O le Tusi Lona Lua o Tupu 17:1-41
17 O le tausaga lona 12 o le nofoaiga a Aasa le tupu o Iuta, na fai ai Hosea+ le atalii o Ele ma tupu o Isaraelu mai i Samaria, ma na pule o ia mo tausaga e iva.
2 Na faia pea e ia mea leaga i le silafaga a Ieova, ae e le‘i pei o le leaga o tupu o Isaraelu na muamua iā te ia.
3 Ua siitaua mai iā te ia+ Salemanesa le tupu o Asuria, ma ua avea Hosea ma ana auauna, ma ua avatu foʻi e Hosea meaalofa iā te ia.+
4 Peitaʻi, na iloa e le tupu o Asuria le fouvale o Hosea i lona aauina atu o ni avefeʻau iā So le tupu o Aikupito,+ ma e leʻi avatua foʻi e ia meaalofa i le tupu o Asuria e pei o tausaga ua mavae. O lea, na taofia ai o ia e le tupu o Asuria, ma noanoatia i le falepuipui.
5 Ona alu aʻe lea o le tupu o Asuria ma siitaua i le nuu uma, ua alu aʻe foʻi ma siʻosiʻomia Samaria i tausaga e tolu.
6 O le tausaga lona iva o le nofoaiga a Hosea, na faoa ai Samaria+ e le tupu o Asuria. Ona ia ave faapagota lea o tagata Isaraelu+ i Asuria ma faanonofo i latou i Hala, i Havoli i le vaitafe o Kosane,+ ma aai o tagata Metai.+
7 Na oo mai lenei mea, talu ai ua agasala le fanauga a Isaraelu iā Ieova lo latou Atua, o lē na aveina aʻe i latou mai i le nuu o Aikupito, mai i le pulega a Farao le tupu o Aikupito.+ Na latou tapua‘i* i isi atua,+
8 mulimuli i tū masani a nuu ese na tuliesea e Ieova mai i luma o le fanauga a Isaraelu, ma latou mulimuli i tū masani na faavaeina e tupu o Isaraelu.
9 Ua faia e le fanauga a Isaraelu mea e lē tonu iā Ieova lo latou Atua. Ua latou fausia pea mea maualuluga i o latou aai uma,+ e mai i le ʻolo o tagata vāai e oo atu i le aai malupuipuia.*
10 Ua latou faatutūina pea mo i latou o poutū paia, ma pou paia*+ i luga o aʻega uma ma lalo o laau lauolaola uma;+
11 ma ua latou faamū taulaga i mea maualuluga e pei o nuu ese na aveina faapagota e Ieova mai i o latou luma.+ Ua faaauau foʻi ona latou faia mea leaga e faatigā ai iā Ieova.
12 Ua faaauau ona latou auauna i tupua inosia,*+ o le mea na fetalai mai ai Ieova iā i latou: “Aua neʻi outou faia lenei mea!”+
13 Ua lapataʻi mai pea Ieova iā Isaraelu ma Iuta e ala i ana perofeta uma, ma ē e faamatalaina faaaliga+ e faapea: “Inā liliuese ia mai i o outou ala leaga+ ma tausia aʻu poloaʻiga ma aʻu tulafono, e tusa ma mea uma o loo i le tulafono na ou poloaʻi atu ai i o outou augātamā, ma na ou tuuina atu iā te outou e ala i aʻu auauna o perofeta.”
14 Ae ua latou lē faalogo, ma ua faauamaaa pea e pei ona faauamaaa o o latou augātamā, o ē e leʻi faatuatua iā Ieova lo latou Atua.+
15 Ua latou teena pea ana faatulagaga ma lana feagaiga+ na ia osia ma o latou augātamā, ma ana faamanatuga na ia lapataʻia ai i latou.+ Ua latou mulimuli atu pea i tupua e lē aogā+ ma avea ai i latou ma ē e lē aogā,+ ua latou faaaʻoaʻo foʻi i nuu ese na siʻomiaina i latou, o ē na poloaʻi mai ai Ieova e aua neʻi faaa‘oa‘o i ai.+
16 Ua faaauau foʻi ona latou tuua poloaʻiga uma a Ieova lo latou Atua, ma ua latou faia faatusa uʻamea o tamaʻi povi poʻa e lua+ ma se pou paia,*+ ma ua latou ifo i ʻau uma o le lagi+ ma auauna atu iā Paala.+
17 Ua latou faaui ane fo‘i o latou atalii ma afafine i le afi,+ ma faia valovaloga faataulāitu,+ ma saʻili i faailoga, ma ua latou tuuina* atu pea i latou e faia mea leaga i le silafaga a Ieova, e faatigā ai iā te ia.
18 O le mea lea na matuā toʻatamaʻi ai Ieova iā Isaraelu, ma ia aveesea ai i latou mai i ona luma.+ E na te leʻi faatotoeina ai foʻi se tasi, e na o le ituaiga lava o Iuta.
19 E leʻi tausia foʻi e Iuta poloaʻiga a Ieova lo latou Atua,+ ae ua latou savavali e tusa ma tū masani ia na mulimuli ai Isaraelu.+
20 Ona teena lea e Ieova o le fanauga uma a Isaraelu ma faalumaina i latou, ma tuuina atu i latou i lima o ē e faomea, seʻia oo ina ia lafoaʻi ese i latou mai i ona luma.
21 Ua ia vavaeese Isaraelu mai i le aiga o Tavita, ma ua latou faia Ierepoamo le atalii o Nepata ma tupu.+ Ae ua faapogaia e Ierepoamo le fanauga a Isaraelu ina ia lē mulimuli atu iā Ieova, ma ua ia faapogaia foʻi i latou e agasala i le agasala tele.
