Esekielu 32:1-32
32 I le tausaga lona 12, i le masina lona 12, i le aso muamua o le masina, na toe oo mai ai le afioga a Ieova iā te aʻu e faapea:
2 “Le atalii e o le tagata, ia usu se pese faanoanoa* e faatatau iā Farao le tupu o Aikupito, ma fai atu iā te ia,‘Na pei oe o se tamaʻi leona malosi* i nuu,Ae ua faatamaʻia oe.
Na pei oe o se meaola telē i le sami,+ ua tafiti solo i ou vaitafe,Ua e faapalapalā vai i ou vae, ma ua faaleagaina ai vaitafe.’*
3 O le fetalaiga lenei a le Alii Pule Silisili Ese o Ieova:
‘Ou te lafo atu laʻu upega i ou luga e ala i se faapotopotoga o atunuu e tele,Ma o le a latou aveina aʻe oe i laʻu upega.
4 O le a ou tuulafoaʻia oe i le laueleele;O le a ou lafo oe i luga o le fanua taalaelae.
O le a ou faanonofo manufelelei uma o le lagi iā te oe,O le a ou fafaga foʻi ia maoona manufeʻai o le lalolagi atoa iā te oe.+
5 O le a ou lafoina lou tino i luga o maugaMa faatumu vanu i vaega o lou tino oti.+
6 O le a ou faainu le eleele i lou toto, e oo i mauga,O le a tutumu foʻi vaitafe i lou toto.’*
7 ‘O le a ou ufitia le lagi ma faapouliuligia fetu pe a faafanoina oe.
O le a ou ufitia le lā i ao,O le a lē susulu foʻi le masina.+
8 O le a ou faapouliuligia malamalama pupula uma o le lagi ona o oe,O le a ou ufitia foʻi lou laueleele i le pogisa,’ ua fetalai mai ai le Alii Pule Silisili Ese o Ieova.
9 ‘O le a ou faatigā loto o le toʻatele o tagata pe a ou aveina faapagota nisi o ou tagata i isi atunuu,O atunuu e te leʻi iloa.+
10 O le a ou faapogaia le ofo tele o le toʻatele o tagata,Ma o le a matuā fefefe o latou tupu ona o oe pe a faalālā laʻu pelu i o latou luma.
O le a taʻitoʻatasi i latou ma gatete i le fefe ona o lona lava ola,I le aso o lou paʻū.’
11 O le fetalaiga lenei a le Alii Pule Silisili Ese o Ieova:
‘O le a oo mai iā te oe le pelu a le tupu o Papelonia.+
12 Ou te faapogaia le fasiotia o ou tagata e toʻatele i le pelu a tagata totoa malolosi,O i latou uma o pule sauā o nuu.+
O le a latou faatamaʻia le mitamitaga o Aikupito, ma o le a faaumatia ona tagata uma e toʻatele.+
13 O le a ou faatamaʻia ana lafumanu uma i autafa o ona vai e tele,+Ma o le a lē toe faapalapalā vai i vae o tagata po o vae o lafumanu.’+
14 ‘I lenā taimi, o le a ou faamanino o latou vaiMa o le a ou faatafe lemū o latou vaitafe e pei o le suāuu,’ ua fetalai mai ai le Alii Pule Silisili Ese o Ieova.
15 ‘Pe a ou faatafunaina Aikupito, ma ua aveesea mai i le atunuu mea uma sa tumu ai,+Pe a ou faaumatia foʻi o ē uma ua nonofo ai,Ona latou iloa ai lea o aʻu lava o Ieova.+
16 O le pese faanoanoa lenei, ma o le a usuina lava e tagata;O le a usuina foʻi e fanau teine o nuu.
O le a latou usuina e faatatau iā Aikupito ma ona tagata uma e toʻatele,’ ua fetalai mai ai le Alii Pule Silisili Ese o Ieova.”
17 Ua oo mai foʻi le afioga a Ieova iā te aʻu i le tausaga lona 12, i le aso lona 15 o le masina e faapea:
18 “Le atalii e o le tagata, ia e auē ona o tagata e toʻatele o Aikupito ma faailoa atu o le a lafoina o ia ma fanau teine o nuu malolosi, i le mea i lalo ifo o le eleele, faatasi ma ē e ō ifo i le lua.*
19 “‘O ai ea ua sili atu ai lou matagofie? Ia e alu ifo i lalo, ma ia e taoto faatasi ma ē ua lē peritomeina!’
20 “‘O le a paʻuʻū i latou faatasi ma ē ua fasiotia i le pelu.+ Ua tuuina atu o ia i le pelu; ia toso ese o ia ma ona tagata uma e toʻatele.
