Esera 10:1-44
10 A o tatalo+ Esera ma taʻutino atu agasala a ona tagata, ma tagi ma faō i luma o le fale o le Atua moni, ona faapotopoto faatasi mai lea iā te ia, o se faapotopotoga e matuā toʻatele lava, o tane, o fafine, ma tamaiti o Isaraelu, ma ua matuā fetagisi lava le nuu.
2 Ona faapea mai lea o Sekania le atalii o Ikielu+ mai i le fanauga a Elama+ iā Esera: “Ua matou lē faamaoni i lo matou Atua, e ala i le faaipoipo atu i* fafine ese mai i tagata o le nuu.+ E ui i lea, o loo iai pea le faamoemoe mo Isaraelu.
3 O lenei, ia tatou osia se feagaiga ma lo tatou Atua+ ina ia aveesea avā uma ma a latou fanau, e tusa ai ma le faatonuga a Ieova ma ē e matataʻu* i le poloaʻiga a lo tatou Atua.+ Ia tatou faia e tusa ai ma le Tulafono.
4 Inā tū ia i luga, auā o lau tiute tauave le faataunuuina o lenei mea, ma e matou te faatasi ma oe. Ia e faamalosi ma ia faia.”
5 Ona tulaʻi lea o Esera, ua ia faatautō taʻitaʻi o ositaulaga, o le ʻau sa Levī, ma Isaraelu uma ina ia faia e tusa ai ma nei upu.+ Ona latou tautō ai lea.
6 Ua tulaʻi Esera mai i luma o le fale o le Atua moni, ma alu atu i le potu* o Iokana le atalii o Eliasipa o loo i le malumalu. E ui ina alu atu o ia i inā, ae e leʻi ʻai i se meaʻai pe inu i se vai, auā ua faanoanoa o ia ona o le lē faamaoni o le nuu na toe foʻi mai i le aveina faapagota.+
7 Ona alu atu lea o la latou feʻau i Iuta ma Ierusalema, ina ia faapotopoto faatasi mai i Ierusalema tagata uma na toe fo‘i mai i le aveina faapagota;
8 ma o so o se tasi e lē sau i aso e tolu e tusa ai ma le faaiʻuga a perenise ma toeaina, e aveesea ana oloa uma ma vavaeesea foʻi o ia mai i le faapotopotoga o le nuu na toe foʻi mai i le aveina faapagota.+
9 Ona faapotopoto faatasi lea i Ierusalema o tagata uma o Iuta ma Peniamina i aso e tolu, i le aso lona 20 o le masina lona iva. Ua nonofo pea le nuu atoa i se lotoā o le fale o le Atua moni, ua tetemū ona ua latou nofosala, ma ona o le maligi o timuga.
10 Ona tulaʻi lea o Esera le ositaulaga ma faapea atu iā i latou: “Ua outou lē faamaoni ina ua outou faaipoipo i fafine ese,+ ma ua outou faaopoopo ai i le nofosala o Isaraelu.
11 O lenei, ia taʻu atu a outou agasala iā Ieova le Atua o o outou augātamā, ma faia lona finagalo. Ia vavaeeseina foʻi outou mai i tagata o le nuu ma aauina ese atu fafine ese ia ua outou faaipoipo i ai.”+
12 Ona tali mai lea o le faapotopotoga uma ma le leotetele e faapea: “E matou te faia lava e pei ona e fai mai ai.
13 Peitaʻi, e toʻatele le nuu, o le tau foʻi lenei o timuga tetele. E lē mafai ona matou tutū i fafo, ma e lē tasi foʻi pe lua ni aso e faia ai lenei mea, auā ua matuā tele lo matou fouvale i lenei mea.
14 O lea faamolemole, seʻi avea o matou perenise e fai ma sui o le faapotopotoga uma;+ o i latou uma i o matou aai o ē ua faaipoipo i fafine ese, ia ō mai i se taimi atofaina, faatasi ma toeaina ma faamasino o aai taʻitasi, seʻia o matou liliueseina le toʻasā aasa o lo matou Atua mai iā i matou ona o lenei mea.”
