Esekielu 35:1-15
-
Valoaga e faasaga i mauga o Seira (1-15)
35 Ua toe oo mai le afioga a Ieova iā te aʻu e faapea:
2 “Le atalii e o le tagata, ia faasaga ou mata i vaega maugā o Seira+ ma fai valoaga e faasagatau atu i ai.+
3 Ia fai atu i ai, ‘O le fetalaiga lenei a le Alii Pule Silisili Ese o Ieova: “Vaega maugā e o Seira, ua ou faasagatau atu iā te oe, ma o le a ou faaloaloa atu loʻu lima e faasagatau iā te oe, ma faia oe ma nuu ua faatafunaina.+
4 O le a ou lepetia ou aai, ma o le a avea oe ma nuu ua faatafunaina;+ ona e iloa ai lea o aʻu lava o Ieova.
5 Auā na e ita pea+ ma tuuina atu tagata Isaraelu i le pelu i le taimi o o latou puapuaga, i le taimi o lo latou faasalaga mulimuli.”’+
6 “‘O lea, ou te tautō iā te aʻu lava,’ o le fetalaiga lenei a le Alii Pule Silisili Ese o Ieova le Atua soifua, ‘ua ou tuuina atu oe i le oti, ma e te lē sao mai ai lava.+ Talu ai na e faaoo atu le oti i ē na e ita i ai, o le a tuliloa lava oe e le oti.+
7 O le a ou faia vaega maugā o Seira ma nuu ua faatafunaina,+ ma o le a ou faaumatia so o se tasi e ui ane ai pe toe foʻi mai i ai.
8 O le a ou faatumuina ona mauga i tagata ua fasiotia; o le a paʻuʻū ē ua fasiotia i le pelu i ou aʻega, i ou vanu ma ou ālia uma.
9 O le a ou faia oe ma mea e faatafunaina e faavavau, o le a lē toe ʻaināina foʻi ou aai;+ ona outou iloa ai lea o aʻu lava o Ieova.’
10 “Talu ai ua e faapea ane, ‘O le a fai mo aʻu nei nuu e lua ma nei laueleele e lua, ma e fai foʻi mo i tatou ia laueleele e lua,’+ e ui o loo iai Ieova i inā,
11 ‘o lea, ou te tautō iā te aʻu lava,’ ua fetalai mai ai le Alii Pule Silisili Ese o Ieova le Atua soifua, ‘o le a ou feutagaʻi ma oe e pei lava o le auala na e faaalia ai le ita ma le lotoleaga i lou ʻinoʻino iā i latou;+ ma o le a ou faailoa atu aʻu iā i latou pe a ou faamasinoina oe.
12 O le a e iloa ai o aʻu lava o Ieova, ua ou faalogo i au tala lē faaaloalo uma na fai e faasagatau ai i mauga o Isaraelu e faapea: “Ua faatafunaina i latou ma ua tuuina mai iā i tatou e fai ma meaʻai.”
13 Ua outou tautatala ma le faasausili e faasagatau iā te aʻu, ma ua faateleina foʻi a outou tala e faasagatau iā te aʻu.+ Ua ou faalogo uma i ai.’
14 “O le fetalaiga lenei a le Alii Pule Silisili Ese o Ieova: ‘O le a olioli le lalolagi uma pe a ou faia oe ma mea ua faatafunaina.
15 E pei lava ona e olioli ina ua faatafunaina le tofi o le aiga o Isaraelu, o le a faapea foʻi ona ou feutagaʻi ma oe.+ Vaega maugā e, o Seira, ioe, o Etoma uma,+ o le a avea oe ma mea e matuā faatafunaina; ona latou iloa ai lea o aʻu lava o Ieova.’”
