Auega 2:1-22
א [Alefa]
2 E! ua ufitia e Ieova le tama teine a Siona i le ao o lona toʻasā.
Ua ia lafo ifo mai i le lagi i le lalolagi le matagofie o Isaraelu.+
Ua lē manatua foʻi e ia le mea e tū ai ona aao+ i le aso o lona toʻasā.
ב [Peta]
2 Ua faaumatia e Ieova e aunoa ma le faapelepeleina o mea uma e mau ai Iakopo.
Ua ia faatamaʻia nofoaga malupuipuia a le tama teine a Iuta i lona maʻemaʻeā.+
Ua ia faagatasia ma le laueleele ma faaleaga le malo+ ma ona perenise.+
ג [Gimela]
3 Ua ia aveese le malosi uma* o Isaraelu i le aasa o lona toʻasā.
Ua faafoʻi mai e ia lona aao taumatau pe a oo mai le fili,+Ua mumū pea foʻi lona toʻasā iā Iakopo e pei o se afi e faaumatia ai itu uma.+
ד [Taleta]
4 Ua ia loloʻu* lana ʻaufana e pei o le fili; ua sauni foʻi lona aao taumatau e pei o sē e ita mai;+Ua ia fasiotia i latou uma ua ia finagalo i ai.+
Ua ia sasaa ifo lona toʻasā e pei o le afi+ i le faleʻie o le tama teine a Siona.+
ה [He]
5 Ua avea Ieova e pei o se fili;+Ua ia faaumatia Isaraelu.
Ua faaumatia e ia ona ʻolo uma;Ua ia faatafunaina ona nofoaga malupuipuia uma.
Ua ia faateleina foʻi le faanoanoa ma auega o le tama teine a Iuta.
ו [Vau]
6 Ua ia matuā lepeti lona fale lauvao+ e pei o loo i se togālaau.
Ua faaiʻuina* e ia lana tausamiga.+
Ua faagaloina e Ieova i Siona le tausamiga ma le sapati,O lona toʻasā tele foʻi ua lē faaaloalo ai o ia i le tupu ma le ositaulaga.+
ז [Saina]
7 Ua lafoaʻiina e Ieova lona fata faitaulaga;Ua teena e ia lona malumalu.+
Ua tuuina atu e ia i lima o le fili pā o ona ʻolo malupuipuia.+
Ua latou alalaga foʻi i le fale o Ieova,+ e pei ona faia i le aso o le tausamiga.
ח [Heta]
8 Ua finagalo Ieova e faatamaʻia le pā o le tama teine a Siona.+
Ua faataatia e ia le fua.+
Ua lē toe taofia e ia lona aao mai i le aumaia o le faaumatiaga.
Ua ia faapogaia foʻi le faavauvau o le pā puipui ma le pā.
Ua mou atu lo laʻua malosi.
ט [Teta]
9 Ua gogoto ifo ona faitotoʻa i le eleele.+
Ua faaumatia e ia ma gauia ona faamaufaalava.
Ua iai lona tupu ma ona perenise i atunuu.+
Ua leai se tulafono;* ua lē toe maua foʻi e ona perofeta se faaaliga mai iā Ieova.+
י [Iota]
10 Ua nonofo fifilemu i le eleele toeaina o le tama teine a Siona.+
Ua latou tuu efuefu i luga o o latou ulu ma oofu i ʻie talatala.+
Ua punonou foʻi ulu o taupou o Ierusalema i le eleele.
כ [Kafa]
11 Ua vaivai oʻu mata i le tagi.+
Ua tigā loʻu manava.*
Ua masaa loʻu ate i le eleele, ona ua taia le tama teine* a loʻu nuu,+Auā ua matapogia tamaiti ma tamameamea i nofoaga faitele o le taulaga.+
ל [Lameta]
12 Ua latou fesili atu pea i o latou tinā, “O fea o iai saito ma uaina?”+
Ina ua matapogia i latou e pei o sē ua manu‘a i nofoaga faitele o le aai,A o faasolo ina uma atu o latou ola i lima o o latou tinā.
