O le Tusi i Kerisiano Eperu 7:1-28
7 Auā o Mekisateko lenei, o le tupu o Salema, o le ositaulaga a le Atua Silisili Ese, o lē na feiloaʻi ma Aperaamo ina ua foʻi mai i le faatoʻilaloina o tupu ma ia faamanuia atu iā Aperaamo,+
2 na avatu foʻi e Aperaamo iā te ia le sefuluaʻi o ana mea uma. Muamua, ua faaliliuina lona igoa o le “Tupu o le Amiotonu,” o ia foʻi o le tupu o Salema, o lona uiga o le “Tupu o le Filemu.”
3 Talu ai e leai sona tamā, po o sona tinā, po o sona gafa, e leai foʻi se amataga i ona aso po o se mutaaga o lona ola, ae na faia o ia e pei o le Alo o le Atua, ua tumau ai o ia o se ositaulaga e faavavau.+
4 Faauta i le silisili o lenei tagata, o lē na foaʻi atu i ai e Aperaamo, o le ulu o le aiga,* le sefuluaʻi o mea e aupito sili ona lelei mai i mea na faoa.+
5 E moni, e tusa ma le Tulafono, o i latou e mai i atalii o Levi+ na maua lo latou tofiga o ni ositaulaga, sa poloaʻiina ina ia aoaoina le sefuluaʻi o mea mai i le nuu,+ o o latou uso ia, e ui lava na latou tupuga mai iā Aperaamo.*
6 A o lenei tagata e lē tau lona gafa iā i latou, na ia aveina sefuluaʻi mai iā Aperaamo, ma faamanuia atu i lē na mauaina folafolaga.+
7 O lea, e lē mafai ona fefinaua‘i i lenei mea, e faamanuia e lē e sili o lē e itiiti.
8 O lenei, o tagata o le a feoti e latou te mauaina le sefuluaʻi o mea, peitaʻi o le isi tagata e mauaina le sefuluaʻi, ua molimau i ai Tusitusiga Paia e ola o ia.+
9 E mafai foʻi ona faapea atu e oo lava iā Levi o lē na mauaina le sefuluaʻi o mea, na ia totogia foʻi le sefuluaʻi o mea e ala iā Aperaamo,
10 auā e leʻi fanau mai Levi mai i* lona augātamā ina ua feiloaʻi o ia ma Mekisateko.+
11 Afai la na mafai ona faaatoatoaina mea e ala i le faiva o ositaulaga o sa Levī+ (auā o se tasi lea o vala o le Tulafono na tuuina atu i le nuu), aiseā la e toe manaʻomia ai se isi ositaulaga e uiga faatasi ma Mekisateko,+ ae e lē uiga faatasi ma Arona?
12 Talu ai ua suia le faiva o ositaulaga, e tatau foʻi la ona suia le Tulafono.+
13 Auā o le tagata o loo faatatau i ai nei mea, na sau o ia mai i se isi ituaiga, lea e leai se tasi o i latou na auauna i le fata faitaulaga.+
14 Auā e manino lava o lo tatou Alii na tupuga mai iā Iuta,+ o se ituaiga e leʻi faia i ai se tala a Mose e faatatau i le faiva o ositaulaga.
15 E matuā manino foʻi lenei mea pe a tulaʻi mai se isi ositaulaga+ e pei uma lava o Mekisateko.+
16 Ua avea o ia ma ositaulaga, e lē ona o le ituaiga na ia tupuga mai ai e tusa ai ma le Tulafono, ae ona o le mana ua iā te ia ua ia maua ai le ola e lē mafai ona faaumatia.+
17 Auā ua faapea mai le molimau e uiga te ia: “O oe o le ositaulaga e faavavau e uiga faatasi ma Mekisateko.”+
18 O lea la, ua faalēaogāina le tulafono na tuuina mai muamua, ona o le vaivai ma le lē aogā.+
19 Auā e leʻi faaatoatoaina se mea e tasi i le Tulafono,+ ae ua faia faapea ona o le faamoemoe e sili atu ona lelei+ ua iā i tatou, lea ua tatou faalatalata atu ai i le Atua.+
20 E pei ona sa iai se tautoga
21 (auā e iai tane na fai ma ositaulaga e aunoa ma se tautoga, ae o ia lenei ua fai ma ositaulaga e ala i se tautoga e faatatau iā te ia, lea na tautō i ai Lē na fetalai mai: “Ua tautō Ieova,* ma e lē suia lona finagalo,* ‘O oe o le ositaulaga e faavavau’”),+
22 ua faapea foʻi ona avea Iesu ma faamaoniga o se feagaiga e sili atu ona lelei.+
23 E toʻatele foʻi ē na faasolosolo ane e avea o ni ositaulaga,+ ae na lē mafai ona faaauauina ona o le oti,
24 peitaʻi, ona e soifua pea o ia e faavavau,+ e leai la nisi e sosoo ane iā te ia i lana faiva o le ositaulaga.
25 O le mea foʻi lea ua mafai ai ona ia faaolaina atoatoa i latou e faalatalata atu i le Atua e ala iā te ia, auā o loo soifua pea o ia e ʻaiʻoi atu mo i latou.+
26 Auā ua fetaui lelei mo i tatou se ositaulaga sili faapena, e faamaoni, e mamā, e lē taʻuleagaina,+ e vavaeese mai i ē e agasala, ma e sili atu foʻi ona maualuga nai lo o lagi.+
27 E lē manaʻomia ona ia faia ni taulaga i aso taʻitasi e pei ona sa faia e ositaulaga sili,+ e muamua ona faia o taulaga mo ana lava agasala, ona sosoo ai lea ma taulaga mo agasala a le nuu,+ auā e na o le faatasi lava ona ia faia lenei mea ina ua ia faataulagaina lona ola.+
28 Auā ua tofia e le Tulafono tane e iai vaivaiga e avea ma ositaulaga sili,+ a o le upu o le tautoga+ na mulimuli mai i le Tulafono, ua tofia ai le Alo o lē ua faaatoatoaina+ e faavavau.
Faamatalaga Pito i Lalo
^ Po o “le augātamā.”
^ Ele., “e ui lava na latou ō mai mai i le manava o Aperaamo.”
^ Ele., “sa iai pea o ia i le manava o.”
^ Po o le “ma e lē faanoanoa ai o ia.”
