Esera 9:1-15
9 Ina ua uma nei mea, ona ō mai ai lea o perenise iā te aʻu, ma faapea mai: “Ua lē vavaeeseina e le nuu o Isaraelu, o le ʻauositaulaga, ma le ʻau sa Levī i latou lava mai i tagata o isi atunuu ma mea inosia o loo latou faia,+ o tagata Kanana, o tagata Hetī, o tagata Perisē, o tagata Iepusē, o tagata Amonī, o tagata Moapi, o tagata Aikupito,+ ma tagata Amorī.+
2 Ua aumaia e le nuu o Isaraelu nisi o o latou afafine mo i latou ma o latou atalii.+ O lenei ua auaufaatasi i latou le fanau paia,+ ma tagata o na atunuu.+ Ua tausolomua foʻi perenise ma sui pule i lenei gaoioiga lē faamaoni.”
3 Ina ua ou faalogo i lenei mea, ona ou saeia ai lea o loʻu ofu ma loʻu ofu talaloa, ua ou futi foʻi i oʻu lauulu ma laʻu ʻava, ma ua ou nofo pea ma lo‘u teʻi.
4 Ona faapotopoto mai lea iā te aʻu o i latou uma ua matataʻu i* afioga a le Atua o Isaraelu, ona o le lē faamaoni o tagata na ave faapagota, a o oʻu nofo pea ma lo‘u teʻi seʻia oo ina faia le taulaga i meaʻai* i le afiafi.+
5 Ina ua faia le taulaga i meaʻai i le afiafi,+ ona ou tulaʻi lea mai i loʻu māsiasi, ua masae loʻu ofu ma loʻu ofu talaloa, ua ou tootuli ma faaloaloa atu oʻu lima iā Ieova loʻu Atua.
6 Ua ou faapea atu: “Loʻu Atua e, ua ou lagona lava loʻu mā ma loʻu māsiasi e tepa aʻe oʻu mata iā te oe, loʻu Atua e, auā ua tele lava a matou mea sesē ua oo i o matou ulu, ma ua matuā tele foʻi lo matou nofosala ua oo atu lava i le lagi.+
7 Talu mai aso o o matou augātamā seʻia oo mai i le asō, ua matou matuā nofosala lava;+ ma ona o a matou mea sesē, ua tuuina atu ai i matou, o o matou tupu ma o matou ositaulaga, i lima o tupu o nuu, i le pelu,+ i le aveina faapagota,+ i le faoa o a matou mea,+ ma le māsiasi o o matou mata e pei o le aso nei.+
8 O lenei, ua fiafia Ieova lo matou Atua iā i matou mo sina taimi, e ala i le faataga o nisi o i matou ina ia sao mai, ma tuuina mai iā i matou se nofoaga tumau* i lona nofoaga paia+ e faamalamalama ai o matou mata, lo matou Atua e, ma ina ia matou mapu ai mai i le faapologaina.
9 Auā e ui o ni pologa i matou,+ ae ua lē tuua i matou e lo matou Atua i le faapologaina; ae ua ia faalautele mai iā i matou lona alofa faamaoni i luma o tupu o Peresia.+ Ua ia tuuina mai iā i matou se malosi fou ina ia toe fausia ai le fale o lo matou Atua,+ ma ia toe faafoʻisia ona nofoaga ua faatafunaina, ma tuuina mai iā i matou se pā maa* i Iuta ma Ierusalema.
10 “O lenei, lo matou Atua e, o le ā ea sa matou tala o le a fai atu ina ua uma ona e faia o nei mea? Auā ua matou tuua au poloaʻiga,
11 na e poloaʻi mai ai e ala mai i au auauna o perofeta, e faapea, ‘O le laueleele e tou te ō atu i ai e fai mo outou, o le laueleele e lē mamā, ona o le lē mamā o tagata o ia nuu, ma ona o a latou mea inosia o loo faia ua tumu ai le laueleele i lo latou lē mamā, e mai i le tasi pito e oo atu i le isi pito.+
12 O lenei, aua neʻi outou avatu o outou afafine i o latou atalii, aua foʻi neʻi outou talia o latou afafine mo o outou atalii;+ aua foʻi neʻi outou faia se mea e filemu ma saogalemu ai i latou,+ ina ia outou malolosi ma aai i mea lelei o le laueleele, ma ia fai ma tofi mo o outou atalii i aso uma.’
13 Na oo nei mea uma iā i matou ona o mea leaga na matou faia, ma lo matou matuā nofosala, auā o oe lo matou Atua e, e te leʻi faasalaina i matou e tusa ma a matou mea sesē,+ ma na e faatagaina i matou nei ina ia sao mai.+
14 Po o le a matou toe solia ea au poloaʻiga ma faaipoipo atu i tagata e faia nei mea inosia?+ Po o le a e lē matuā toʻatamaʻi ai ea ma faaumatia atoatoa i matou, ma oo ai ina leai se tasi e totoe ma sao mai ai?
15 Ieova e, le Atua o Isaraelu, e amiotonu oe,+ auā ua faatotoeina i matou o se nuu ua faasaoina e oo mai i lenei aso. Ua matou iai i ou luma ona ua matou nofosala, auā e lē mafai ona matou tutū atu i ou luma ona o lenei mea.”+
Faamatalaga Pito i Lalo
^ Epe., “ua gatete i.”
^ Po o “taulaga i fatu.” Tagaʻi i le faamatalaga pito i lalo o le Levitiko 2:1.
^ Epe., “se pine.”
^ Po o “se pā mo le puipuiga.”