מ [Mema]
13 O le ā se mea ou te faia ma molimau,Po o se mea ou te faatusaina i ai oe, le tama teine a Ierusalema e?
Le taupou e, le tama teine a Siona, o le ā se mea ou te faatutusa ma oe ina ia faamāfanafanaina ai oe?
Auā ua telē lou manuʻa e pei o le sami.+ O ai e mafai ona faamālōlō iā te oe?+
נ [Nuna]
14 O faaaliga na vaaia e ou perofeta mo oe, e pepelo ma faatauvaa,+Ua latou lē faaalia foʻi au mea sesē ina ia puipuia ai oe mai i le aveina faapagota,+Ae ua latou ta‘u atu pea iā te oe o faaaliga e pepelo ma taufaasesē.+
ס [Sameka]
15 Ua pati lima ma le aamu iā te oe i latou uma e ui ane i le auala.+
Ua latou tuufaaili*+ ma lūlū o latou ulu i le tama teine a Ierusalema, ua faapea ane:
“Po o le aai ea lenei sa latou faapea mai ai, ‘Ua atoatoa lona matagofie, ma e fiafia i ai le lalolagi uma’?”+
פ [Pe]
16 Ua faamamaga atu iā te oe gutu uma o ou fili.
Ua latou tuufaaili ma lilivau o latou nifo ma faapea mai: “Ua tatou faaumatia o ia.+
O le aso lava lenei na tatou faatalitali i ai!+ Ua taunuu, ma ua tatou vāai i ai!”+
ע [Oina]
17 Ua faia e Ieova le mea na ia finagalo i ai;+ ua faataunuu e ia lana fetalaiga,+O mea na ia poloaʻi mai ai i aso anamua.+
Ua ia lepetia e aunoa ma le alofa mutimutivale i ai.+
Ua ia faapogaia foʻi le fili e olioli ona o oe; ua ia faasilisilia le malosi* o ē e ita iā te oe.
צ [Sati]
18 Ua alalaga atu o latou loto iā Ieova, Le pā e, o le tama teine a Siona.
Ia tafe ifo loimata e pei o se ālia i le ao ma le pō.
Aua lava e te mālōlō, aua foʻi neʻi mapu ou mata.*
ק [Kofa]
19 Inā tulaʻi ia! Inā alaga atu ia i le pō i le amataga o leoleoga.
Ia sasaa atu lou loto i luma o Ieova e pei o le vai.
Ia sisii atu ou lima iā te ia mo ola o lau fanau,O ē ua matapogia ona o le oge o loo i fetaula‘iga uma o auala.*+
ר [Resa]
20 Ieova e, inā silasila mai ia ma silafia ai lē na e matuā faasalaina.
Pe e ʻaina pea e fafine a latou lava fanau na fananau mai o malolosi,+Pe e fasiotia foʻi ositaulaga ma perofeta i le malumalu o Ieova?+
ש [Sini]
21 Ua taatitia ua feoti le tamaitiiti ma le toeaina i le eleele i auala.+
Ua paʻuʻū foʻi i le pelu oʻu taupou* ma oʻu tauleleʻa.+
Ua e fasiotia i latou i le aso o lou toʻasā; ua e fasiotia e aunoa ma le alofa mutimutivale i ai.+
ת [Tau]
22 Ua e valaauina ē e faamataʻu mai mai i itu uma, e pei ona e valaauina o tagata i le aso o se tausamiga.+
E leʻi iai se isi na sao pe faaolaina i le aso o le toʻatamaʻi o Ieova;+Ua faaumatia e loʻu fili i latou na ou fanauina ma ou tausia.+
Faamatalaga Pito i Lalo
^ Epe., “nifo uma.”
^ Epe., “solia.”
^ Po o le “faaumatia.”
^ Po o “se faatonuga.”
^ O se faaupuga faafatusolo atonu e faailoa mai ai le tigā alofa.
^ Epe., “oʻu gaʻau.”
^ E foliga mai e faaalia ai le ofo po o le faaʻamuʻamu.
^ Epe., “le nifo.”
^ Po o “tamatamaʻimata.”
^ Epe., “i le mea e amata mai ai auala uma.”
^ Po o “tamaʻitaʻi talavou.”