O le Tusi Lona Lua o Tupu 19:1-37
19 Ina ua faalogo i ai le tupu o Esekia, ona ia saeia lea o ona ofu ma ufiufi o ia i le ʻie talatala, ma alu atu i le fale o Ieova.+
2 Ua ia aauina atu Eliakimo o lē e vaavaaia le aiga,* o Sevena le failautusi, ma toeaina o le ʻauositaulaga, o loo ufiufi i latou i ʻie talatala, ua ō atu i le perofeta o Isaia+ le atalii o Amota.
3 Ua latou faapea atu iā te ia: “O le mea lenei ua fai mai ai Esekia, ‘O le aso lenei o le aso o puapuaga, o aʻoaʻiga, ma le faalumaina; auā ua pei i tatou o se fafine o le a fanau, ae ua leai se malosi e fanau ai.+
4 Atonu e faafofoga mai Ieova lou Atua i upu uma a le Ravesaki, o lē na auina mai e le tupu o Asuria lona alii e faifai i le Atua soifua,+ ma faasala o ia e tusa ma upu na faafofoga i ai Ieova lou Atua. Ia e tatalo+ atu foʻi mo ē ua totoe o loo iai.’”
5 Ua oo atu auauna a le tupu o Esekia iā Isaia,+
6 ma ua faapea mai Isaia iā i latou: “O le mea lenei e tou te fai atu ai i lo outou alii, ‘O loo faapea ona fetalai mai o Ieova: “Aua e te fefe+ ona o upu na e faalogo i ai, na upuleagaina ai aʻu e auauna a le tupu o Asuria.+
7 Ou te tuuina iā te ia se manatu, e faalogo foʻi o ia i se tala ma toe foʻi atu i lona lava nuu; ma o le a ou fasiotia o ia i le pelu i lona lava nuu.”’”+
8 Ina ua faalogo le Ravesaki ua alu ese le tupu o Asuria mai i Lakisa,+ ona ia toe fo‘i atu lea iā te ia ma maua atu o ia o loo tau ma le aai o Lipena.+
9 Ua faalogo le tupu o Asuria i le tala e faatatau iā Tiraka le tupu o Aitiope, e faapea: “Ua sau o ia e tau ma oe.” Ona ia toe aauina atu lea o ni avefeʻau+ iā Esekia, e faapea:
10 “O le mea lenei e tou te fai atu ai iā Esekia le tupu o Iuta, ‘Aua ne‘i faatagaina lou Atua ua e faatuatua i ai, e ‘olegia oe e ala i le faapea mai: “E lē tuuina atu Ierusalema i le lima o le tupu o Asuria.”+
11 Faauta! Ua e faalogo i mea na faia e tupu o Asuria i nuu uma i le faaumatiaina o i latou;+ ae po o le a laveaʻiina ea oe?
12 Pe na laveaʻiina ea nuu na faaumatia e oʻu augātamā, e o latou atua? O fea o iai Kosane, o Karana,+ o Risefa, ma le fanauga a Etena sa i Tilasa?
13 O fea ea o iai le tupu o Amato, o le tupu o Arepa, ma le tupu o le aai o Sefavaima, ma le tupu o Ena, ma Iva?’”+
14 Ua ave e Esekia tusi mai i lima o avefeʻau ma faitauina. Ona alu aʻe lea o Esekia i le fale o Ieova ma fofola atu tusi i luma o Ieova.+
15 Ua tatalo Esekia+ i luma o Ieova, ma faapea atu: “Ieova e, le Atua o Isaraelu, o lē e afio i luga* o kerupi,+ e na o oe lava le Atua moni o malo uma o le lalolagi.+ O oe na faia le lagi ma le lalolagi.
16 Ieova e, ia e liuliualo ma faafofoga mai.+ Ia silasila mai ou fofoga+ Ieova e, ma e silafia ai. Ia faafofoga mai i upu a Sanerivi ua auina mai e faifai i le Atua soifua.
17 Ieova e, e moni lava ua faatafuna e tupu o Asuria nuu ma o latou laueleele.+
18 Ua latou susunuina o latou atua i le afi, auā e lē o ni atua i latou,+ a o galuega a lima o tagata,+ o laau ma maa. O le mea lea ua mafai ai ona latou faaumatia na mea.
19 O lenei, Ieova e lo matou Atua, faamolemole ia e faaola mai iā i matou mai i lona lima, ina ia iloa ai e malo uma o le lalolagi, o oe Ieova e, e na o oe le Atua e toʻatasi.”+
20 Ona auina atu lea e Isaia le atalii o Amota, o lenei feʻau iā Esekia: “Ua faapea ona fetalai mai Ieova le Atua o Isaraelu, ‘Ua ou faalogo i lau tatalo+ na fai mai e faatatau iā Sanerivi le tupu o Asuria.+
21 O le afioga lenei a Ieova na ia fetalai mai ai e faasaga iā te ia:
“Ua ʻinoʻino le tama teine taupou a Siona iā te oe, ma ua ia tauemu iā te oe.
