O le Tusi Lona Lua o Tupu 20:1-21
20 I na aso, na maʻi ai Esekia ma ua toetoe lava a oti.+ Ona sau ai lea iā te ia o le perofeta o Isaia le atalii o Amota, ma ua faapea mai: “O le mea lenei ua fetalai mai ai Ieova, ‘Inā fai atu ia ni faatonuga i lou aiga, auā o le a e oti lava, e te lē toe malosi.’”+
2 Ona faasaga lea o ia i le puipui, ma ua tatalo atu iā Ieova e faapea:
3 “Ieova e, ou te ʻaiʻoi atu iā te oe, faamolemole, ia e manatua ua ou savali ma le faamaoni i ou luma ma le lotoatoa, ua ou faia foʻi le mea ua tonu i lau silafaga.”+ Ona tagi masūsū ai lea o Esekia.
4 A o leʻi oo Isaia i le lotoā ogatotonu, ae fetalai mai Ieova iā te ia, e faapea:+
5 “Inā toe foʻi atu ia, ma e fai atu iā Esekia le taʻitaʻi o loʻu nuu, ‘O le mea lenei ua fetalai mai ai Ieova le Atua o Tavita lou augātamā: “Ua ou faalogo i lau tatalo. Ua ou vaai i ou loimata.+ O lenei, ou te faamālōlō iā te oe.+ O le aso lona tolu, e te alu aʻe ai i le fale o Ieova.+
6 Ou te faaopoopoina tausaga e 15 i ou aso, ou te laveaʻi foʻi iā te oe ma lenei aai mai i le lima o le tupu o Asuria,+ ma ou te puipuia lenei aai ona o aʻu ma Tavita laʻu auauna.”’”+
7 Ona faapea atu lea o Isaia: “Ia aumai se keke o mati mamago.” Ona latou aumaia lea ma tuu i luga o le maʻi sua, ma ua faasolosolo ona toe malosi ai o ia.+
8 Ua fai atu Esekia iā Isaia: “O le ā le faailoga+ e iloa ai o le a faamālōlōina aʻu e Ieova, ma ou alu aʻe ai i le aso lona tolu i le fale o Ieova?”
9 Ona fai mai lea o Isaia: “O le faailoga lenei mai iā Ieova, ina ia e iloa ai o le a faataunuu e Ieova le mea na ia fetalai mai ai: Pe e te mana‘o e alu i luma le ata lafoia i sitepu* e sefulu, pe toe foʻi i tua i sitepu e sefulu?”+
10 Ona fai atu lea o Esekia: “E faigofie lava i le ata lafoia ona faalautele atu i sitepu e sefulu, ae e faigatā ona toe foʻi i tua i sitepu e sefulu.”
11 Ua valaau atu le perofeta o Isaia iā Ieova, ona Ia faafoʻi atu lea o le ata lafoia ua alu ifo i sitepu o Aasa, i le sefulu sitepu i tua.+
12 O le taimi lenā na aauina mai ai e le tupu o Papelonia, e igoa iā Perota-palata le atalii o Palata, ni tusi ma se meaalofa iā Esekia, auā na ia faalogo na maʻi Esekia.+
13 Ua talia i latou e Esekia, ma faaali atu iā i latou oloa uma i lona fale e teu ai oloa,+ o siliva, o auro, o suāuu pasama ma isi suāuu lelei, o lona fale o auupega, ma mea uma na maua i ana oloa. E leai lava se mea i lona fale ma lona malo uma e leʻi faaalia atu e Esekia iā i latou.
14 Mulimuli ane, ua sau le perofeta o Isaia i le tupu o Esekia, ma fesili mai iā te ia: “O le ā le mea na fai mai ai nei tagata, ma o fea na latou ō mai ai?” Ona tali atu lea o Esekia: “Na latou ō mai i se nuu mamao, mai i Papelonia.”+
15 Ua fesili mai o ia: “O ā mea na latou vāai i ai i lou fale?” Ua tali atu Esekia: “Na latou vāai i mea uma o loo i loʻu fale. E leai se mea ou te leʻi faailoaina atu iā i latou i aʻu oloa.”
16 Ua fai mai Isaia iā Esekia: “Ia faalogo ia i le afioga a Ieova,+
17 ‘Faauta! E oo mai aso e ave ai i Papelonia mea uma o loo i lou fale, ma mea na faaputu e ou augātamā seʻia oo mai i le aso nei.+ E leai se mea e totoe ai,’ ua fetalai mai ai Ieova.
18 ‘O le a aveina foʻi nisi o ē e tupuga mai iā te oe,+ ma fai i latou ma tagata aloaʻia i le maota o le tupu o Papelonia.’”+
19 Ona fai atu lea o Esekia iā Isaia: “Ua lelei le afioga a Ieova na e fai mai ai.”+ Ua ia fai atu foʻi: “O se mea lelei pe afai e iai pea le filemu ma le saogalemu* i loʻu olaga.”+
20 A o le olaga uma o Esekia, o lona malosi uma, o lona faia o le vaieli+ ma le alāvai na taʻi mai ai le vai i totonu o le aai,+ po ua lē o tusia ea i le tusi o le talafaasolopito o tupu o Iuta?
21 Ona taoto lea o Esekia faatasi ma ona augātamā;+ ma ua avea Manase+ lona atalii ma tupu e sui iā te ia.+
Faamatalaga Pito i Lalo
^ Atonu o nei sitepu na faaaogāina e tau ai le taimi, e ala i le mātauina o le mea ua oo i ai le ata lafoia.
^ Po o le “faamaoni.”
