O le Tusi i Kerisiano Eperu 6:1-20
6 O lea, talu ai ua tatou talitonu i aʻoaʻoga muamua+ e uiga iā Keriso, inā tatou finafinau ia ina ia avea ma tagata matutua,+ aua neʻi toe faataatiaina lenei lava faavae, o le salamō lea mai i galuega iʻuvale ma le faatuatua i le Atua,
2 o aʻoaʻoga i papatisoga ma le faaee atu o lima,+ o le toetū mai i le oti+ ma le faasalaga e faavavau.
3 E tatou te faia lenei mea, pe a finagalo i ai le Atua.
4 Auā o i latou o ē na faamalamalamaina muamua,+ o ē na tofo i le meaalofa foaʻifua mai i le lagi, o ē foʻi ua tofusia faatasi i le agaga paia,
5 ua tofo foʻi i upu lelei a le Atua ma mea mamana o le faiga o mea* o le a iai i le lumanaʻi,
6 ae ua paʻuʻū ese,+ e lē mafai ona toe faasagatonu o latou mafaufau ina ia salamō, talu ai o i latou lava ua toe tutuʻia le Alo o le Atua i luga o le laau, ma faamāina o ia i luma o tagata.+
7 Auā e maua e le eleele le faamanuiaga mai i le Atua pe a inu i le timu e masani ona paʻū i ai, ona tutupu mai ai lea o laau e aogā mo i latou e galulue ai.
8 Ae afai e tutupu mai ai laau tuitui ma laau talatala, e lafoaʻiina ma ua latalata foʻi ona faamalaiaina, ma e iʻu ina susunuina.
9 A o outou le ʻaupele e, ua matou mautinoa ua outou iai i se tulaga e sili ona lelei, ua iā te outou mea e iʻu ai i le faaolataga, e ui ina matou tautatala atu faapenei.
10 Auā e amiotonu le Atua e na te lē faagalogalo ai la outou galuega, ma le alofa ua outou faaali mai i lona suafa,+ auā ua outou auauna i le ʻaupaia, ma o loo outou auauna pea i ai.
11 Ae e matou te mananaʻo ina ia faaalia e outou taʻitoʻatasi lenā lava filigā, ina ia outou mautinoa atoatoa ai i le faamoemoe+ e oo i le iʻuga,+
12 ina ia aua neʻi o outou paiē,+ ae ia faaaʻoaʻo iā i latou o ē ua maua le folafolaga ona o lo latou faatuatua ma le onosaʻi.
13 Auā ina ua faia e le Atua lana folafolaga iā Aperaamo, na tautō o ia iā te ia lava, talu ai e leai se isi e sili atu iā te ia e mafai ona ia tautō i ai+
14 e faapea: “Ou te matuā faamanuia iā te oe, ou te matuā faatoʻateleina foʻi lau fanau.”+
15 O lea, ina ua faaalia e Aperaamo le onosaʻi, ona ia maua ai lea o lenā folafolaga.
16 Auā e tautō tagata i sē e sili atu, ma o la latou tautoga o le iʻuga lea o finauga uma, auā o se faamaoniga faaletulafono lea iā i latou.+
17 I se tulaga talitutusa, ina ua filifili le Atua e faaali atili atu i ē e mauaina le folafolaga,+ e lē suia lona finagalo, ona ia faamaonia lea i se tautoga,*
18 ma e ala i nei mea e lua e lē mafai ona suia, e lē mafai foʻi ona pepelo ai le Atua,+ ua mafai ai e i tatou o ē ua sulufaʻi atu i le Atua ona matuā faalaeiauina ai e taofimau i le faamoemoe o loo i o tatou luma.
19 O lenei faamoemoe+ ua iā i tatou ua pei o se taula i o tatou ola, e mautinoa ma mausalī, ma e oo atu lava i tala atu o le ʻie puipui,+
20 o le mea lea ua afio atu ai Iesu+ e muamua atu mo i tatou, ua fai o ia ma ositaulaga sili e faavavau e uiga faatasi ma Mekisateko.+
