Esekielu 39:1-29
39 “A o oe, le atalii e o le tagata, ia e faia valoaga e faasagatau atu iā Koku+ ma fai atu, ‘O le fetalaiga lenei a le Alii Pule Silisili Ese o Ieova: “Koku e, o aʻu lava ou te faasagatau atu iā te oe, le taʻitaʻi sili* o Meseko ma Tupalu.+
2 O le a ou faaliliueseina oe ma taʻitaʻiina oe ma aumaia oe mai i vaega mamao o le itu i mātū,+ ma avatu i luga o mauga o Isaraelu.
3 O le a ou tā lau ʻaufana ia paʻū ese mai i lou lima tauagavale, ma faapaʻū ese au aū mai i lou lima taumatau.
4 O le a e paʻū i mauga o Isaraelu,+ o oe atoa ma au ʻautau uma ma tagata o loo faatasi ma oe. Ou te tuuina atu oe e fai ma meaʻai a manufelelei eseese uma, ma manufeʻai o le fanua.”’+
5 “‘O le a e paʻū i luga o le fanua taalaelae,+ auā ua ou fai atu ai,’ ua fetalai mai ai le Alii Pule Silisili Ese o Ieova.
6 “‘O le a ou lafo atu le afi e faasagatau iā Makoku ma i latou o loo nonofo ma le saogalemu i motu,+ ma o le a latou iloa ai o aʻu lava o Ieova.
7 O le a ou faailoa atu loʻu igoa paia i le lotolotoi o loʻu nuu o Isaraelu, ma ou te lē toe tuua foʻi loʻu igoa paia ia taʻuleagaina; o le a iloa ai foʻi e atunuu o aʻu lava o Ieova,+ o Lē e Paia i Isaraelu.’+
8 “‘Ioe, e oo mai lea mea ma e taunuu lava,’ ua fetalai mai ai le Alii Pule Silisili Ese o Ieova. ‘O le aso lea na ou fai atu ai.
9 O le a ō atu tagata o loo nonofo i aai o Isaraelu ma faia afi i auupega, e pei o talita* ma talipupuni tetelē, o ʻaufana ma aū, o tao mata tasi ma tao uumi. O le a latou faaaogā nei mea e faamumū ai afi+ mo tausaga e fitu.
10 E lē manaʻomia ona latou aumaia ni laau mai i le fanua, pe aoao mai ni fafie mai i le vaomatua, auā o le a latou faaaogā auupega e faamumū ai afi.’
“‘O le a latou vetea mea a tagata na vetea a latou mea, ma faoa mea a tagata na faoa a latou mea,’ ua fetalai mai ai le Alii Pule Silisili Ese o Ieova.
11 “‘I lea aso, o le a ou avatu ai iā Koku+ se fanuatanu i inā i Isaraelu, i le vanu o tagata e faimalaga atu i le itu i sasaʻe o le sami, ma o le a taofia ai le ala o tagata e ui ane i lea mea. O i inā o le a latou tanu ai Koku ma ona tagata e toʻatele, ma e latou te faaigoa lea mea o le vanu o Hamona-Koku.*+
12 E fitu masina o le a tanuina ai i latou e le aiga o Isaraelu ina ia faamamāina ai le laueleele.+
13 O le a galulue tagata uma o le atunuu e tanuina i latou, ona avea lea ma mea e taʻutaʻua ai tagata o le atunuu i le aso ou te faamamaluina ai aʻu,’+ ua fetalai mai ai le Alii Pule Silisili Ese o Ieova.
14 “‘O le a iai tane e tofia e ui atu pea i le laueleele ma tanuina tino o loo totoe i luga o le fogāeleele, ina ia faamamāina ai le laueleele. O le a latou saʻili pea mo masina e fitu.
