O le Tusi Lona Lua o Tupu 21:1-26
21 E 12 tausaga o Manase+ ina ua fai o ia ma tupu, ma na pule o ia mai i Ierusalema i tausaga e 55.+ O le igoa o lona tinā o Efiseva.
2 Na ia faia mea leaga i le silafaga a Ieova, e tusa ma mea inosia na faia e nuu ese+ na tuliesea e Ieova mai i luma o le fanauga a Isaraelu.+
3 Na toe faia e ia o mea maualuluga na faaumatia e Esekia lona tamā,+ na ia faatūina foʻi fata faitaulaga iā Paala, ma faia se pou paia*+ e pei ona sa faia e Aapo le tupu o Isaraelu.+ Ua ifo foʻi o ia i ʻau uma o le lagi ma auauna i ai.+
4 Ua ia faia fata faitaulaga i atua sesē i le fale o Ieova,+ lea na fetalai ai Ieova e faapea: “Ou te tuu loʻu igoa i Ierusalema.”+
5 Ua ia faia foʻi fata faitaulaga i ʻau uma o le lagi+ i lotoā e lua o le fale o Ieova.+
6 Ua ia faaui ane foʻi lona atalii i le afi, faia faiga faaagaga, saʻili i faailoga,+ ma tofia taulāitu ma ē e vavalo i mea e tutupu.+ E matuā tele lava mea leaga na ia faia i le silafaga a Ieova e faatigā ai iā te ia.
7 Ua ia tuu foʻi le faatusa ua tā o le pou paia*+ na ia faia, i totonu o le fale na fetalai mai ai Ieova iā Tavita ma Solomona lona atalii e faapea: “O lenei fale ma Ierusalema, ua ou filifilia mai i ituaiga uma o Isaraelu, ou te tuu ai loʻu igoa i aso uma lava.+
8 Ou te lē toe tuliesea foʻi Isaraelu mai i le laueleele na ou tuuina atu i o latou augātamā,+ pe afai e latou te faia e tusa ma mea uma na ou poloaʻi atu ai iā i latou,+ o le Tulafono uma na poloaʻi atu ai laʻu auauna o Mose iā i latou e tausia.”
9 Ae latou te leʻi usita‘i, ma ua faasesēina pea i latou e Manase, ma faapogaia ai i latou ina ia faia mea leaga e sili atu nai lo o nuu na faaumatia e Ieova, mai i luma o le fanauga a Isaraelu.+
10 Ua fetalai mai pea Ieova e ala i ana auauna o perofeta,+ e faapea:
11 “Ua faia e Manase le tupu o Iuta nei mea inosia uma, ua sili atu lona amioleaga nai lo o tagata Amorī+ na muamua atu iā te ia,+ ua ia faapogaia foʻi Iuta e agasala i ana tupua inosia.*
12 O le mea lea ua fetalai mai ai Ieova le Atua o Isaraelu: ‘Ou te aumaia puapuaga i luga o Ierusalema+ ma Iuta, ma afai e faalogo i ai se tasi, e faateʻia ai o ia.*+
13 Ou te falō atu foʻi i luga o Ierusalema le fua+ na fuaina ai Samaria,+ ma le fua vai na fuaina ai le aiga o Aapo;+ ou te solo mamā lava Ierusalema e pei ona solo mamā e se tasi o le ipu faaofuofu, e solo mamā ma faafaō.+
14 Ou te lafoaʻia le vaega totoe o loʻu tofi+ ma tuuina atu i latou i lima o o latou fili, ma e ave faapagota ma faoa a latou oloa e o latou fili uma,+
15 talu ai ua latou faia mea leaga i oʻu luma, ma ua latou faatigā pea iā te aʻu mai i le aso na ō mai ai o latou augātamā mai i Aikupito seʻia oo mai i aso nei.’”+
16 Na faamasaaina foʻi e Manase le toto o le toʻatele o tagata e lē sala, seʻia oo ina tumu ai Ierusalema mai i le tasi itu e oo atu i le isi itu,+ e ese mai i lana agasala na ia faapogaia ai Iuta e agasala, i lona faia o le mea leaga i le silafaga a Ieova.
17 A o le olaga uma o Manase, o mea uma na ia faia, ma agasala na ia faia, po ua lē o tusia ea i le tusi o le talafaasolopito o tupu o Iuta?
18 Ona taoto lea o Manase faatasi ma ona augātamā, ma ua tanu i le lotoā o lona fale i le lotoā o Usa;+ ae ua avea Amone lona atalii ma tupu e sui iā te ia.
19 E 22 tausaga o Amone+ ina ua fai o ia ma tupu, ma e lua tausaga na ia pule ai mai i Ierusalema.+ O le igoa o lona tinā o Mesuleme le afafine o Arusa mai i Iatepa.
20 Na ia faia pea mea leaga i le silafaga a Ieova, e pei ona sa faia e Manase lona tamā.+
21 Na ia savali pea i ala uma na savali ai lona tamā, ma na ia auauna pea ma ifo atu i tupua inosia na auauna i ai lona tamā.+
22 Na ia tuulafoaʻia Ieova le Atua o ona augātamā, e leʻi savali foʻi o ia i ala o Ieova.+
23 Mulimuli ane, ona fouvale lea o auauna a Amone iā te ia, ma fasiotia le tupu i lona lava fale.
24 Ae ua fasiotia e tagata o le nuu ē uma na fouvale i le tupu o Amone, ma latou faia Iosia lona atalii ma tupu e sui iā te ia.+
25 A o le olaga uma o Amone, o mea na ia faia, po ua lē o tusia ea i le tusi o le talafaasolopito o tupu o Iuta?
26 Ona latou tanu lea o ia i lona tuugamau i le lotoā o Usa;+ ma ua avea Iosia+ lona atalii ma tupu e sui iā te ia.
Faamatalaga Pito i Lalo
^ Tagaʻi i le Uiga o Upu.
^ Tagaʻi i le Uiga o Upu.
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Epe., “o le a taalili ai ona taliga.”
