Esekielu 41:1-26
41 Ona ia avatu lea o aʻu i le Mea Paia,* ma ua ia fuaina poutū i autafa; o le lautele o poutū i autafa, e ono kupita* le lautele i le tasi itu, e ono foʻi kupita le lautele i le isi itu.
2 O le lautele o le mea e ulu atu ai e sefulu kupita, ma o puipui i autafa o le mea e ulu atu ai, e lima kupita i le tasi itu ma e lima foʻi kupita i le isi itu. Ua ia fuaina le umi o le Mea Paia, e 40 kupita, a o le lautele e 20 kupita.
3 Ona ia ulu atu lea i totonu* ma fua le poutū i autafa i le mea e ulu atu ai, e lua kupita lona mafiafia, ma e ono kupita le lautele o le mea e ulu atu ai. O puipui i autafa o le mea e ulu atu ai,* e fitu kupita.
4 Ona ia fuaina lea o le potu e faasaga i le Mea Paia, e 20 kupita lona umi, ma e 20 kupita lona lautele.+ Ona ia fai mai lea iā te aʻu: “O le Mea e Sili Ona Paia lenei.”+
5 Ona ia fuaina lea o le pā puipui o le fale, ma e ono kupita lona mafiafia. O potu i autafa e faataamilo i le malumalu, e fā kupita le lautele.+
6 E tolu fogāfale o potu i autafa, e iai le isi potu i luga o le isi potu, ma e taʻi 30 potu i fogāfale taʻitasi. Na iai e faataamilo i pā puipui o le malumalu, ni mea na mafai ona tiʻetiʻe ai i luga lagolago mo potu i autafa, ina ia lē ati ai lagolago i pā puipui o le malumalu.+
7 Na tofu itu e lua o le malumalu ma se auala faataamilomilo,* lea e faasolo ina lautele a o agaʻi i potu i le pito i luga.+ E faasolo ina lautele mai i le tasi fogāfale i le isi fogāfale, a o alu aʻe se tasi mai i le fogāfale pito i lalo i le fogāfale pito i luga, e ui atu i le fogāfale ogatotonu.
8 Na ou vaaia ua iai se faavae maualuga e faataamilo i le malumalu, ma o le maualuga o le faavae o potu i autafa, o le ū atoa lea e ono kupita.
9 O le mafiafia o le pā puipui i fafo o potu i autafa, e lima kupita. Na iai se avanoa* i tala ane o potu i autafa lea na avea ma vaega o le malumalu.
10 I le vā o le malumalu ma potu ʻai,*+ na iai se avanoa e 20 kupita le lautele i itu taʻitasi.
11 Na iai i le vā o potu i autafa ma le avanoa i le itu i mātū se mea e ulu atu ai, ma se isi mea e ulu atu ai i le itu i saute. O le lautele o le avanoa e lima kupita e faataamilo i itu uma.
12 O le fale i le itu i sisifo o loo faasaga i le vaega o loo avanoa, e 70 kupita le lautele, ae 90 kupita lona umi; o le pā puipui o le fale e lima kupita le mafiafia i ona itu uma.
13 Ua ia fuaina le malumalu, e 100 kupita le umi. O le vaega o loo avanoa, ma le fale* ma ona pā puipui, e 100 kupita le umi.
14 O le lautele o luma o le malumalu e faasaga i le itu i sasaʻe faatasi ma le vaega o loo avanoa, e 100 kupita.
15 Ua ia fuaina le umi o le fale o loo faasaga i le vaega o loo avanoa, lea o loo i le pito i tua, faapea ma ona poletito i itu uma e lua, e 100 kupita.
Na ia fuaina foʻi le Mea Paia, o le Mea e Sili Ona Paia,+ ma faapaologa o le lotoā,
16 faapea ma mea e ulu atu ai, o faamalama e faasolo ina lauiti faavaa pe a agaʻi i tua,+ ma poletito na iai i ia vaega e tolu. E latalata i le mea e ulu atu ai, na iai puipui laupapa+ e mai i le fola e oo i faamalama; ua fai foʻi faavaa o faamalama i laupapa.
17 Na fuaina foʻi luga aʻe o le mea e ulu atu ai, o le malumalu i totonu atoa ma fafo, ma le pā puipui atoa o le malumalu.
18 Ua iai foʻi kerupi ua vaneina+ ma ata o laau o le pama,+ o ata o pama ua i le vā o kerupi e lua, ma e lua foliga o le kerupi.
19 E faasaga foliga o le tagata i le ata o le laau o le pama i le tasi itu, ae faasaga foliga o le leona* i le ata o le laau o le pama i le isi itu.+ O le auala lea ua vaneina ai ia mea i le malumalu atoa.
20 E mai i le fola e oo atu i luga aʻe o le mea e ulu atu ai, ua iai kerupi ua vaneina ma ata o laau o le pama i le pā puipui o le malumalu.
21 E faatafafā pou o le faitotoʻa* o le malumalu.+ I luma o le mea paia,* ua iai se mea e foliga e pei
22 o se fata faitaulaga ua faia i laau,+ e tolu kupita le maualuga ae e lua kupita lona umi. E iai ona pou tulimanu, ma e faia lalo ma autafa i laau. Ona faapea mai lea o le tagata iā te aʻu: “O le laulau lenei ua i luma o Ieova.”+
23 E tofu le Mea Paia ma le Mea e Sili Ona Paia o le malumalu ma faitotoʻa e taʻilua itu.+
24 E tofu itu o faitotoʻa taʻitasi ma ni vaega se lua e mafai ona feliuaʻi.
25 Na vaneina i faitotoʻa o le malumalu ni kerupi ma ata o laau o pama, e pei o mea ua vaneina i pā puipui.+ Ua iai foʻi se faataumata laupapa i luma o le faapaologa i fafo.
26 Ua iai foʻi faamalama ua faasolo ina lauiti ona faavaa pe a agaʻi i tua,+ ma ata o le laau o le pama i itu e lua o le faapaologa, faapea ma potu i autafa o le malumalu ma faataumata.
Faamatalaga Pito i Lalo
^ Epe., “le malumalu.” I le mataupu e 41 ma le 42, o le faaupuga “le malumalu,” e faasino atu i le Mea Paia po o le malumalu atoa (e aofia ai le Mea Paia ma le Mea e Sili Ona Paia).
^ E faasino atu i le Mea e Sili Ona Paia.
^ Epe., “O le lautele o le mea e ulu atu ai.”
^ E foliga mai e faasino atu i faasitepu e faataamilo.
^ E foliga mai o se auala savali vāiti e faataamilo i le malumalu.
^ Po o “potu.”
^ E faasino atu i le fale o loo i le itu i sisifo o le malumalu.
^ Po o le “tamaʻi leona taanoa.”
^ E foliga mai e faasino atu i le mea e ulu atu ai i le Mea Paia.
^ E foliga mai e faasino atu i le Mea e Sili Ona Paia.