21 “‘O le a tautatala mai tagata totoa malolosi mai i le mea loloto o le Tuugamau,* iā te ia ma ona fesoasoani. O le a latou ō ifo lava i lalo e ala i le fasiotia i le pelu, ma taooto e pei o ē e leʻi peritomeina.
22 O i inā, ua iai Asuria ma lana faapotopotoga uma. Ua siʻomia o ia e o latou tuugamau, o ē uma ua fasiotia i le pelu.+
23 Ua iai ona tuugamau i le mea loloto o le lua,* ma ua siʻomia e lana faapotopotoga lona tuugamau, o i latou uma ua fasiotia i le pelu, auā na latou faatupuina le mataʻu tele i ē o loo feola.
24 “‘O i inā, ua iai Elama+ ma ona tagata e toʻatele ua siʻomia ai lona tuugamau, o i latou uma ua fasiotia i le pelu. Ua latou ō ifo e leʻi peritomeina i le mea i lalo ifo o le eleele, o i latou na faatupuina le mataʻu tele i ē o loo feola. O lea, o le a oo iā i latou lo latou faalumaina faatasi ma ē e ō ifo i le lua.*
25 Ua latou faia se moega mo ia faatasi ma ē ua fasiotia, ma ua siʻomia ona tuugamau e ona tagata uma e toʻatele. O i latou uma ia e leʻi peritomeina ma ua fasiotia i le pelu, auā na latou faatupuina le mataʻu tele i ē o loo feola; o le a oo foʻi iā i latou lo latou faalumaina faatasi ma ē e ō ifo i le lua.* Ua tuuina o ia faatasi ma ē ua fasiotia.
26 “‘O i inā, ua iai Meseko ma Tupalu+ ma ona tagata e toʻatele. Ua siʻomia o ia e o latou tuugamau. O i latou uma e leʻi peritomeina ma ua tuia i le pelu, auā na latou faatupuina le mataʻu tele i ē o loo feola.
27 Pe e latou te lē taooto ea ma tagata totoa malolosi e leʻi peritomeina, ua feoti* faatasi ma a latou auupega o le taua? O le a latou tuu foʻi a latou pelu i lalo o o latou ulu,* ma a latou agasala i luga o o latou ivi, auā na faatupuina e nei tagata totoa malolosi le mataʻu tele i ē o loo feola.
28 A o oe, o le a nutililiia oe i totonu o ē e leʻi peritomeina, ma o le a e taoto faatasi ma ē ua fasiotia i le pelu.
29 “‘O i inā ua iai Etoma,+ o ona tupu ma ona taʻitaʻi, o ē e ui ina malolosi ae na taooto faatasi ma ē na fasiotia i le pelu; o le a latou taooto faatasi foʻi ma ē e leʻi peritomeina+ ma i latou e ō ifo i le lua.*
30 “‘O i inā ua iai perenise* uma o le itu i mātū, faatasi ma tagata Saitonu+ uma, o ē na ō ifo ma le māsiasi faatasi ma ē ua fasiotia, e ui i le mataʻu na latou faatupuina ona o lo latou malosi. O le a latou taooto e lē peritomeina faatasi ma ē ua fasiotia i le pelu, ua oo foʻi iā i latou lo latou faalumaina faatasi ma ē e ō ifo i le lua.*
31 “‘O le a vaai Farao i nei mea uma, ma o le a faamāfanafanaina o ia i mea uma na tutupu i ona tagata e toʻatele;+ o le a fasiotia Farao ma ana ʻautau uma i le pelu,’ ua fetalai mai ai le Alii Pule Silisili Ese o Ieova.
32 “‘Talu ai na ia faatupuina le mataʻu tele i ē o loo feola, o le a taooto ai Farao ma ona tagata uma e toʻatele faatasi ma ē e leʻi peritomeina, o ē ua fasiotia i le pelu,’ ua fetalai mai ai le Alii Pule Silisili Ese o Ieova.”
Faamatalaga Pito i Lalo
^ Epe., “o latou vaitafe.”
^ Po o “se tamaʻi leona taanoa.”
^ Po o “se pese o auega.”
^ Epe., “O le a tutumu foʻi vaitafe iā te oe.”
^ Po o le “tuugamau.”
^ Po o “Seoli.” Tagaʻi i le Uiga o Upu.
^ Po o le “tuugamau.”
^ Po o le “tuugamau.”
^ Po o le “tuugamau.”
^ Epe., “ua ō ifo i le Tuugamau,” po o Seoli. Tagaʻi i le Uiga o Upu.
^ Atonu e faasino atu i tagata totoa malolosi ua tanuina faatasi ma a latou pelu, e faaalia ai le faaaloalogia e le vaegaʻau.
^ Po o le “tuugamau.”
^ Po o “taʻitaʻi.”
^ Po o le “tuugamau.”
