Esekielu 38:1-23
38 Ua toe oo mai le afioga a Ieova iā te aʻu e faapea:
2 “Le atalii e o le tagata, ia faasaga atu ou mata iā Koku mai i Makoku,+ o le taʻitaʻi sili* o Meseko ma Tupalu,+ ma fai valoaga e faasagatau atu iā te ia.+
3 Ia fai atu, ‘O le fetalaiga lenei a le Alii Pule Silisili Ese o Ieova: “Koku e, o aʻu lava ou te faasagatau atu iā te oe, le taʻitaʻi sili* o Meseko ma Tupalu.
4 O le a ou faaliliueseina oe ma tuu mātau i ou auvae,+ ma aumaia oe ma au ʻautau uma,+ o solofanua ma ē e tiʻetiʻe solofanua, o i latou uma ia ua oofu i ofu mananaia, o se faapotopotoga e toʻatele ua iai talipupuni tetele ma talita,* ma ua tofu i latou uma ma pelu;
5 ua faatasi i latou ma Peresia, o Aitiope ma Futu,+ ua iai uma a latou talita ma puloutau;
6 o Komeri ma ana ʻautau uma, o le aiga o Tokaremo+ mai i vaega mamao o le itu i mātū, ma ana ʻautau uma. Ua toʻatele tagata ua faatasi ma oe.+
7 “ʻ“Ia nofosauni, ia faia ni au tapenapenaga, o oe ma lau ʻautau uma ua faapotopoto atu iā te oe, ma o le a fai oe ma o latou taʻitaʻiʻau.*
8 “ʻ“O le a ou uaʻi atu* iā te oe pe a mavae aso e tele. I le faaiʻuga o tausaga, o le a e osofaʻia ai le laueleele o tagata na toe faafoʻisia mai i le faatamaʻiaina i le pelu, ua aoaoina faatasi mai i le tele o atunuu ma faapotopoto i luga o mauga o Isaraelu, ia na faatafunaina mo se taimi umi. Na toe faafoʻisia mai i atunuu tagata o lenei laueleele, ma o loo nonofo i latou uma ma le saogalemu.+
9 O le a e faasagatau iā i latou e pei o se matagi malosi, ma o le a e ufitia le laueleele e pei o ao, o oe ma au ʻautau uma ma le toʻatele o tagata faatasi ma oe.”’
10 “O le fetalaiga lenei a le Alii Pule Silisili Ese o Ieova: ‘I lea aso, e tutupu ai manatunatuga i lou loto, ma o le a e fafau ai se mea leaga.
11 O le a e fai ane: “O le a ou osofaʻia le laueleele ua iai nuu e lē o puipuia.*+ O le a ou faasagatau atu i ē o loo nonofo ma le saogalemu ma le toʻafilemu, o i latou uma ua nonofo i nuu e lē o puipuia i ni pā puipui, o laau faalava, po o faitotoʻa.”
12 O le a e manatu e ave le tele o le vete ma faoa le tele o mea, ma ia osofaʻia nofoaga sa faatafunaina ae ua toe ʻaināina,+ faapea tagata ua toe aoaoina mai i nuu,+ o ē ua faateleina lo latou tamaoaiga ma oloa,+ o i latou o loo nonofo i le ogatotonu o le lalolagi.
13 “‘O le a fai atu iā te oe Seepa,+ o Titana,+ o faatauʻoa o Tasesa+ ma ona tagata totoa* uma: “Po ua e osofaʻia ea le laueleele ina ia ave le tele o le vete? Po ua e faapotopoto ea au ʻautau ina ia ave siliva ma auro, ia ave foʻi ʻoa ma oloa, ma ia ave le vete tele?”’
14 “O lea, le atalii e o le tagata, ia e faia valoaga ma faapea atu iā Koku, ‘O le fetalaiga lenei a le Alii Pule Silisili Ese o Ieova: “I lea aso, pe a nonofo ma le saogalemu loʻu nuu o Isaraelu, po o le a e lē mātauina ea?+
15 O le a e sau mai i lou nofoaga, mai i vaega mamao o le itu i mātū,+ o oe ma le toʻatele o tagata faatasi ma oe, o loo tiʻetiʻe i latou uma i solofanua, o se faapotopotoga e toʻatele ma o se ʻautau e toʻatele lava.+
16 O le a e faasagatau i loʻu nuu o Isaraelu, e pei ona ufitia e ao o le laueleele. I le faaiʻuga o aso, o le a ou aumaia ai oe e faasagatau i loʻu laueleele,+ ina ia iloa ai aʻu e nuu pe a ou faapaiaina aʻu lava e ala iā te oe Koku e, a o latou vāai mai.”’+
17 “O le fetalaiga lenei a le Alii Pule Silisili Ese o Ieova: ‘Pe e lē o oe ea lea na ou taʻua i aso ua mavae e ala i aʻu auauna le ʻau perofeta o Isaraelu, o ē na valoia mo le tele o tausaga, o le a aumaia oe e faasagatau iā i latou?’
18 “‘I lenā aso, o le aso lea pe a sau Koku e osofaʻia le laueleele o Isaraelu, o le a sasao aʻe ai loʻu ita tele,’+ ua fetalai mai ai le Alii Pule Silisili Ese o Ieova.
19 ʻO le a ou tautala atu ona o loʻu ita ma le afi o loʻu ita tele; ma o le a iai se mafui‘e tele i le laueleele o Isaraelu i lea aso.
20 O aʻu foʻi e gatete ai iʻa o le sami, o manufelelei o le lagi, o manufeʻai o le fanua, o manu fetolofi uma o loo fetolofi i le eleele, ma tagata uma o loo nonofo i le laueleele, ma o le a mafuli i lalo mauga,+ solofa foʻi tofē, ma o le a soloia i le eleele pā uma.’
21 “‘O le a ou valaau atu i se pelu e faasagatau atu iā te ia i oʻu mauga uma,’ ua fetalai mai ai le Alii Pule Silisili Ese o Ieova. ‘E taʻitoʻatasi tagata uma ma faasagatau lana pelu i lona lava uso.+
22 O le a ou faaoo laʻu faamasinoga iā te ia* e ala i faamaʻi+ ma le faamasaatoto; ou te faatotō ifo foʻi timuga tetele ma uatoʻa,+ faapea le afi+ ma le teiō*+ i luga iā te ia ma ana ʻautau, ma tagata e toʻatele e faatasi ma ia.+
23 O le a ou faasilisilia lava aʻu ma faapaiaina aʻu, ma faailoa atu aʻu i luma o le tele o atunuu; ma o le a latou iloa ai o aʻu lava o Ieova.’
Faamatalaga Pito i Lalo
^ Po o le “perenise sili.”
^ Po o le “perenise sili.”
^ O se talita laʻitiiti, e masani ona tauaveina e tagata fanafana ū.
^ Epe., “leoleo.”
^ Po o le “aami.”
^ Po o “nuu taalaelae.”
^ Po o le “ma ona tamaʻi leona taanoa.”
^ Po o le “O le a faia le ma faamasinoga.”
^ O le elemeni samasama e faigofie ona mū e iai sona manogi malosi. O le upu Peretania, o le sulfur.
