Esekielu 31:1-18
-
Le paʻū o Aikupito, le laau maualuga o le arasi (1-18)
31 I le tausaga lona 11, i le masina lona tolu, i le aso muamua o le masina, na toe oo mai ai le afioga a Ieova iā te aʻu e faapea:
2 “Le atalii e o le tagata, ia e fai atu iā Farao le tupu o Aikupito ma ona tagata e toʻatele,+‘O ai ua faatusaina i ai oe ma lou tulaga sili?
3 Na iai se tagata Asuria, o se laau o le arasi o Lepanona,E mananaia ona lālā e pei o ni laau e felefele e faapaolo ai, ma e matuā maualuga;Ua oo atu lona tumutumu i ao.
4 Na tupu tele o ia ona o vai, o vaipuna loloto foʻi na tupu maualuga ai o ia.
O le mea na totō ai na siʻomia e ālia;Ua faasūsūina foʻi e alāvai o vaipuna loloto laau uma o le fanua.
5 O le mea lea ua sili ai ona tupu maualuga o ia nai lo o isi laau uma o le fanua.
Ua faateleina ona lālā lapopoʻa, ua uumi foʻi ona lālāOna o le tele o vai i vaipuna loloto.
6 Ua ofaga manufelelei uma o le lagi i ona lālā lapopoʻa,Ua fanafanau manu uma o le vao i lalo o ona lālā,Ma ua nonofo foʻi nuu tetele uma i lalo ifo o lona paolo.
7 Ua oo ina ofoofogia le laau ona o lona matagofie ma le uumi o ona lālā,Auā ua sosolo ifo ona aa e oo ifo i vai e tele.
8 E leai se isi laau o le arasi e tutusa ma lea laau i le faatoʻaga a le Atua.+
E leai se laau o le perosi e tutusa ona lālā lapopoʻa, ma lālā lapopoʻa o lenei laau,E leai foʻi se laau o le aremoni, e tutusa ona lālā ma lālā o lea laau.
E leai se isi laau i le faatoʻaga a le Atua e tutusa ma le matagofie o lea laau.
9 Na ou faia ina ia matagofie ma e tele ona lālā,Ma e lotoleaga i ai isi laau uma o Etena, le faatoʻaga a le Atua moni.’
10 “O lea, o le fetalaiga lenei a le Alii Pule Silisili Ese o Ieova: ‘Talu ai ua maualuga tele o ia,* ua oo atu foʻi lona tumutumu i ao, ma ua faamaualuga lona loto ona o lona umī,
11 o le a ou tuuina atu ai o ia i le taʻitaʻi malosi o atunuu,+ o lē o le a faasagatau atu iā te ia, ma o le a ou teena o ia ona o lana amioleaga.
12 O le a tuu i lalo le laau e tagata ese, o pule sauā ia o nuu, ma o le a latou tuulafoaʻiina i luga o mauga, o le a paʻuʻū ona lālā i vanu uma, ma o le a taatitia ona lālā ua gauia i ālia uma o le laueleele.+ O le a ō ese tagata uma o le lalolagi mai i lona paolo ma tuulafoaʻia ai.
13 O le a nonofo manufelelei uma o le lagi i luga o lona ogālaau ua taatia i lalo, ma o le a nonofo foʻi manu uma o le vao i ona lālā.+
14 Ua tupu lenei mea, ina ia lē tupu maualuga ai se laau o loo lata i vai, pe oo atu lona tumutumu i ao, ma ia leai se laau ua lelei ona faasūsūina e oo atu lona maualuga i ao. Auā o le a pepē lava laau uma. O le a tanuina laau uma i le eleele, e pei o tagata ua feoti.’
15 “O le fetalaiga lenei a le Alii Pule Silisili Ese o Ieova: ‘Ou te faapogaia le faavauvau i le aso e alu ifo ai o ia i le Tuugamau.* O lea, o le a ou ufitia vai loloto ma punitia ona ālia ina ia taofia ai vai e tele. O le a ou faapogisa Lepanona ona o ia, ma o le a mamae laau uma o le fanua.
16 O le paʻō o lona paʻū, o le a ou faapogaia ai le gatete o nuu pe a ou ave ifo le laau i le Tuugamau* faatasi ma i latou uma e ō ifo i le lua.* O laau uma o Etena,+ o laau e aupito i mananaia ma sili o Lepanona, ma laau uma ua lelei ona faasūsūina, o le a faamāfanafanaina i le mea i lalo ifo o le eleele.
17 E latou te ō ifo faatasi ma ia i le Tuugamau,* iā i latou na fasiotia i le pelu,+ faatasi ma i latou na lagolagoina o ia,* o ē na nonofo i lona paolo i le lotolotoi o nuu.’+
18 “‘Pe e iai se laau o Etena na tutusa ma oe i lou mamalu ma lou tulaga sili?+ Ae o le a ave ifo lava oe faatasi ma laau o Etena i le mea i lalo ifo o le eleele. O le a e taoto faatasi ma ē ua lē peritomeina, o ē ua fasiotia i le pelu. O le mea lea o le a tupu iā Farao ma ona tagata e toʻatele,’ o le fetalaiga lea a le Alii Pule Silisili Ese o Ieova.”
Faamatalaga Pito i Lalo
^ Epe., “oe.”
^ Po o “Seoli.” Tagaʻi i le Uiga o Upu.
^ Po o “Seoli.” Tagaʻi i le Uiga o Upu.
^ Po o le “tuugamau.”
^ Po o “Seoli.” Tagaʻi i le Uiga o Upu.
^ Po o le “faatasi ma lona lima.”
