O le Tusi Lona Lua o Tupu 24:1-20
24 I aso o Ioakima, na alu aʻe ai Nepukanesa+ le tupu o Papelonia e tau ma Iuta, ona fai ai lea o Ioakima ma ana auauna mo tausaga e tolu. Peitaʻi, na liliu atu Ioakima ma fouvale iā Nepukanesa.
2 Ona aauina atu lea e Ieova iā Ioakima o ʻautau e faoa mea, e ō mai mai i Kaletaia,+ Suria, Moapi, ma Amoni. Ua ia aauina atu pea i latou e siitaua iā Iuta ma faaumatia ai, e tusa ai ma le afioga a Ieova+ na fetalai mai ai e ala i ana auauna le ʻauperofeta.
3 O le faatonuga lava a Ieova na oo ai lea mea iā Iuta, ina ia aveesea ai i latou mai i ona luma+ ona o agasala uma na faia e Manase,+
4 ma le toto o tagata e lē sala na ia faamaligiina,+ auā na ia faatumuina Ierusalema i le toto o tagata e lē sala, ma ua lē finagalo ai Ieova e faamagalo Iuta.+
5 A o le olaga uma o Ioakima ma mea uma na ia faia, po ua lē o tusia ea i le tusi o le talafaasolopito o tupu o Iuta?+
6 Ona taoto lea o Ioakima faatasi ma ona augātamā,+ ma ua avea Ioakina lona atalii ma tupu e sui iā te ia.
7 E leʻi toe sau lava le tupu o Aikupito mai i lona nuu, auā ua ave e le tupu o Papelonia fanua uma o le tupu o Aikupito,+ e amata mai i le ālia* o Aikupito+ seʻia oo atu i le vaitafe o Eufirate.+
8 E 18 tausaga o Ioakina+ ina ua fai o ia ma tupu, ma e tolu masina na pule ai o ia mai i Ierusalema.+ O le igoa o lona tinā o Neuseta le afafine o Elenatana mai i Ierusalema.
9 Na ia faia pea mea leaga i le silafaga a Ieova, e tusa ma mea uma na faia e lona tamā.
10 I le taimi lenā, na ō aʻe ai i Ierusalema auauna a Nepukanesa le tupu o Papelonia, ma siʻomia le aai.+
11 Ona sau lea o Nepukanesa le tupu o Papelonia i le aai, a o siʻomia e ana auauna le aai.
12 Ua ō atu Ioakina le tupu o Iuta, o lona tinā, o ana auauna, o ana perenise ma ona tagata aloaʻia,+ ma siilima i le tupu o Papelonia;+ ua ave faapagota foʻi o ia i le tausaga lona valu o le nofoaiga a le tupu o Papelonia.+
13 Ona aumaia lea e le tupu o Papelonia mai i inā o ‘oa uma o le fale o Ieova ma ‘oa uma o le fale o le tupu.+ Ua ia ta‘ei foʻi ipu auro uma na faia e Solomona le tupu o Isaraelu i le malumalu o Ieova.+ Na tutupu nei mea e pei lava ona sa valoia mai e Ieova.
14 Ua ia ave faapagota foʻi Ierusalema uma, o perenise uma,+ o tagata totoa malolosi uma, ma tufuga uma ma ē uma e faia uʻamea,*+ e toʻa 10,000 ē na ave faapagota. E leai se tasi na tuua seʻi vaganā ai tagata e sili ona matitiva o le nuu.+
15 Ona ia ave faapagota lea o Ioakina+ i Papelonia;+ ua ia aveese mai i Ierusalema le tinā o le tupu, o avā a le tupu, o ona tagata aloaʻia, ma alii sili o le nuu, ma ave faapagota i Papelonia.
16 Na ave faapagota fo‘i i Papelonia e le tupu o Papelonia, tagata totoa uma e toʻa 7,000, o tufuga ma ē e faia uʻamea* e toʻa 1,000, ma o i latou uma o tagata malolosi ua toleniina mo le taua.
17 Na tofia e le tupu o Papelonia Matania le uso o le tamā o Ioakina,+ e fai ma tupu e sui iā Ioakina, ma suia le igoa o Matania iā Setekaia.+
18 E 21 tausaga o Setekaia ina ua fai o ia ma tupu, ma e 11 tausaga na pule ai o ia mai i Ierusalema. O le igoa o lona tinā o Hamutala+ le afafine o Ieremia mai i Lipena.
19 Ua ia faia pea mea leaga i le silafaga a Ieova, e tusa ma mea uma na faia e Ioakima.+
20 O le toʻasā o Ieova na tutupu ai nei mea i Ierusalema ma Iuta, seʻia oo ina ia aveesea i latou mai i ona luma.+ Ua fouvale foʻi Setekaia i le tupu o Papelonia.+