Ua lūlū mai le ulu o le tama teine a Ierusalema iā te oe.
22 O ai ua e faifai ma upuleaga i ai?+
O ai ua e leotele i ai+Ma e faamaualuga i ai?
O Lē e Paia o Isaraelu!+
23 Ua e faifai iā Ieova+ e ala i au avefeʻau+ ma e faapea ane,‘O aʻu kariota tau e matuā tele lavaOu te alu aʻe ai i vaega maugā maualuluga,O vaega pito i mamao o Lepanona.
Ou te tuuina i lalo ona arasi maualuluga, ma ona perosi matagofie.
Ou te ulu atu i ona nofoaga e pito i sili ona mamao, o vaomatua e pei o se togālaau.
24 Ou te eli vaieli ma inu i vai ese;Ou te faamātūtūina foʻi vai uma* o Aikupito i oʻu alofivae.’
25 Pe e te leʻi faalogo ea? Ua uma ona ou filifilia mea e faia, mai lava i aso anamua.+
Na ou fuafuaina mai i aso ua mavae.+
O lenei, o le a ou faataunuuina.+
E te faia aai malupuipuia, e avea ma faupu‘ega o mea ua faatafunaina.+
26 E vaivai o latou tagatānuu;E latou te matuā fefefe lava ma māsiasi.
E avea i latou e pei o vao o le fanua ma mutia lanu meamata,+E pei foʻi o le mutia i taualuga, ua mamae i le matagi mai i sasaʻe.
27 Ae ou te iloa lelei mea uma e te faia: pe a e nofo i lalo, pe a e ulufafo, ma pe a e ulufale,+Ma le taimi e te ita tele ai iā te aʻu,+
28 Auā ua ou faalogo i lou ita tele iā te aʻu+ ma lou pisapisaō.+
O lea, ou te tuuina ai laʻu mātau i lou isu, ma laʻu faagutu+ i ou laugutu,Ou te taʻitaʻi atu lava oe i le ala na e sau ai.”+
29 “‘O le faailoga lenei mo oe:* E tou te aai i lenei tausaga i mea ua tutupu mai i fatu na toʻulu; o le tausaga lona lua, e tou te aai mai i saito e tutupu mai ai;+ a o le tausaga lona tolu, e tou te lūlūina ai fatu, ma selesele, ma totō ai togāvine ma aai mai i o latou fua.+
30 A o ē o totoe+ o tagata o Iuta, o le a pei o laau, e sosolo o latou aa ma fua mai ai ni fua.
31 Auā e iai ē o totoe o le a ō ese mai i Ierusalema, ma ē e faasaoina o le a ō ese mai i le mauga o Siona. E faia lenei mea i le maelega o Ieova o ʻau.+
32 “‘O le mea lea ua fetalai mai ai Ieova e faatatau i le tupu o Asuria:+
“E lē sau o ia i lenei aai,+Pe fanaina mai i ai se aū,Pe sau i ai ma se talipupuni,Pe tanu se mea maupuʻepuʻe ina ia osofaʻi mai ai.+
33 O le ala e sau ai o ia, e toe foʻi atu ai;E lē sau lava o ia i totonu o lenei aai,” ua fetalai mai ai Ieova.
34 “Ou te puipuia lenei aai+ ma faasaoina, ona o aʻu+Ma Tavita laʻu auauna.”’”+
35 O lenā lava pō na alu atu ai le agelu a Ieova, ma fasiotia le toʻa 185,000 o le ʻautau a Asuria.+ Ina ua feala aʻe tagata i le taeaopō, ona latou vaaia ai lea o tino oti uma.+
36 Ona alu ese ai lea o Sanerivi le tupu o Asuria, ua toe foʻi atu ma nofo i Nineva.+
37 A o ifo o ia i le fale* o Nisero lona atua, ona fasiotia lea o ia i le pelu+ e ona atalii o Atameleko ma Salese, ona la sosola ai lea i le nuu o Ararata.+ Ae ua avea Esara-atona+ lona atalii ma tupu e sui iā te ia.
Faamatalaga Pito i Lalo
^ Po o “le maota o le tupu.”
^ Pe atonu “i le vā.”
^ Po o “alāvai uma o le Naila.”
^ E faasino atu iā Esekia.
^ Po o le “malumalu.”
