Esoto 16:1-36
16 Ina ua latou tuua Ailima, ua oo atu le faapotopotoga atoa o le fanauga a Isaraelu i le toafa o Sina,+ lea o loo i le vā o Ailima ma Sinai. O le aso lona 15 foʻi lea o le masina lona lua, talu ona latou ō ese mai i le atunuu o Aikupito.
2 Ona muimui lea o le faapotopotoga atoa o le fanauga a Isaraelu iā Mose ma Arona i le toafa.+
3 Ua fai mai pea le fanauga a Isaraelu iā i laʻua: “Maʻimau pe ana matou feoti lava i le aao o Ieova i Aikupito a o matou aai i aano o manu,+ ma matou aai foʻi i falaoa ma maoona ai. A o lenei ua oulua aumaia i matou i lenei toafa ina ia feoti ai lenei faapotopotoga atoa i le oge.”+
4 Ona fetalai mai lea o Ieova iā Mose: “O le a ou faatotō ifo meaʻai mai i le lagi mo outou;+ ia taʻitasi le tagata ma alu e ao mai e tusa ma mea e talafeagai ma ia i aso taʻitasi,+ ina ia ou tofotofoina ai i latou, pe e latou te savavali i laʻu tulafono pe e leai.+
5 A o le aso lona ono,+ pe a latou saunia mea na latou aoina, e ao ona faaluaina mea na latou aoina i isi aso.”+
6 Ua faapea atu Mose ma Arona i le fanauga uma a Isaraelu: “O le afiafipō e tou te iloa ai o Ieova lava na aumaia outou mai i Aikupito.+
7 O le taeao e tou te iloa ai le mamalu o Ieova, auā ua faafofoga Ieova i lo outou muimui atu iā te ia. O ai i maʻua ua outou muimui mai ai iā i maʻua?”
8 Ua toe faapea atu Mose: “I le afiafipō e foaʻi mai e Ieova iā te outou aano o manu e aai ai, a o le taeao e na te foaʻi mai ai falaoa e maoona ai, auā ua faafofoga Ieova i a outou muimuiga, na outou muimui ai iā te ia. O ai i maʻua? E lē o i maʻua ua outou muimui i ai, a o Ieova.”+
9 Ua fai atu Mose iā Arona: “Ia fai atu i le faapotopotoga atoa o le fanauga a Isaraelu, ‘Ia faalatalata mai i luma o Ieova auā ua ia faafofoga i a outou muimuiga.’”+
10 Ina ua faatoʻā uma ona talanoa atu Arona i le faapotopotoga atoa o le fanauga a Isaraelu, ua latou liliu ma faasaga atu i le toafa, faauta foʻi! ua faaali mai le mamalu o Ieova i le ao.+
11 Ua fetalai atili mai Ieova iā Mose e faapea:
12 “Ua ou faalogo i muimuiga a le fanauga a Isaraelu.+ Ia e fai atu iā i latou, ‘E tou te aai i le aano o manu i le afiafipō* a o le taeao e tou te maoona ai i le falaoa;+ ma o le a outou iloa ai o aʻu o Ieova lo outou Atua.’”+
13 Ua oo i le afiafipō, ona oo mai ai lea o salu* ma ufitia ai le togālauapi,+ a o le taeao ua iai le sau i le eleele lea e siʻomia ai le togālauapi.
14 Ina ua mou atu le sau, na iai i luga o le fogāeleele o le toafa ni mea manutinuti,+ e itiiti e pei o le sautoʻa i luga o le eleele.
15 Ina ua vāai i ai le fanauga a Isaraelu, ona latou faapea ane lea o le tasi i le isi, “O le ā lenei mea?” auā ua latou lē iloa po o le ā lea mea. Ua faapea atu Mose iā i latou: “O le meaʻai lea ua foaʻi mai e Ieova iā te outou, e tou te aai ai.+
16 O le mea lenei na poloaʻi mai ai Ieova, ‘Ia taʻitasi le tagata ma ao mai e tusa ma le mea e maʻona ai. Ia outou ave le fua e tusa ma le omera*+ mo tagata taʻitoʻatasi, e tusa ma le aofaʻi o tagata o loo i o outou faleʻie.’”
17 Ua faapena ona faia e le fanauga a Isaraelu; ua latou ao ia mea, ua tele mea e ao e isi ae ua itiiti isi.
18 Ua latou fua e tusa ma le omera, o lē e tele mea ua ia aoina e leai se mea ua totoe, ma lē ua itiiti ana mea ua aoina ua lava lelei.+ Ua latou ao e tusa ma le mea e maʻona ai le tagata.
