O le Tusi i Kerisiano Eperu 5:1-14
5 Auā o ositaulaga sili uma ua filifilia mai i tagata, ua tofia e faia le galuega a le Atua mo tagata,+ ina ia ofo atu e ia o meaalofa ma taulaga mo agasala.+
2 E mafai ona feagai o ia ma le alofa mutimutivale* ma tagata e lē malamalama o ē e fai mea sesē, auā ua iloatino e ia ona lava vaivaiga,
3 ma ona o lenā mea, e tatau iā te ia ona faia taulaga mo ana lava agasala, e pei foʻi ona tatau ona ia faia mo agasala a tagata.+
4 E lē maua e se tagata lenei faiva mamalu ona o lona lava loto, ae e faatoʻā ia mauaina pe a valaauina o ia e le Atua, e pei foʻi ona faia iā Arona.+
5 Na faapena foʻi ona lē faamamaluina e Keriso o ia lava+ i le avea ai ma ositaulaga sili, ae na faamamaluina o ia e Lē na fetalai iā te ia e faapea: “O oe o loʻu atalii; o le aso nei ua avea ai aʻu ma ou tamā.”+
6 E pei foʻi ona ia fetalai i tusitusiga paia: “O oe o le ositaulaga e faavavau e uiga faatasi ma Mekisateko.”+
7 I aso na soifua ai o ia i le lalolagi,* na talosaga ma ʻaiʻoi atu ai Keriso ma le tagi tele ma loimata+ i Lē na mafai ona faaola iā te ia mai i le oti, ma na faafofogaina ma le agalelei o ia, ona o lona mataʻu i le Atua.
8 E ui lava o ia o le alo, ae na ia aʻoaʻoina le usiusitaʻi mai i mea na puapuagatia ai o ia.+
9 Ina ua uma foʻi ona faaatoatoaina o ia,+ ona tuu atu lea iā te ia o le tiute tauave ina ia maua ai e i latou uma e usiusitaʻi iā te ia le faaolataga e faavavau,+
10 auā ua tofia o ia e le Atua e avea ma ositaulaga sili e uiga faatasi ma Mekisateko.+
11 E tele mea e matou te fai atu ai e faatatau iā te ia, ae e faigatā ona faamatala, auā ua outou faapalapala i la outou faalogo.
12 Auā e ui ua leva ona* tatau ona fai outou ma ē e aʻoaʻo atu, ae ua manaʻomia ona toe aʻoaʻoina e se tasi outou mai i le amataga i mataupu faavae+ o afioga paia a le Atua, ma ua avea outou ma ē ua tatau i ai le suāsusu ae e lē o meaʻai aano.
13 Auā o lē e fafaga pea i le suāsusu, e na te lē iloa le upu o le amiotonu, auā o ia o le pepe.+
14 A o meaʻai aano e mo tagata matutua ia, o ē ua faaaogā o latou mafaufau e iloa ai le mea saʻo ma le mea sesē ina ua aʻoaʻoina.*
Faamatalaga Pito i Lalo
^ Po o le “agamalu.”
^ Ele., “soifua ai o se tagata.”
^ Ele., “pe a fua i le taimi ua.”
^ Po o le “toleniina.”