15 Pe a vāai atu i latou e ui ane i le laueleele i se ivi o se tagata, ona latou faatūina ai lea o se faailoga. Ona ō atu lea o i latou ua tofia e faia le galuega o le tanuina, ma tanu i latou i le vanu o Hamona-Koku.+
16 O le a iai foʻi i inā se aai e taʻua o Hamona.* O le a latou faamamāina le atunuu.’+
17 “A o oe, le atalii e o le tagata, o le fetalaiga lenei a le Alii Pule Silisili Ese o Ieova: ‘Ia fai atu i manufelelei eseese uma ma manufeʻai uma o le fanua, “Inā faapotopoto mai ia outou ma ō mai. Ia faapotopoto mai outou uma i itu uma o laʻu taulaga lea ou te saunia mo outou, o se taulaga tele i mauga o Isaraelu.+ O le a outou aai i aano ma feinu i le toto.+
18 O le a outou aai i tino o ē e malolosi, ma feinu i le toto o taʻitaʻi o le lalolagi. O i latou o mamoe poʻa, o tamaʻi mamoe, o ʻoti, ma povi poʻa, o i latou uma o manu pepeti o Vasana.
19 O le a outou maoona i le gaʻo ma feinu i le toto seʻia oo ina outou onanā i laʻu taulaga ua ou saunia mo outou.”’
20 “‘O le a outou maoona i laʻu laulau i solofanua, o ē e ave kariota, o tagata malolosi ma tagata totoa uma lava,’+ ua fetalai mai ai le Alii Pule Silisili Ese o Ieova.
21 “‘Ou te faailoa atu loʻu mamalu i atunuu, o le a vāai foʻi atunuu uma i laʻu faamasinoga ua ou faia ma le mana* ua ou faaalia atu iā i latou.+
22 E amata mai i lea lava aso, o le a iloa ai e le aiga o Isaraelu o aʻu lava o Ieova lo latou Atua.
23 O le a iloa ai e atunuu, o mea sesē a le aiga o Isaraelu na māfua ai ona ave faapagota i latou, talu ai na latou lē faamaoni iā te aʻu.+ O lea, na ʻaloese ai oʻu mata mai iā i latou+ ma tuuina atu i latou i o latou fili,+ na fasiotia foʻi i latou uma i le pelu.
24 Na ou feutagaʻi ma i latou e tusa ma lo latou lē mamā ma a latou solitulafono, ma na ʻaloese oʻu mata mai iā i latou.’
25 “O lea, o le fetalaiga lenei a le Alii Pule Silisili Ese o Ieova: ‘O le a ou toe aumaia ē na ave faapagota o Iakopo+ ma ou te alofa mutimutivale i le aiga uma o Isaraelu;+ ou te maumauaʻi foʻi e puipuia* loʻu igoa paia.+
26 Pe a uma ona faalumaina i latou ona o a latou gaoioiga lē faamaoni uma iā te aʻu,+ o le a latou nonofo i lo latou laueleele ma le saogalemu, ma e leai se tasi e faamataʻu i ai.+
27 Pe a ou toe aumaia i latou mai i nuu ma aoaoina i latou mai i atunuu o o latou fili,+ o le a ou faapaiaina foʻi aʻu iā i latou i luma o le tele o atunuu.’+
28 “‘Ona latou iloa ai lea o aʻu lava o Ieova lo latou Atua, pe a ou aumaia i latou i lo latou laueleele mai i atunuu na ou avatu faapagota i ai i latou, ma ou te lē tuua lava se tasi o i latou i ia atunuu.+
29 O le a lē toe ʻaloese oʻu mata+ mai i le aiga o Isaraelu, auā o le a ou liligi ifo loʻu agaga i luga o i latou,’+ ua fetalai mai ai le Alii Pule Silisili Ese o Ieova.”
Faamatalaga Pito i Lalo
^ Po o le “perenise sili.”
^ O se talita laʻitiiti, e masani ona tauaveina e tagata fanafana ū.
^ Po o le “vanu o tagata e toʻatele o Koku.”
^ Lona uiga “Tagata e Toʻatele.”
^ Epe., “lima.”
^ Epe., “faaalia le tuutoina atu atoatoa mo.”
