O le Tusi i Kerisiano Eperu 2:1-18
2 O le mea lea e tatau ai ona tatou matuā uaʻi atu i mea ua tatou faalogo i ai,+ ina ia aua lava neʻi o tatou tafetafea ese mai i le faatuatua.+
2 Auā afai na faamautūina upu na ala mai i agelu,+ ma na faasalaina ma le tonu foʻi ē e agasala ma ē e lē usiusitaʻi uma lava,+
3 e faapefea la ona tatou sao pe afai e tatou te faatamala i le faaolataga e matuā tele?+ Auā na muamua fetalai i ai lo tatou Alii+ ma na faamaonia mai iā i tatou e ē na faalogo iā te ia,
4 na molimau mai foʻi le Atua e ala i faailoga, o mea ofoofogia,* ma galuega mamana eseese,+ ma le tufatufaina o meaalofa a le agaga paia e tusa ma lona finagalo.+
5 Auā ua lē tuuina atu e le Atua i agelu e pule i le lalolagi o loo fotuaʻi mai,+ lea o loo tatou talanoa atu ai.
6 Ae na tusia e se tasi o molimau e faapea: “O ai ea le tagata ua e manatu mai i ai, po o le atalii o le tagata ua e tausia ai o ia?+
7 Ua e faamaulaloina teisi o ia i lo o agelu; ua e faapaleina foʻi o ia i le mamalu ma le viiga, ma ua e tofia o ia e pule i galuega a ou aao.
8 Ua e faatoʻilaloina mea uma lava i lalo o ona vae.”+ E ala i le faatoʻilaloina o mea uma iā te ia,+ e leʻi tuua ai e le Atua se mea e leʻi toʻilalo iā te ia.+ Peitaʻi, e leʻi oo ina tatou vaaia le faatoʻilaloina o mea uma iā te ia.+
9 Ae ua tatou vāai iā Iesu, o lē na faamaulaloina teisi i lo o agelu,+ ma ua faapaleina i le mamalu ma le viiga ona o le tigā seʻia oo ina oti,+ ma ona o le agalelei faifua o le Atua, na oo ai le oti iā te ia ona o tagata uma.+
10 O lē ua faia mea uma mo ia, ma o lē ua ala ai ona iai mea uma, ua ia aumaia atalii e toʻatele i le mamalu.+ O lea, ua talafeagai ai ona ia faaatoatoaina le Sui Sili o lo latou faaolataga+ e ala i mafatiaga.+
11 Auā e toʻatasi le tamā na tupuga mai ai+ lē e na te faapaiaina ma ē ua faapaiaina,+ ma o le māfuaaga lenā e lē mā ai o ia e taʻua i latou o uso,+
12 e pei ona ia faapea mai: “Ou te taʻutaʻu atu lou suafa i oʻu uso; ou te vivii atu iā te oe i pesega i totonu o le faapotopotoga.”+
13 Ua ia toe faapea mai: “Ou te faatuatuaina o ia.”+ Ua toe faapea mai foʻi: “Faauta! O aʻu ma le fanau ua foaʻiina mai e Ieova* iā te aʻu.”+
14 Ona o le “fanau” ua iai toto ma aano, na faapea foʻi ona iai iā te ia o toto ma aano,+ ina ia mafai ona ia faaumatia e ala i lona maliu, o lē ua iai le malosi e faaoo ai le oti,+ o le Tiapolo lea,+
15 ina ia mafai ai ona ia faasaʻolotoina i latou uma na faapologaina i o latou olaga atoa, ona o le fefe i le oti.+
16 Auā e lē o fesoasoani atu lava o ia i agelu, ae o loo fesoasoani atu i le fanau a Aperaamo.+
17 O le mea lea na tatau ai ona pei o ia o ona “uso” i mea uma lava,+ ina ia mafai ona avea o ia ma ositaulaga sili e alofa mutimutivale ma faamaoni i mea a le Atua, ina ia mafai ona ia ofoina atu le taulaga o le leleiga ma le Atua*+ mo agasala a le nuu.+
18 Talu ai na mafatia o ia ina ua tofotofoina,+ ua mafai ai ona ia fesoasoani i ē ua tofotofoina.+
