O le Tusi Lona Lua o Tupu 9:1-37
9 Ua valaau atu le perofeta o Elisaia i se tasi o atalii o le ʻauperofeta, ua faapea atu iā te ia: “Inā fusi ia lou ofu i lou puimanava, ma ave lenei fagu suāuu ma e alu atu i Ramota-kiliata.+
2 Pe a e oo i inā, ia e saʻili Ieʻu+ le atalii o Iosefatu, le atalii o Nimesi; ia e ulu atu ma faatulaʻi o ia mai i ona uso, ma ave i le potu pito i totonu.
3 Ia e ave le fagu suāuu ma liligi ifo i lona ulu, ma faapea atu, ‘O le mea lenei ua fetalai mai ai Ieova: “Ua ou faauuina oe e fai ma tupu o Isaraelu.”’+ Ona e tatala lea o le faitotoʻa ma e sola, aua e te faatali.”
4 Ona alu ai lea o le auauna a le perofeta i lona ala i Ramota-kiliata.
5 Ina ua oo atu o ia, o loo nonofo mai taʻitaʻiʻau i inā. Ua ia fai atu: “Le taʻitaʻiʻau e, o loo iā te aʻu se feʻau mo oe.” Ona fai mai lea o Ieʻu: “O ai o i matou nei?” Ae ua ia fai atu: “Le taʻitaʻiʻau e, e mo oe.”
6 Ua tulaʻi Ieʻu ma ulu atu i le fale; ona liligi ifo lea e le auauna o le suāuu i le ulu o Ieʻu, ma faapea atu, “O le mea lenei ua fetalai mai ai Ieova le Atua o Isaraelu: ‘Ua ou faauuina oe e fai ma tupu o le nuu o Ieova, o Isaraelu.+
7 Ia e faaumatia le aiga o Aapo lou alii, ma ou te taui atu foʻi iā Iesepela le toto o aʻu auauna le ʻauperofeta, ma auauna uma a Ieova na fasiotia e Iesepela.+
8 Ia faaumatia le aiga uma o Aapo; ou te tafiesea foʻi tane uma* mai i le aiga o Aapo, e aofia ai sē e leai se fesoasoani ma faatauvaa i Isaraelu.+
9 Ou te faia foʻi le aiga o Aapo e pei o le aiga o Ierepoamo+ le atalii o Nepata, e pei foʻi o le aiga o Paasa+ le atalii o Akia.
10 E ʻaina foʻi e taʻifau Iesepela i le fanua lea e i Isereelu,+ e leai foʻi se tasi e tanuina o ia.’” Ona tatala loa lea o le faitotoʻa e le auauna ma sola.+
11 Ina ua toe fo‘i atu Ieʻu i auauna a lona alii, ua latou fesili mai iā te ia: “Po o lelei mea uma? Aiseā na sau ai lenei tamāloa valea iā te oe?” Ae ua tali atu o ia iā i latou: “Ua outou iloa lelei lava le ituaiga tagata e iai le tamāloa, ma le auala e masani ona tautala ai.”
12 Ae ua latou fai mai: “E leai, ia ta‘u mai iā i matou le mea moni.” Ona ia fai atu lea: “O le mea lenei na fai mai ai o ia iā te aʻu, ma na ia faapea atili mai, ‘O le mea lenei na fetalai mai ai Ieova: “Ua ou faauuina oe e fai ma tupu o Isaraelu.”’”+
13 Ona taʻitasi lea o i latou ma ave lona ofu ma fofola i faasitepu i lalo o ona vae,+ ona latou ili lea o pū ma faapea atu: “Ua fai Ieʻu ma tupu!”+
14 Ona foua lea o Ioramo, e Ieʻu+ le atalii o Iosefatu le atalii o Nimesi.
Na leoleoina pea e Ioramo o Ramota-kiliata,+ o ia ma Isaraelu uma, ona o Asaeli le tupu+ o Suria.
15 Mulimuli ane, ua toe foʻi atu le tupu o Ioramo i Isereelu+ e togafiti ona manuʻa na faamanuʻalia ai o ia e Suria, ina ua ia tau ma Asaeli le tupu o Suria.+
Ona fai atu lea o Ieʻu: “Afai e tou te ʻau faatasi ma aʻu, aua neʻi sola ese se tasi mai i le aai e alu e taʻu atu le tala i Isereelu.”
16 Ona tiʻetiʻe lea o Ieʻu i lana kariota ma alu atu i Isereelu; auā o loo taoto ai i inā Ioramo ona o ona manuʻa, ma ua alu ifo Aasaia le tupu o Iuta e asiasi iā Ioramo.
17 A o tū le tagata vāai i luga o le ʻolo i Isereelu, ua ia iloa atu tagata e matuā toʻatele a Ieʻu o loo ō mai, ona ia fai atu lea: “Ua ou iloa atu tagata e matuā toʻatele.” Ona fai mai lea o Ioramo: “Inā auina atu ia se tagata tau e faafetaui i latou, ma ia fai atu, ‘Po o outou ō mai ea ma le filemu?’”
18 Ona alu atu lea o se tagata tiʻetiʻe solofanua e faafetaui o ia, ma faapea atu: “O le mea lenei ua fai mai ai le tupu, ‘Po o outou ō mai ea ma le filemu?’” Ae ua fai mai Ieʻu: “O le ā lau mea e fai i le ‘filemu’? Sau i oʻu tua!”
Ona taʻu atu lea e le tagata vāai e faapea: “Ua oo atu le avefeʻau iā i latou, ae ua lē toe foʻi mai o ia.”
