O le Tusi i Kerisiano Eperu 9:1-28
9 O le feagaiga muamua, sa masani ona iai tulafono mo le auaunaga paia, ma sa iai foʻi lona mea paia+ i le lalolagi.
2 Auā sa fausia le potu muamua o le faleʻie lea sa iai le tuugāmolī+ ma le laulau, ma falaoa e laulauina i luma o le Atua;+ ma ua taʻua lea mea o le Mea Paia.+
3 Ae o tala atu o le ʻie puipui lona lua,+ sa iai le potu o le faleʻie e taʻua o le Mea e Sili Ona Paia.+
4 O lenei potu sa iai le ipu auro e faamū ai mea manogi,+ ma le atolaau o le feagaiga+ na ufitia atoa i le auro,+ lea sa iai i totonu le fagu auro sa iai le manai,+ ma le tootoo o Arona lea na fua,+ ma papamaa+ o le feagaiga;
5 sa iai foʻi i luga kerupi mamalu sa faamalumalu ifo i le ufiufi o le atolaau.*+ Peitaʻi, e lē o le taimi lenei e faamatala auʻiliʻili ai nei mea.
6 Ina ua uma ona fausia faapena o nei mea, ona ulu atu lea e lē aunoa o ositaulaga i le potu muamua o le faleʻie ina ia faia le auaunaga paia;+
7 ae e na o le ositaulaga sili e faatasi i le tausaga ona ulu atu i le potu lona lua,+ ma le toto+ lea e na te ofo atu ai le taulaga mo ia lava,+ atoa ma agasala na fai ma le lē iloa e le nuu.+
8 Ae ua faamanino mai e le agaga paia, e leʻi faailoaina mai le ala e ulu atu ai i le mea paia a o tū ai pea le faleʻie muamua.+
9 O lenei faleʻie o le faatusa lea mo le taimi nei,+ ma o loo ofoina atu ai meaalofa ma taulaga e tusa ai ma lenei faatulagaga.+ Peitaʻi, e lē mafai e nei mea ona faaatoatoaina le lotofuatiaifo o le tagata o loo faia le auaunaga paia.+
10 Ae e faasino atu nei mea i na o meaʻai, ma vaiinu, ma le faamamāina* o mea eseese i le vai.+ O mea na sa manaʻomia e le tulafono i le itu faaletino,+ ma na faatulaga mai seʻia oo i le taimi atofaina e faasaʻo ai mea.
11 Ae ina ua afio mai Keriso o se ositaulaga sili o mea lelei ua faataunuuina, ua ui ane o ia i le faleʻie e sili ma atoatoa ona lelei e leʻi faia e lima, o lona uiga, e lē o se foafoaga faalelalolagi.
12 E leʻi ulu atu o ia i le mea paia ma toto o ʻoti ma tamaʻi povi poʻa, ae o lona lava toto,+ e na o le faatasi lava ona faia, ma mauaina ai e ia le faaolataga* e faavavau mo i tatou.+
13 Auā afai na mafai i le toto o ʻoti, ma povi poʻa,+ ma le sausauina o lefulefu o le tamaʻi povi fafine, ona faapaiaina ma faamamāina ai tino o i latou ua faaleagaina,+
14 pe e lē sili ea ona faamamāina o tatou lotofuatiaifo mai i galuega iʻuvale+ i le toto o Keriso,+ o lē na ofo atu o ia lava ma le lē taʻuleagaina i le Atua e ala i le agaga e faavavau, ina ia tatou tuuina atu ai le auaunaga paia i le Atua soifua?+
15 O le mea lea ua avea ai o ia ma puluvaga o le feagaiga fou,+ ina ia maua ai e i latou ua valaauina le folafolaga o le tofi e faavavau,+ auā na maliu o ia ina ia faasaʻolotoina ai e le togiola+ i latou mai i mea sesē na faia a o nonofo i le feagaiga muamua.
16 Auā pe a fai se feagaiga, e tatau la ona oti le tagata o loo faataunuuina lenei feagaiga,
17 auā e faamaonia se feagaiga pe a oti se tagata, talu ai e lē aogā pe afai o loo ola pea le tagata e faataunuuina le feagaiga.
18 O lea la, na amataina* foʻi le feagaiga muamua e ala i le toto.
19 Auā ina ua uma ona taʻu atu e Mose i le nuu atoa poloaʻiga uma o le Tulafono, ona tago lea o ia i le toto o tamaʻi povi poʻa ma ʻoti, atoa ma le vai, o fulufulu mamoe mūmū sesega, ma lālā o le isopo, ua ia sausau ai le tusi* ma le nuu atoa,
20 ma faapea atu: “O le toto lenei o le feagaiga ua poloaʻia outou e le Atua ina ia tausia.”+
21 Ua faapea foʻi ona ia sausauina i le toto+ le faleʻie, ma ipu uma lava na faaaogā i le auaunaga paia.*
22 Ioe, e toetoe o mea uma lava e faamamāina e le toto+ e tusa ai ma le Tulafono, ma e lē mafai ona faamagaloina agasala seʻi vaganā ua faamaligiina le toto.+
23 O lea la, o le auala lenei sa tatau ona faamamāina ai faatusa+ o mea o i le lagi,+ a o mea faalelagi e faamamāina i taulaga e sili atu nai lo o ia taulaga.
24 Auā e leʻi ulu atu Keriso i le mea paia na faia e lima,+ o le ata lea o le mea moni,+ a o le lagi lava+ ina ia tulaʻi ai nei o ia i luma* o le Atua mo i tatou.+
25 Na faia lea mea ina ia lē ofoina atu soo o ia lava, e pei ona ulu atu o le ositaulaga sili i le mea paia, i lea tausaga ma lea tausaga+ ma le toto o manu.*
26 Pe ana lē o lea, semanū e puapuagatia soo o ia talu mai le faavaeina o le lalolagi. Peitaʻi, e na o le faatasi lava ona ia faaalia mai o ia i le taufaaiʻuiʻuga o faiga o mea a le lalolagi,* ina ia aveesea agasala e ala i le faataulagaina o ia lava.+
27 E pei ona faatasi ona oti o tagata, ma e mulimuli ane ona faamasinoina lea,
28 e faapena foʻi ona faatasi ona foaʻi atu e Keriso lona ola, ina ia tauaveina ai agasala a le toʻatele;+ ma o le taimi lona lua e faailoa mai ai o ia, e lē ona o agasala, ae ina ia iloa ai o ia e i latou o loo matuā saʻili iā te ia mo le faaolataga.+
Faamatalaga Pito i Lalo
^ Po o le “mea e fai ai le togisala.”
^ Ele., “papatisoina.”
^ Ele., “togiola; laveaʻiga.”
^ Ele., “faapaiaina.”
^ Po o le “tusi tāʻai.”
^ Po o le “auaunaga i le lautele.”
^ Ele., “i luma o fofoga.”
^ Ele., “toto ese.”
^ Tagaʻi i le Uiga o Upu.