19 Ona faapea atu lea o Mose iā i latou: “Aua neʻi tuua e se tasi se mea mo le taeao.”+
20 Ae ua latou lē faalogo iā Mose. Ina ua tuu e nisi tagata ni mea mo le taeao, ua tumu i ilo ma elo ai, ona ita ai lea o Mose iā i latou.
21 Ua latou aoina i lea taeao ma lea taeao, e tusa ma le mea e maʻona ai le tagata. A vevela le lā ona liusuāvai ai lea.
22 O le aso lona ono, ua faaluaina meaʻai ua latou aoina,+ e lua omera mo le tagata e toʻatasi. Ona ō mai lea o taʻitaʻi uma o le faapotopotoga ma taʻu mai nei mea iā Mose.
23 Ua ia faapea atu iā i latou: “O le fetalaiga lenei a Ieova. O taeao e matuā mālōlō ai,* o le sapati paia lea iā Ieova.+ Ia tao mea e tou te manana‘o e tao, ia tunu mea e tou te manana‘o e tunu,+ a o mea uma ua totoe ia teu mo outou mo a taeao.”
24 Ona latou teu ai lea o ia mea seʻia oo i le taeao, e pei ona fai atu ai Mose; e leʻi elo lava pe e iai foʻi ni ilo.
25 Ua faapea atu Mose: “Ia aai i lenei meaʻai i le asō, auā o le asō o le sapati lea iā Ieova. E tou te lē maua i le fanua nei mea i le asō.
26 E ono aso e tou te ao ai, ae o le aso lona fitu o le Sapati+ lea, e leai se mea e maua ai.”
27 Peitaʻi, ua ō atu nisi o tagata i le aso lona fitu e ao mai ni mea, ae ua latou lē maua se mea.
28 Ona fetalai mai ai lea o Ieova iā Mose: “O le ā le umi e tou te lē tausia ai aʻu poloaʻiga ma aʻu tulafono?+
29 Ia utagia lenei mea, ua tuuina mai e Ieova le Sapati iā te outou.+ O le mea lea, ua ia foaʻi mai ai iā te outou i le aso lona ono o meaʻai mo aso e lua. Ia nofo le tagata i lona faleʻie; ia aua neʻi alu ese se tasi i le aso lona fitu mai i le mea e nofo ai.”
30 Ona tausia lea e tagata o le Sapati* i le aso lona fitu.+
31 Ua faaigoa e tagata Isaraelu lenei mea o le “manai.”* Ua paʻepaʻe e pei o le fatu o le koriano, o lona tofo e pei o falaoa mafolafola ua iai le meli.+
32 Ua faapea atu Mose: “O le mea lenei na poloaʻi mai ai Ieova, ‘Ia ao le fua e tusa ma le omera o lenei meaʻai ina ia teuina mo o outou tupulaga o loo mulimuli mai,+ ina ia latou vāai ai i le meaʻai na ou fafagaina ai outou i le toafa, ina ua ou aumaia outou mai i Aikupito.’”
33 Ua faapea atu Mose iā Arona: “Ia ave se fagu ma tuu ai le manai e tusa ma le omera, ma tuuina i luma o Ieova ina ia teuina mo o outou tupulaga o loo mulimuli mai.”+
34 E pei ona poloaʻi mai ai Ieova iā Mose, ona ave lea e Arona o lenei mea ma tuu i luma o le atolaau*+ ina ia teu ai.
35 Na aai le fanauga a Isaraelu i le manai mo tausaga e 40,+ seʻia oo ina latou taunuu i le laueleele ua ʻainā.+ Na latou aai i le manai seʻia oo ina latou taunuu i le tuaoi o le atunuu o Kanana.+
36 O le omera o le tasi vaesefulu o le efa.*
Faamatalaga Pito i Lalo
^ Epe., “le vā o afiafi e lua.”
^ O se tamaʻi manulele peti e tusa ma le 18 senitimita lona umi. E lelei mo le tausami.
^ Po o “o le sauniga o le sapati.”
^ Po o le “Ona mālōlō lea o tagata.”
^ E foliga e maua mai i le faaupuga Eperu “O le ā lenei mea?”
^ Epe., “Molimau.” E foliga mai o se pusa na teu ai pepa tāua.
