O le Tusi i le Faapotopotoga i Efeso 5:1-33
5 O lea, ia faaaʻoaʻo i le Atua+ e faapei o lana fanau pele,
2 ma ia savavali i le alofa+ e pei foʻi ona alofa o le Keriso iā i tatou,*+ ma foaʻi mai lona ola mo i tatou* e fai ma taulaga ma togiola, o le mea e manogi lelei lea i le Atua.+
3 O amioga lē mamā taufeusuaʻiga,* ma so o se ituaiga o faiga lē mamā, po o le matapeʻapeʻa, ia aua lava neʻi taʻua iā te outou+ e pei ona tatau i tagata paia;+
4 po o amioga e māsiasi ai, po o le tautala i tala valea, po o tausuaga matagā,+ o mea ia e lē tatau, nai lo o lea, o le avatu o le faafetai i le Atua.+
5 Auā ua outou iloa ma malamalama lelei i lenei mea, o sē e faia amioga lē mamā taufeusuaʻiga,*+ po o sē e faia faiga lē mamā, po o sē e matapeʻapeʻa,+ o lona uiga o le tagata lea e ifo i tupua, e lē fai mo latou tofi le Malo o le Keriso ma le Atua.+
6 Aua neʻi ʻolegia e se tasi outou i upu lē aogā, auā o mea na e oo mai ai le toʻasā o le Atua i le fanau lē usiusitaʻi.
7 O lea, aua neʻi outou faia mea o loo latou faia;*
8 auā sa outou iai muamua i le pōuliuli, a o lenei ua outou iai i le malamalama+ e tusa ma le Alii.+ Ia outou savavali e faapei o fanau o le malamalama,
9 auā o le fua o le malamalama o mea lelei uma lava, ma le amiotonu ma le upu moni.+
10 Ia faamautinoa pea po o ā mea e fiafia+ i ai le Alii;
11 ma aua le toe faia galuega lē aogā o le pogisa,+ ae ia faaalialia lo latou leaga.
12 Auā o se mea e māsiasi ai le taʻua o mea e latou te faia faalilolilo.
13 O lenei, o mea uma ua faaalialia,* ua faaalia mai i le malamalama, auā o mea uma ua faaalia, o le malamalama lea.
14 O le mea lea ua fai mai ai: “O lē o loo moe, inā ala mai ia ma tulaʻi mai i le oti,+ ona faamalamalama mai lea o Keriso iā te oe.”+
15 Ia outou matuā faautauta ina ia aua neʻi outou savavali e pei o ē e vālea, ae ia pei o ē e atamamai,
16 ia outou faaaogā tatau le taimi,*+ auā o aso nei ua leaga.
17 O le mea lea, soia tou te lē faautauta, ae ia faaauau ona outou iloa po o le ā le finagalo o Ieova.*+
18 Aua foʻi tou te onanā i le uaina+ lea e iʻu ai i amioga valea,* ae ia faaauau ona faatumulia i le agaga.
19 Ia outou talatalanoa* i salamo, o viiga o le Atua, o pese faaleagaga, ma ia outou pepese+ ma usuina viiga+ iā Ieova* i o outou loto,+
20 ia avatu e lē aunoa le faafetai+ i lo tatou Atua le Tamā mo mea uma lava, i le suafa o lo tatou Alii o Iesu Keriso.+
21 Ia gauaʻi le tasi i le isi+ i le mataʻu iā Keriso.
22 Ia gauaʻi atu avā i a latou tane+ e pei ona gauaʻi atu i le Alii,
23 auā o le tane o le ulu lea o le avā,+ e pei foʻi o Keriso o le ulu ia o le faapotopotoga,+ o ia foʻi o le faaola o lenei tino.
24 O le mea moni, e pei ona gauaʻi o le faapotopotoga iā Keriso, ia faapena foʻi ona gauaʻi o avā i a latou tane i mea uma lava.
25 O outou tane, ia faaauau ona alolofa atu i a outou avā,+ e pei foʻi ona alofa le Keriso i le faapotopotoga, ma foaʻi mai lona ola mo le faapotopotoga,+
26 ina ia faapaiaina ai e ia, ma faamamāina i le faatāʻele i le vai e ala i le upu,+
27 ina ia mafai ona ia ofoina atu iā te ia lava le faapotopotoga i lona matagofie, e aunoa ma se ila, po o se maanuminumi, po o se isi mea faapena,+ ae ia paia ma ia lē taʻuleagaina.+
28 E faapea foʻi ona tatau i tane ona alolofa atu i a latou avā e pei o o latou lava tino. O le tane e alofa i lana avā, e alofa o ia iā te ia lava,
29 auā e leai se tane e ita i lona lava tino, ae e na te fafaga ma faapelepele i ai, e pei ona faia e Keriso i le faapotopotoga,
30 auā o i tatou o itutino o lona tino.+
31 “O le māfuaaga lea e tuua ai e le tane lona tamā ma lona tinā, ma nonofo faatasi* ma lana avā, ona avea ai lea o i laʻua ma tino e tasi.”+
32 E tāua tele lenei mea lilo paia.+ O lea ua ou tautala atu ai e faatatau iā Keriso ma le faapotopotoga.+
33 Peitaʻi, ia taʻitasi outou ma alofa i lana lava avā+ e pei ona ia alofa iā te ia lava; a o le avā, ia matuā faaaloalo o ia i lana tane.+
Faamatalaga Pito i Lalo
^ Pe atonu “iā te outou.”
^ Pe atonu “mo outou.”
^ O le upu Eleni, o le por·nei′a. Tagaʻi i le Uiga o Upu.
^ Tagaʻi i le Uiga o Upu.
^ Po o le “aua neʻi outou faifaimea faatasi ma i latou.”
^ Po o le “aʻoaʻiina.”
^ Ele., “ia outou faatau mai le taimi.”
^ Po o “amioga lē pulea.”
^ Pe atonu “talanoa iā te outou lava.”
^ Tagaʻi i le faamatalaga pito i lalo o le Kenese 2:24.