22 Ua faaauau fo‘i ona savavali le fanauga a Isaraelu i agasala uma na faia e Ierepoamo.+ E latou te leʻi liliuese mai ai,
23 seʻia aveesea e Ieova Isaraelu mai i ona luma, e pei ona ia fetalai mai ai e ala i ana auauna uma o perofeta.+ Ona aveese lea o Isaraelu mai i lona lava laueleele ma ua ave faapagota i Asuria,+ e oo mai i le aso nei.
24 Ua aumaia e le tupu o Asuria tagata mai i Papelonia, o Kuta, o Ava, o Amato, ma Sefavaima,+ ma faanonofo i latou i aai o Samaria e sui ai le fanauga a Isaraelu; ua fai foʻi Samaria ma o latou tofi ma nonofo ai i ona aai.
25 Ina ua amata ona latou nonofo ai i inā, latou te leʻi matataʻu* iā Ieova. Ona aauina atu lea e Ieova o leona iā i latou,+ ma faaumatia ai nisi o i latou.
26 Ona latou taʻu atu lea i le tupu o Asuria, e faapea: “O nuu ese na e aveina faapagota ma faanonofo i aai o Samaria, e lē iloa le tapuaʻiga* a le Atua o le nuu. Ua ia aauina mai pea leona iā i latou, ma ua faaumatia ai i latou, auā e leai ma se tasi e iloa le tapuaʻiga a le Atua o le nuu.”
27 Ona poloaʻi mai lea o le tupu o Asuria: “Ia toe faafo‘i atu i inā se tasi o ositaulaga na outou aveina faapagota mai i inā, ina ia nofo ai i inā ma aʻoaʻo i latou i le tapuaʻiga a le Atua o le nuu.”
28 Ona alu atu lea o se tasi o ositaulaga o lē na latou aveina faapagota mai i Samaria, ma ua nofo i Peteli,+ ua ia a‘oa‘oina i latou i le auala e tapua‘i ai iā Ieova.+
29 Ae ua taʻitasi le nuu ma faia lona lava atua, ma latou tuuina i fale tapua‘i na iai i mea maualuluga na fausia e tagata Samaria; ua taʻitasi le nuu ma faia faapea i o latou aai na nonofo ai.
30 Ua faia e tagata Papelonia o Sukopeno, ua faia e tagata Kuta o Nekala, ua faia e tagata Amato+ o Asima,
31 ma ua faia e tagata Ava o Niveasa ma Tareaka. Ua susunuina i le afi e tagata Sefavaima o latou atalii mo Atameleko ma Anameleko, o atua ia o Sefavaima.+
32 E ui na latou matata‘u iā Ieova, ae na latou tofia mai i tagata lautele ni ositaulaga mo mea maualuluga, ma na auauna mo i latou i fale tapua‘i sa iai i mea maualuluga.+
33 Ua latou matataʻu iā Ieova, ae ua latou tapuaʻi atu i o latou lava atua, e tusa ma le tapuaʻiga* a nuu na latou ō mai ai.+
34 E oo mai lava i le asō, o loo latou faia pea e tusa ma a latou tapua‘iga* muamua. E leai se tasi na tapua‘i* iā Ieova, e leai foʻi se tasi na faia e tusa ma ana aiāiga, o iʻuga o ana faamasinoga, o le Tulafono, ma le poloaʻiga na poloaʻi mai ai Ieova i le fanau a Iakopo, o lē na ia faaigoa iā Isaraelu.+
35 Ina ua osia e Ieova se feagaiga ma i latou,+ na ia poloaʻia i latou e faapea: “Aua tou te matataʻu i isi atua, aua foʻi tou te ifo atu iā i latou, pe auauna iā i latou, pe fai taulaga foʻi iā i latou.+
36 A o Ieova, o lē na aveina aʻe outou mai i le nuu o Aikupito ma le mana tele, ma le aao faaloaloa,+ o Ia e ao ona outou matataʻu i ai,+ o ia e ao ona outou ifo i ai, o ia foʻi e ao ona outou fai taulaga i ai.
37 Ia outou matuā tausia faatulagaga, o iʻuga o faamasinoga, o le Tulafono, ma le poloaʻiga na ia tusia mo outou,+ ma e lē tatau ona outou matata‘u i isi atua.
38 Aua foʻi neʻi outou faagaloina le feagaiga na ou osia ma outou;+ aua foʻi neʻi outou matataʻu i isi atua.
39 Ae ia outou matataʻu iā Ieova lo outou Atua, auā o ia e na te laveaʻiina outou mai i lima o outou fili uma.”
40 Ae e latou te leʻi usiusitaʻi, ma ua latou faia e tusa ai ma a latou tapuaʻiga* muamua.+
41 O lea ua avea ai nei nuu ma ē e matataʻu iā Ieova,+ ae ua latou auauna fo‘i i a latou lava faatusa na tāina. Na faia fo‘i e o latou atalii ma atalii o o latou atalii, e pei ona faia e o latou augātamā, seʻia oo mai lava i aso nei.
Faamatalaga Pito i Lalo
^ Epe., “matataʻu.”
^ E faasino atu i nofoaga uma, e tusa pe e toʻaitiiti pe e toʻatele ē e nonofo ai.
^ Tagaʻi i le Uiga o Upu.
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Tagaʻi i le Uiga o Upu.
^ Epe., “faatauina.”
^ Po o le “tapuaʻi.”
^ Po o le “tū masani faaletapuaʻiga.”
^ Po o le “tū masani faaletapuaʻiga.”
^ Po o “tū masani faaletapuaʻiga.”
^ Epe., “mataʻu.”
^ Po o “tū masani faaletapuaʻiga.”