19 Ua ia auina atu se tagata tiʻetiʻe solofanua lona lua, o lē ua alu atu iā i latou, ma faapea atu: “O le mea lenei ua fai mai ai le tupu, ‘Po o outou ō mai ea ma le filemu?’” Ae ua fai mai Ieʻu: “O le ā lau mea e fai i le ‘filemu’? Sau i oʻu tua!”
20 Ua taʻu atu e le tagata vāai e faapea: “Ua oo atu o ia iā i latou, ae ua lē toe foʻi mai o ia; ma o le ave kariota a le tagata, e pei lava o le aveave a Ieʻu le atalii o le atalii o Nimesi, auā o lana aveave ua pei o se tagata ua matuā ita lava.”
21 Ua fai ane Ioramo: “Inā sauni ia!” Ona sauni lea o lana kariota tau, ua taʻitasi foʻi Ioramo le tupu o Isaraelu ma Aasaia le tupu+ o Iuta, ma alu i lana kariota tau e faafetaui Ieʻu. Ua la ō aʻe ma ua fetaui ma Ieʻu i le fanua o Napota+ le Isereelu.
22 Ina ua vaai atu Ioramo iā Ieʻu, ona ia fai atu lea: “Po o e sau ea ma le filemu Ieʻu?” Ae ua fai mai o ia: “E faapefea ona filemu, a o loo faia e Iesepela lou tinā faiga faatalitane,+ ma faia le tele o ana togafiti faataulāitu?”+
23 Ona liliu loa lea o Ioramo e sola i lana kariota, ma faapea atu iā Aasaia: “Aasaia, o se togafiti!”
24 Ona tago lea o Ieʻu i lana ʻaufana, ma fana ai Ioramo i le vaitauʻau, ma ua ati le aū i lona fatu, ona paʻū lea o ia i totonu o lana kariota tau.
25 Ua fai atu Ieʻu iā Pitika lana auauna: “Ia sii aʻe o ia ma lafo i le fanua o Napota le Isereelu.+ Ia manatua, sa ta tiʻetiʻe i kariota solofanua e mulimuli atu iā Aapo lona tamā, ina ua tuuina atu e Ieova lenei feʻau faafaamasinoga e faatatau iā te ia:+
26 ʻ“O ananafi na ou iloa ai le toto o Napota+ ma le toto o ona atalii,” ua fetalai mai ai Ieova, “ma e mautinoa o le a ou toe taui atu+ lava iā te oe i lenei fanua,” ua fetalai mai ai Ieova.’ O lenei, inā sii aʻe ia o ia ma lafo i le fanua e tusa ai ma le afioga a Ieova.”+
27 Ina ua iloa atu e Aasaia+ le tupu o Iuta le mea ua tupu, ona ia sola lea e ui atu i le togālaau. (Mulimuli ane, ua tuliloa o ia e Ieʻu ma faapea atu: “Ia fasioti fo‘i o ia!” Ona latou fasia lea o ia a o iai i le kariota i le ala e alu aʻe i Kuru, lea e latalata i Ipelamo.+ Ae ua ia sola pea e oo i Mekito, ma oti ai i inā.
28 Ona ave lea o ia e ana auauna i le kariota i Ierusalema, ma ua latou tanu o ia i lona tuugamau, faatasi ma ona augātamā i le Aai a Tavita.+
29 O le tausaga lona 11 o le pulega a Ioramo le atalii o Aapo, na fai ai Aasaia+ ma tupu o Iuta.)
30 Ina ua alu atu Ieʻu i Isereelu,+ ma ua faalogo i ai Iesepela,+ ona ia vali lea o ona mata i le vali uliuli, ma teu faamanaia lona ulu, ua vaavaai ifo foʻi mai i le faamalama.
31 Ua oo atu Ieʻu i le faitotoʻa, ona fai mai lea o Iesepela: “Pe na i‘u lelei ea Semeri, o lē na fasiotia lona alii?”+
32 Ua tepa aʻe Ieʻu i le faamalama, ua faapea atu: “O ai e ʻau ma aʻu? O ai?”+ Ona vaavaai ifo lea o tagata aloaʻia e toʻalua pe toʻatolu iā te ia.
33 Ua fai atu Ieʻu: “Ia lafo ifo o ia!” Ona latou lafo ifo lea o ia, ua pisipisi foʻi lona toto i luga o le pā ma luga o solofanua, ma ua ia soli iā te ia.
34 Mulimuli ane, ua sau o ia i totonu, ua ʻai ma inu, ua ia faapea atu: “Faamolemole, seʻi outou ave lenei fafine ua malaia ma tanu o ia, auā o ia o le afafine o le tupu.”+
35 Ae ina ua latou ō atu e tanu o ia, latou te leʻi maua atu se vaega o ia, ae e na o lona atigipoo, o ona vae, ma ona alofilima.+
36 Ina ua latou toe foʻi mai ma faamatala mai iā te ia, ona ia fai atu lea: “Ua faataunuuina i lenei mea le afioga a Ieova+ na ia fetalai mai ai e ala i lana auauna o Elia le Tisepi, e faapea, ‘E ʻaina e taʻifau le tino o Iesepela i le fanua lea e i Isereelu.+
37 O le a fai foʻi le tino oti o Iesepela ma otaota i luga o le fogāeleele i le fanua o Isereelu, ina neʻi o latou faapea ane: “O Iesepela lenei.”’”
Faamatalaga Pito i Lalo
^ Epe., “so o se tasi e tulaʻi e fai sana feʻaulata i le pā.” O se faaupuga Eperu e faaalia ai le ʻinoʻino, e faasino atu i tauleleʻa ma tamāloloa.
