Auega 5:1-22
5 Ieova e, ia e manatua le mea ua tupu iā i matou.
Ia e silasila mai ma silafia ai lo matou faalumaina.+
2 Ua avatu lo matou tofi i tagata ese, ma o matou fale i tagata mai i isi atunuu.+
3 Ua avea i matou o ni ē ua mātuaoti, ua leai ni tamā; ua pei o matou tinā o fafine ua oti a latou tane.+
4 Ua matou faatauina a matou lava vai ina ia feinu ai;+ ua faatau mai foʻi a matou lava fafie.
5 Ua toetoe lava papaʻi mai i o matou ua ē ua tuliloaina i matou;Ua matou vaivai lava, ae ua lē maua sa matou mālōlōga.+
6 Ua matou faalagolago atu iā Aikupito+ ma Asuria,+ ina ia faamalieina ai i meaʻai.
7 Ua lē toe iai o matou augātamā na agasala, ae ua matou tauaveina a latou mea sesē.
8 Ua pule auauna iā i matou; ua leai foʻi se tasi e aveesea i matou mai i o latou lima.
9 Ua lamatia o matou ola i le aumaia o a matou meaʻai,+ ona o le pelu a le toafa.
10 Ua mū o matou paʻu e pei o se ogaumu, ona o le matuā fia aai.+
11 Ua latou faamāsiasi* avā i Siona, faapea foʻi taupou i aai o Iuta.+
12 Ua latou sisi perenise i o latou lima,+ ua lē āva foʻi i toeaina.+
13 Ua sii e tauleleʻa le mea e olo ai saito, ma ua tau paʻuʻū tamaiti i avegāfafie.
14 Ua lē toe iai ni toeaina i le faitotoʻa o le aai;+ ua lē tāina e tauleleʻa a latou pese.+
15 Ua mavae atu le fiafia o o matou loto; ua liua foʻi a matou siva i le faavauvau.+
16 Ua paʻū ese le pale mai i lo matou ulu. Oi talofa iā i matou, auā ua agasala i matou!
17 O le mea lea ua mamaʻi ai o matou loto,+O mea fo‘i nei ua nenefu ai o matou mata,+
18 Ona ua tuufua le mauga o Siona;+ ua feoaʻi ai alope i luga.
19 A o oe Ieova e, e te afio i lou nofoālii e faavavau.
O lou nofoālii e mai i lea tupulaga i lea tupulaga.+
20 Aiseā ea ua e faagaloina ai i matou e faavavau, ma tuulafoa‘ia i matou mo se taimi umi?+
21 Ieova e, ia e toe faafoʻi atu i matou iā te oe, ona matou foʻi atu lea ma le lotoatoa.+
Ia e faafouina o matou aso e pei o aso anamua.+
22 Peitaʻi, ua e matuā teena lava i matou.
Ua e matuā toʻatamaʻi pea iā i matou.+
Faamatalaga Pito i Lalo
^ Po o le “toso faamalosi.”