Esekielu 46:1-24
46 “O le fetalaiga lenei a le Alii Pule Silisili Ese o Ieova: ‘O le faitotoʻa o le lotoā pito i totonu lea e faasaga i le itu i sasaʻe,+ e ao ona tapunia pea+ mo aso e ono+ e faia ai galuega, ae e ao ona tatalaina i le aso Sapati ma le aso o le masina faatoʻā vaaia.
2 E ulufale mai le taʻitaʻi e ala i le faapaologa o le faitotoʻa,+ ma tū i autafa o le pou o le faitotoʻa. E ao i ositaulaga ona ofo atu lana taulaga mū ma lana taulaga faifaatasi, ona ifo ai lea o ia i le mea e ulu atu ai o le faitotoʻa ma ulufafo atu ai. Ae e lē tapunia le faitotoʻa seʻia oo i le afiafipō.
3 E ao foʻi i tagata o le nuu ona ifo atu iā Ieova i le mea e ulufale atu ai o lenā faitotoʻa, i aso o Sapati ma masina faatoʻā vaaia.+
4 “‘O le taulaga mū e avatu e le taʻitaʻi iā Ieova i le aso Sapati, e ono tamaʻi mamoe poʻa e matuā lelei lava, ma le mamoe poʻa e matuā lelei lava.+
5 O le taulaga i meaʻai, e tasi le efa* i le mamoe poʻa, ma so o se mea e na te gafatia mo tamaʻi mamoe poʻa, faapea ma le sinu* o le suāuu mo efa taʻitasi.+
6 I le aso o le masina faatoʻā vaaia, e ao ona avatu ai se tamaʻi povi poʻa e matuā lelei lava mai i le lafu, o tamaʻi mamoe poʻa e ono ma le mamoe poʻa; e ao ona matuā lelei lava ia manu uma.+
7 E ao ona ia avatu e fai ma taulaga i meaʻai, e tasi le efa i le tamaʻi povi poʻa, e tasi le efa i le mamoe poʻa, ma so o se mea e na te gafatia mo tamaʻi mamoe poʻa. E ao foʻi ona ia ofo atu le sinu o le suāuu mo efa taʻitasi.
8 “‘Pe a ulufale mai le taʻitaʻi, e ao ona ia ui mai e ala i le faapaologa o le faitotoʻa, ma o le auala foʻi lenā e ao ona ia ulufafo atu ai.+
9 Pe a ulufale mai foʻi tagata o le nuu ina ia ifo atu i luma o Ieova i aso o tausamiga,+ o lē e ulufale mai i le faitotoʻa i mātū ina ia tapuaʻi,+ e ao ona ulufafo e ala i le faitotoʻa i saute;+ o lē foʻi e ulufale mai e ala i le faitotoʻa i saute, e ao ona ulufafo e ala i le faitotoʻa i mātū. E leai se isi e toe foʻi e ala i le faitotoʻa lea na ia ulufale mai ai, auā e ao ona ia alu saʻo.
10 A o le taʻitaʻi o loo faatasi ma i latou, e ao ona ia ulufale mai pe a latou ulufale mai, ma e ao foʻi ona ulufafo o ia pe a latou ulufafo atu.
11 I tausamiga ma aso o tausamiga, e ao ona avatu e fai ma taulaga i meaʻai, e tasi le efa i le tamaʻi povi poʻa, e tasi le efa i le mamoe poʻa, ma so o se mea e na te gafatia mo tamaʻi mamoe poʻa, faapea ma le sinu o le suāuu mo efa taʻitasi.+
12 “‘Afai e saunia e le taʻitaʻi se taulaga mū+ po o taulaga faifaatasi e fai ma taulaga tauofo iā Ieova, o le a tatalaina le faitotoʻa lea e faasaga i le itu i sasaʻe mo ia, ma o le a ia saunia lana taulaga mū ma ana taulaga faifaatasi e pei ona ia faia i le aso Sapati.+ Pe a ulufafo atu o ia, ona tapunia ai lea o le faitotoʻa.+
13 “‘E te saunia se tamaʻi mamoe poʻa e matuā lelei lava e faatoʻā atoa le tausaga, e fai ma taulaga mū i aso taʻitasi iā Ieova.+ E ao ona avatu lea taulaga i lea taeao ma lea taeao.
14 E te saunia foʻi i taeao taʻitasi se taulaga i meaʻai, o le tasi vaeono o le efa, faapea ma le tasi vaetolu o le sinu o le suāuu e sausau ai le falaoamata lelei, e fai ma taulaga i meaʻai iā Ieova e lē aunoa. O se tulafono lea e tumau.
15 E ao ona latou saunia se tamaʻi mamoe poʻa, o le taulaga i meaʻai, ma le suāuu i taeao taʻitasi, e fai ma taulaga mū e lē aunoa.’
16 “O le fetalaiga lenei a le Alii Pule Silisili Ese o Ieova: ‘Afai e avatu e le taʻitaʻi se meaalofa i ona atalii taʻitoʻatasi e fai ma ona tofi, e fai lava na mea mo i latou. Ua latou mauaina lo latou tofi.
17 Ae afai e na te avatu se meaalofa mai i lona tofi i se isi o ana auauna, o le a fai lea mo le auauna seʻia oo i le tausaga o le saʻolotoga,+ ona toe faafoʻi atu lea i le taʻitaʻi. E na o le tofi lea ua tuuina atu i ona atalii, e avea pea ma o latou tofi.
18 E lē tatau i le taʻitaʻi ona aveesea le tofi o tagata o le nuu, e ala i le tuliese faamalosi o i latou mai i o latou fanua. E ao ona ia avatu se tofi i ona atalii mai i ana lava mea, ina ia lē tuliesea ai se tasi o loʻu nuu mai i lona fanua.’”
19 Ona ia avatu lea o aʻu i le mea e ulufale ai+ lea e i autafa o le faitotoʻa, e agaʻi atu i potu ʻai paia* o ositaulaga o loo faasasaga i le itu i mātū,+ ma ua ou vaaia ai se nofoaga i le pito i tua i le itu i sisifo.
20 Ona ia faapea mai lea iā te aʻu: “O le nofoaga lenei e faavela ai e ositaulaga le taulaga o le nofosala ma le taulaga o agasala, ma latou tao ai taulaga i meaʻai,+ ina ia aua neʻi o latou aveina se mea i le lotoā pito i fafo ma faapaia ai le nuu.”+
21 Ua ia avatu aʻu i le lotoā pito i fafo ma taʻitaʻi atu aʻu i tulimanu e fā o le lotoā pito i fafo, ma ua ou vaaia ai se lotoā i tulimanu taʻitasi o le lotoā pito i fafo.
22 I tulimanu e fā o le lotoā, ua iai tamaʻi lotoā, e 40 kupita* le umi ma e 30 kupita le lautele. Ua tutusa le tetelē o nei fausaga i tulimanu e fā.
23 Ua iai se pā maa e siʻo ai nei lotoā e fā, ma ua iai foʻi mea e faavela ai meaʻai e maulalo ifo i nei pā maa.
24 Ona ia faapea mai lea iā te aʻu: “O umukuka nei e faavela ai e auauna o le malumalu taulaga a le nuu.”+
Faamatalaga Pito i Lalo
^ Po o “potu paia.”
