O le Tusi i le Faapotopotoga i Efeso 4:1-32
4 O lea, o aʻu o le pagota+ ona o le Alii, ou te ʻaiʻoi atu iā te outou, ina ia savavali e tusa+ ma le valaau na valaauina ai outou,
2 ia matuā lotomaulalo+ ma agamalu, ia onosaʻi+ ma faapalepale le tasi i le isi i le alofa,+
3 ia matuā naunau e faatumau le autasi i le agaga i le fusi o le filemu.+
4 E tasi le tino,+ e tasi foʻi le agaga,+ e pei ona tasi o le faamoemoe+ lea na valaauina ai outou;
5 e tasi le Alii,+ e tasi le faatuatuaga, e tasi le papatisoga;
6 e tasi le Atua ma o le Tamā o tagata uma, o lē e pule i tagata uma, e galue foʻi e ala i tagata uma, ma e galue i totonu o tagata uma.
7 Ua foaʻiina mai foʻi iā i tatou taʻitoʻatasi le agalelei faifua, e tusa ma le auala ua fuaina mai ai e Keriso le meaalofa foaʻifua.+
8 O le mea lea ua fai mai ai: “Ina ua ia afio aʻe i lugā, na ia aveina ai pagota; na ia foaʻiina mai meaalofa i tagata.”+
9 O lea, o le ā le uiga o le faaupuga “ina ua ia afio aʻe”? O lona uiga na ia muaʻi afio ifo i le mea maulalo, o le lalolagi lea.
10 O lē na afio ifo, o ia lava lea na afio aʻe+ i luga aʻe o lagi uma,+ ina ia faataunuuina e ia o mea uma lava.
11 Na ia tuuina mai foʻi nisi e fai ma aposetolo,+ o nisi e fai ma perofeta,+ o nisi e fai ma faievagelia,*+ o nisi e fai ma leoleo mamoe ma ē e aʻoaʻo atu,+
12 ina ia fetuunaʻi tulaga o* le ʻaupaia, ia faia le galuega o le auauna atu i isi, ma atiaʻe le tino o Keriso,+
13 seʻia oo ina tasi i tatou uma i le faatuatuaga, ma le poto saʻo e faatatau i le Alo o le Atua, ia oo ina avea ma tagata matua,+ ina ia atoatoa lona matua e pei o Keriso.
14 E lē tatau ona toe avea i tatou ma tamaiti ua felafoa‘iina e pei o peau, ma fetosoaʻiina i matagi o aʻoaʻoga eseese,+ e ala i togafiti a tagata ma faufauga faaʻoleʻole e faasesē ai.
15 Peitaʻi, ia tautatala i le mea moni, ma ia tatou tuputupu aʻe i le alofa iā te ia i mea uma, o le ulu lava ia, o Keriso lea.+
16 O ia ua fesootaʻi lelei ai le tino atoa,+ ma ua faia ina ia felagolagomaʻi sooga uma, ina ia maua ai le mea e manaʻomia. Pe a gaoioi lelei itutino taʻitasi, o le a saosaolaumea lea i le tuputupu aʻe o le tino, a o atiina aʻe o ia lava i le alofa.+
17 O lea, ou te fai atu iā te outou ma taʻutino atu lenei mea i luma o le Alii, aua tou te toe savavali e pei o tagata o le lalolagi o ē o loo savavali+ e tusa ma o latou mafaufauga iʻuvale.+
18 Ua pogisa o latou mafaufau ma vavaeese i latou i le ola mai i le Atua, ona o le valea ua iā i latou ma le maaa o o latou loto.
19 Ona ua lē toe lagona e i latou le mā, ua latou faia ai amioga faauamaaa,*+ ma faia so o se ituaiga o amioga lē mamā ona o le manaʻo tele.
20 Ae ua aʻoaʻoina outou e lē faapena le Keriso.
21 O le mea moni lenā pe afai na outou faalogo iā te ia ma aʻoaʻoina outou e ia, e tusa ma le upu moni na aʻoaʻoina e Iesu.
22 Na aʻoaʻoina outou e tuu ese le tagata tuai+ e tusa ai ma a outou amioga sa faia muamua, lea ua faaleagaina i ona tuʻinanauga taufaasesē.+
23 Ia faaauau foʻi ona faafouina le malosi e pulea ai o outou mafaufau,*+
24 ma ia oofu i le tagata fou+ na foafoaina e tusa ma le finagalo o le Atua, i le amiotonu moni ma le faamaoni.
25 O lenei, ona ua outou tuu ese le taufaaʻoleʻole, ia taʻitasi outou ma tautala i le mea moni ma lona tuaoi,+ auā o i tatou o itutino o le tino e tasi.+
26 Pe a outou ita, aua neʻi agasala ai;+ aua neʻi goto le lā o tumau pea lo outou ita;+
27 aua neʻi outou tuua se avanoa i le Tiapolo.*+
28 O lē e gaoi, aua neʻi toe gaoi; ae ia galue mamafa o ia, ma ia faia e ona lima galuega lelei,+ ina ia mafai ai ona ia avatu ni mea i se tagata mativa.+
29 Ia aua neʻi alu atu se upu leaga* mai i o outou gutu,+ ae tau o upu lelei e atiaʻe ai i taimi e tatau ai, ina ia aogā i ē o faalogologo i ai.+
30 Aua foʻi tou te faatigā i le agaga paia o le Atua,+ lea ua faamaufaailogaina ai outou+ mo le aso e faasaʻolotoina ai e ala i le togiola.+
31 Ia tuu lo outou ita faamoemoe, ma le itaitagofie,+ ma le lotoa, ma le soona eʻē, ma upu masoā,+ atoa foʻi ma mea leaga uma.+
32 Ae ia agalelei le tasi i le isi, ia māfana lo outou alofa,+ ma ia fefaamagaloaʻi ma le lotoatoa, e pei ona finagalo malie le Atua e faamagaloina outou e ala iā Keriso.+
Faamatalaga Pito i Lalo
^ Po o le “e fai ma ē e folafola le tala lelei.”
^ Po o le “ina ia aʻoaʻoina.”
^ Po o “amioga leaga e aunoa ma le māsiasi.” O le upu Eleni, o le a·selʹgei·a. Tagaʻi i le Uiga o Upu.
^ Ele., “le agaga o o outou mafaufau.”
^ Po o le “aua ne‘i outou tuua se mea e mautū ai le Tiapolo.”
^ Ele., “se upu e pala.”
