Amosa 7:1-17
7 O le mea lenei na faailoa mai e le Alii Pule Silisili Ese o Ieova iā te aʻu: Faauta! Ua ia aauina atu se ʻau tele o sē akerise ina ua faatoʻā amata ona tutupu aʻe o fatu na lūlūina i le taimi mulimuli.* O fatu ia na totō mulimuli ina ua mavae le seleselega o le mutia a le tupu.
2 Ina ua uma ona ʻaina e sē akerise o vao itiiti o le laueleele, ona ou fai atu lea: “Faamolemole, Ieova e le Alii Pule Silisili Ese, ia faamagalo mai!+ E faapefea ona faasaoina* Iakopo? Auā e vaivai o ia!”+
3 Ona suia lea o le faaiʻuga a* Ieova i lenei mea.+ “E lē tupu lea mea,” ua fetalai mai ai Ieova.
4 O le mea lenei ua faailoa mai e le Alii Pule Silisili Ese o Ieova iā te aʻu: Faauta! Ua poloaʻia e le Alii Pule Silisili Ese o Ieova se faasalaga e ala i le afi. Ua faatamaʻia ai vai loloto ma faatamaʻia ai se vaega o le fanua.
5 Ona ou fai atu lea: “Faamolemole, Ieova e le Alii Pule Silisili Ese, aua le faia lenei mea.+ E faapefea ona faasaoina* Iakopo? Auā e vaivai o ia!”+
6 Ona suia lea o le faaiʻuga a* Ieova i lenei mea.+ “E lē tupu foʻi lea mea,” ua fetalai mai ai le Alii Pule Silisili Ese o Ieova.
7 O le mea lenei ua ia faailoa mai iā te aʻu: Faauta! O loo tū Ieova i luga o se pā na fausia i se fua e tautau,* ma ua iai se fua e tautau i lona lima.
8 Ona fetalai mai lea o Ieova iā te aʻu: “Amosa, o le ā le mea ua e vaai atu i ai?” Ua ou tali atu: “O se fua e tautau.” Ua toe fetalai mai Ieova: “Ou te tuuina le fua e tautau i le lotolotoi o loʻu nuu o Isaraelu. Ou te lē toe faapalepale iā i latou.+
9 O le a faatafunaina mea maualuluga o Isaako,+ o le a faatamaʻia malumalu o Isaraelu;+ ma ou te tulaʻi atu ma le pelu i le aiga o Ierepoamo.”+
10 Ua auina atu e Amasia le ositaulaga o Peteli+ se feʻau iā Ierepoamo+ le tupu o Isaraelu e faapea: “Ua faufau leaga Amosa faasaga iā te oe i le lotolotoi o le aiga o Isaraelu.+ Ua lē mafai e tagata o le atunuu ona onosaia ana upu uma.+
11 Auā o le tala lenei a Amosa, ‘E oti Ierepoamo i le pelu, ma e ave faapagota Isaraelu mai i lo latou laueleele.’”+
12 Ona faapea mai lea o Amasia iā Amosa: “Le tagata e faamatalaina faaaliga, ia e alu ma sola atu i le laueleele o Iuta, ia saʻili au meaʻai* i inā ma fai ai au valoaga.+
13 Ae aua e te toe faia ni valoaga i Peteli,+ ona o le malumalu lea o le tupu+ ma le maota o le malo.”
14 Ua tali atu Amosa iā Amasia: “E lē o aʻu o se perofeta po o se atalii o se perofeta; ae sa avea aʻu ma tausi manu+ ma o lē sa tausia laau o le sukamoru.*
15 Ae na aveese aʻu e Ieova mai i le mulimuli atu i le lafu, ma na fetalai mai Ieova iā te aʻu, ‘Ia alu ma fai valoaga i loʻu nuu o Isaraelu.’+
16 O lenei, inā faalogo mai ia i le afioga a Ieova: ‘Ua e fai mai, “Aua neʻi e faia ni valoaga e tetee atu ai iā Isaraelu,+ ma aua foʻi neʻi e talaʻi+ e tetee atu i le aiga o Isaako.”
17 O lea, o le fetalaiga lenei a Ieova: “O le a fai lau avā ma fafine talitane i le aai, o le a feoti i le pelu ou atalii ma ou afafine. O le a vaevaeina lou laueleele i le maea e fua ai mea, a o oe, o le a e oti i se laueleele lē mamā; ma o le a ave faapagota Isaraelu mai i lo latou lava laueleele.”’”+
Faamatalaga Pito i Lalo
^ E faasino atu i le vaitaimi o Ianuari ma Fepuari.
^ Epe., “tulaʻi.”
^ Po o le “Ona faanoanoa lea o.”
^ Epe., “tulaʻi.”
^ Po o le “Ona faanoanoa lea o.”
^ O lenei meafaigaluega o se fua e tautau i se maea ma e faaaogā e iloa ai le saʻo o se mea e tū saʻo. O le upu Peretania, o le plummet.
^ Epe., “ʻai i falaoa.”
^ O se ituaiga laau o le mati.
