Esekielu 9:1-11
9 Ona ia valaau mai lea ma le leotele i oʻu taliga e faapea: “Ia aami i latou ua tofia e faasalaina le aai, ma ia taʻitoʻatasi ma uu i lona lima lana auupega e faatamaʻia ai!”
2 Ua ou vaaia tamāloloa e toʻaono o loo ō mai i le mea ua iai le faitotoʻa o le pā pito i luga+ e faasaga i le itu i mātū, ua taʻitoʻatasi ma uu i lona lima lana auupega e faatamaʻia ai; ua iai foʻi se tamāloa iā i latou ua ofu i le ʻie lino, ua tautau i ona puimanava le fagu vaitusi a se failautusi,* ma ua latou ō mai i totonu ma tutū i autafa o le fata faitaulaga ʻapamemea.+
3 Ona alu aʻe lea o le mamalu o le Atua o Isaraelu+ mai i luga o kerupi lea sa iai, ma ua alu atu i le faitotoʻa o le fale,+ ona valaau atu lea o le Atua i le tamāloa ua ofu i le ʻie lino, lea e tautau i ona puimanava le fagu vaitusi a le failautusi.
4 Ua fetalai mai Ieova iā te ia: “Ia ui ane i le aai, i totonu o Ierusalema, ma ia e faailogaina muāulu o i latou ua mapuitigā+ ma feoi ona o mea inosia uma o loo faia i le aai.”+
5 Ua ia fai atu i le isi vaega a o oʻu faalogo atu i ai: “Ia outou ui ane i le aai ma mulimuli atu iā te ia, ma ia fasioti i tagata. Aua neʻi outou faapelepele iā i latou pe alolofa mutimutivale i ai.+
6 E ao ona outou matuā fasiotia o toeaina, o tauleleʻa, o teine muli, o tamaiti atoa ma fafine.+ Ae o so o se tasi ua iai le faailoga,+ aua tou te faalatalata i ai. Ia outou amata mai i loʻu malumalu.”+ Ona latou amata ai lea i toeaina ua i luma o le fale.+
7 Ua ia toe fetalai mai iā i latou: “Ia faaleaga le fale ma faatumu lotoā i ē ua fasiotia.+ Inā ō atu ia!” Ona latou ō atu ai lea ma fasiotia tagata i le aai.
8 A o latou fasiotia i latou, ua tuua na o aʻu, ma ua ou faapaʻū faō ma alaga e faapea: “Oi auē, le Alii Pule Silisili Ese o Ieova! Po o le a e fasiotia i latou uma o totoe o Isaraelu, a o e sasaa ifo lou toʻasā i luga o Ierusalema?”+
9 Ua ia fetalai mai iā te aʻu: “E matuā tele lava mea sesē ua faia e le aiga o Isaraelu ma Iuta.+ Ua tumu le atunuu i le faamasaatoto+ ma ua tumu le aai i faiga faapiʻopiʻo.+ Auā ua latou faapea ane, ‘Ua tuua e Ieova le atunuu ma e lē o silasila mai Ieova.’+
10 A o aʻu, ou te lē faapelepele po ou te alofa mutimutivale foʻi.+ Ou te taui atu lava iā i latou e tusa ma o latou ala.”
11 Ona ou vaaia lea o le tamāloa o loo ofu i le ʻie lino, lea e tautau i ona puimanava le fagu vaitusi, ua sau o ia ma se tala e faapea: “Ua ou faia e pei ona e poloaʻi mai ai iā te aʻu.”
Faamatalaga Pito i Lalo
^ Po o “le mea e tuu ai le vaitusi a le tusiupu.”
