma ia, e tusa ai ma le agalelei faifua o lo tatou Atua ma le Alii o Iesu Keriso.
