Esera 5:1-17
5 Ona faia lea e perofeta o Hakai+ ma Sakaria+ le atalii o le atalii o Ito,+ o se valoaga i tagata Iutaia o ē o loo i Iuta ma Ierusalema, i le suafa o le Atua o Isaraelu o lē o loo faatasi ma i latou.
2 O le taimi lea na amata ai ona toe fausia le fale o le Atua+ sa i Ierusalema, e Serupapelu+ le atalii o Salatielu, ma Iesua+ le atalii o Iosatako; na faatasi foʻi perofeta a le Atua ma i laʻua ma lagolagoina i laʻua.+
3 Ona ō mai lea iā i latou o Tatenai le kovana o le vaipanoa i tala atu o le vaitafe,* o Setara-posenai, ma a la aumea, ua fesili mai iā i latou: “O ai na faatonuina outou e fausia lenei fale ma faatulaga nei laau faalava?”
4 Ona latou fai atu lea iā i latou: “O ai igoa o tagata o loo faia lenei fale?”
5 Ae na silasila mai le Atua i* toeaina o tagata Iutaia,+ ma e leʻi mafai ona latou taofia i latou seʻia oo ina auina atu le tala iā Tariu, ma aumaia se tusi mai i le tupu e faatatau i lenei mataupu.
6 O le kopi lenei o le tusi na auina atu i le tupu o Tariu, e Tatenai le kovana o le vaipanoa i tala atu o le vaitafe, ma Setara-posenai ma ana aumea, o isi kovana ia o le vaipanoa i tala atu o le vaitafe;
7 ua latou auina atu iā te ia le tusi, ma o upu nei o le tusi:
“I le tupu o Tariu:
“Ia iā te oe le filemu!
8 Ia silafia e le tupu, na matou ō atu i le itumalo o Iuta i le fale o le Atua sili, ma o loo fausia i maa tetele, ma ua tuu laupapa i pā. Ua faia ma le maelega e tagata le galuega, ma o loo agaʻigaʻi i luma a latou taumafaiga.
9 Ona matou fesili atu lea i o latou toeaina: ‘O ai na faatonuina outou e fausia lenei fale ma faatulaga nei laau faalava?’+
10 Na matou fesili atu foʻi po o ai o latou igoa, ina ia o matou tusia ai igoa o tane o loo taʻimua ma e silafia ai i latou.
11 “Ona latou tali mai lea iā i matou e faapea: ‘O i matou o auauna a le Atua o le lagi ma le lalolagi, ma o loo matou toe fausia le fale na fausia i le tele o tausaga ua mavae, lea na fausia ma faaumaina e se tupu sili o Isaraelu.+
12 Peitaʻi, ona na faaita e o matou tamā le Atua o le lagi,+ na ia tuuina atu ai i latou i le lima o Nepukanesa+ le tupu o Papelonia, le tagata Kaletaia, o lē na faaleagaina lenei fale+ ma ave faapagota le nuu i Papelonia.+
13 Ae i le tausaga muamua o le nofoaiga a Kuresa le tupu o Papelonia, na faia ai e le tupu o Kuresa se faatonuga ina ia toe fausia lenei fale o le Atua.+
14 E lē gata i lea, o mea auro foʻi ma siliva o le fale o le Atua na aveina e Nepukanesa mai i le malumalu sa i Ierusalema, ma ave i le malumalu i Papelonia, na aumaia e le tupu o Kuresa nei mea mai i le malumalu i Papelonia,+ ma tuuina atu i se tamāloa e igoa iā Sesepasara,*+ o lē na tofia e Kuresa e avea ma kovana.+
15 Na fai atu Kuresa iā te ia: “Ia e ave nei mea. Inā alu ia ma tuu i le malumalu o loo i Ierusalema, ma ia toe fausia le fale o le Atua i lona tulaga sa iai.”+
16 Ona sau ai lea o Sesepasara ma faataatia faavae o le fale o le Atua+ lea o loo i Ierusalema; ma e mai i na aso seʻia oo mai i le asō, ua toe fausia le fale ae e leʻi faamāeʻaina lava.’+
17 “O lenei, afai e lelei i le tupu, ia faia se suʻesuʻega i le fale e teu ai oloa a le tupu o loo i inā i Papelonia, ina ia iloa ai pe na faia e le tupu o Kuresa se faatonuga e toe fausia le fale o le Atua i Ierusalema;+ ma ia auina mai iā i matou le faaiʻuga a le tupu e faatatau i lenei mea.”
Faamatalaga Pito i Lalo
^ O le vaipanoa i tala atu o le vaitafe, e faasino atu i laueleele i le itu i sisifo o le vaitafe o Eufirate.
^ Ara., “na iai fofoga o lo latou Atua i.”