15 Peitaʻi, ua tetee atu Ionatana le atalii o Asaelu ma Iekasia le atalii o Tikeva i lenei mea, ma ua lagolagoina i la‘ua e Mesulama ma Sapetai+ o le ʻau sa Levī.
16 Ae ua faia faapea e i latou na toe fo‘i mai i le aveina faapagota; ma ua faapotopoto Esera le ositaulaga ma alii sili o aiga o tamā, o i latou uma na filifilia o latou igoa, ina ia iloiloina lenei mataupu i le aso muamua o le masina lona sefulu;
17 ma e oo ane i le uluaʻi aso o le masina muamua, ua uma ona latou iloiloina tulaga o tane uma na faaipoipo i fafine ese.
18 Na iloa ai na faaipoipo nisi o atalii o ositaulaga i fafine ese:+ e mai i atalii o Iesua+ le atalii o Iosatako ma ona uso, o Maaseia, o Elisara, o Iaripa, ma Ketalia.
19 Ae na tautō i latou e aveesea a latou avā, ma ona ua nofosala i latou, e tatau ona latou ofoina atu se mamoe poʻa o le lafu mo lo latou nofosala.+
20 E mai i atalii o Imere,+ sa iai Hanani ma Sepatia;
21 e mai i atalii o Harima,+ o Maaseia, o Elia, o Semaia, o Ikielu, ma Usia;
22 e mai i atalii o Pasura,+ o Elioenai, o Maaseia, o Isamaeli, o Netanielu, o Ieosapa, ma Eliasa.
23 E mai i le ʻau sa Levī, o Ieosapa, o Semi, o Kilaia (o Kelita lea), o Petakia, o Iuta, ma Elisara;
24 e mai i tagata pepese, o Eliasipa; ma e mai i leoleo faitotoʻa, o Saluma, o Telema, ma Auri.
25 E mai i Isaraelu, e mai i atalii o Parose,+ sa iai Ramea, o Iesia, o Malakia, o Meamina, o Eleasaro, o Malakia, ma Penaia;
26 e mai i atalii o Elama,+ o Matania, o Sakaria, o Ikielu,+ o Opeti, o Ierimota, ma Elia;
27 e mai i atalii o Satu,+ o Elioenai, o Eliasipa, o Matania, o Ierimota, o Sapata, ma Asesa;
28 e mai i atalii o Pepai,+ o Iokana, o Hanania, o Sapai, ma Atalaia;
29 e mai i atalii o Pani, o Mesulama, o Maluka, o Ataia, o Iasuvi, o Seala, ma Ierimota;
30 e mai i atalii o Paka-moapi,+ o Atena, o Kila, o Penaia, o Maaseia, o Matania, o Pesaleli, o Penui, ma Manase;
31 e mai i atalii o Harima,+ o Elisara, o Isia, o Malakia,+ o Semaia, o Simiona,
32 o Peniamina, o Maluka, ma Semaria;
33 e mai i atalii o Hasumu,+ o Matenai, o Mataata, o Sapata, o Elifaleta, o Ieremai, o Manase, ma Semi;
34 e mai i atalii o Pani, o Maatai, o Amaramo, o Ueli,
35 o Penaia, o Petia, o Kilui,
36 o Vania, o Meremota, o Eliasipa,
37 o Matania, o Matenai, ma Iaasau;
38 e mai i atalii o Penui, o Semi,
39 o Selemia, o Natano, o Ataia,
40 o Makenatipai, o Sasai, o Sarai,
41 o Asareelu, o Selemia, o Semaria,
42 o Saluma, o Amaria, ma Iosefa;
43 ma e mai i atalii o Nepo, o Ieielu, o Maatatia, o Sapata, o Sapina, o Iatau, o Ioelu, ma Penaia.
44 O i latou uma nei na faaipoipo i fafine ese,+ ma ua latou aauina ese atu a latou avā faatasi ma a latou fanau.+
Faamatalaga Pito i Lalo
^ Po o “e ala i le aumaia i o matou fale o.”
^ Epe., “e gatete.”
^ Po o le “potu ʻai.”
