O le Tusi i le Faapotopotoga i Efeso 3:1-21
3 O le mea lea, o aʻu o Paulo, o le pagota+ a Keriso Iesu ona o outou tagata o nuu ese,
2 e mautinoa ua outou faalogo, ua tuuina mai iā te aʻu le tofi o le auauna pule+ i le agalelei faifua o le Atua mo lo outou lelei,
3 lea ua faailoa mai ai iā te aʻu i se faaaliga le mea lilo paia, e pei ona ou muaʻi tusi puupuu atu ai.
4 O lea, pe a outou faitauina lenei mea, e mafai ona outou iloa ai loʻu malamalamaga i le mea lilo paia+ e faatatau i le Keriso.
5 E leʻi faaalia atu lenei mea lilo i isi tupulaga o le fanau a tagata, e pei ona faaalia mai nei e le agaga i ona aposetolo paia ma perofeta,+
6 o lona uiga, ia avea tagata o nuu ese o ni suli faatasi ma i tatou ma itutino o le tino e tasi,+ ma o ē e tofutofusia ma i tatou i le folafolaga, ona o le autasi ma Keriso Iesu e ala i le tala lelei.
7 Ua avea aʻu ma auauna i lenei mea lilo e tusa ai ma le agalelei faifua o le Atua. Ua ia tuuina mai iā te aʻu lenei meaalofa foaʻifua e faaalia ai lona mana.+
8 Ua tuuina mai iā te aʻu, o lē e itiiti ifo i le tagata aupito i faatauvaa o le ʻaupaia,+ lenei agalelei faifua+ ina ia ou folafola atu le tala lelei i nuu ese, e faatatau i oloa e lē masuʻesuʻeina a Keriso,
9 ma ia iloa e tagata uma le auala o loo puleaina ai le mea lilo paia,+ lea sa natia mai i aso anamua e le Atua o lē na foafoaina mea uma.
10 Na faia lenā mea e ala i le faapotopotoga,+ ina ia iloa ai nei e malo ma pule i mea o i le lagi uiga eseese o le atamai o le Atua.+
11 E tusa lenā mea ma lona finagalo e faavavau lea e fesootaʻi atu iā Keriso+ Iesu lo tatou Alii,
12 o ia ua tatou maua ai lenei saʻolotoga e tautatala atu ai, ma saʻoloto ai e faalatalata atu i le Atua,+ ona o lo tatou faatuatua iā Keriso.
13 O le mea lea ou te talosaga atu ai, ia aua neʻi outou faavaivai i nei puapuaga ua oo iā te aʻu ona o outou, auā o nei mea e faamamaluina ai outou.+
14 O le mea lea ou te tootuli ai i le Tamā,
15 o lē ua maua ai e aiga uma i le lagi ma le lalolagi o latou igoa.
16 Ou te tatalo ina ia foaʻi atu e ia iā te outou e tusa ai ma le tele o lona mamalu, ina ia faamalosia lo outou tagata i totonu+ i le mana e ala i lona agaga,
17 ma ina ia nofo Keriso i o outou loto e ala i lo outou faatuatua atoa ma le alofa.+ Tau ina ia mauaa+ ma faatumauina outou i luga o le faavae,+
18 ina ia mafai ai ona outou malamalama lelei faatasi ai ma le ʻaupaia uma, i le lautele, ma le umi, ma le maualuga, ma le loloto o le upu moni,
19 ma ia iloa le alofa o Keriso+ lea e sili atu i le poto, ina ia faatutumuina outou i le atoatoa o uiga o le Atua ua ia foaʻi mai.
20 O lea, ia iā te ia o lē na te mafaia ona fai o mea e matuā sili atu i lo o mea e tatou te talosaga atu ai pe e mafaufau i ai,+ e tusa ai ma lona mana lea e galue iā i tatou,+
21 ia iā te ia le mamalu e ala i le faapotopotoga, ma e ala iā Keriso Iesu, i tupulaga uma e faavavau, faavavau lava. Amene.
