Esoto 18:1-27
18 Ua faalogo Ietero le ositaulaga o Mitiana, le tamā o le avā a Mose,+ e uiga i mea uma na faia e le Atua iā Mose ma lona nuu o Isaraelu, ma le laveaʻiina e Ieova o Isaraelu mai i Aikupito.+
2 Ua tausia e Ietero le tamā o le avā a Mose, o Sepora le avā a Mose, o lē na toe faafoʻi mai e Mose,
3 ma lana fanau tama e toʻalua.+ O le igoa o le tasi o Keresoma,*+ auā na faapea mai Mose, “Ua ou aumau o se tagata ese i se nuu ese,”
4 a o le igoa o le isi o Elisara,* auā na ia faapea mai, “O le Atua o loʻu tamā o loʻu fesoasoani lea, o lē na laveaʻiina aʻu mai i le pelu a Farao.”+
5 Ona ō lea o Ietero, le tamā o le avā a Mose, atoa ma atalii o Mose ma lana avā, ua ō ane iā Mose i le toafa i le mea o tolauapi ai i le mauga o le Atua moni.+
6 Ua ia avatu le feʻau iā Mose: “O aʻu o Ietero, le tamā o lau avā,+ ua ou sau iā te oe faatasi ma lau avā ma lana fanau tama e toʻalua.”
7 Ona alu atu loa lea o Mose e faafeiloaʻi le tamā o lana avā, ua ifo i le eleele ma sogi atu iā te ia. Ua fesili le tasi i le isi po o ā mai, ona ō ane ai lea i le faleʻie.
8 Ua faamatala atu e Mose i le tamā o lana avā mea uma na faia e Ieova iā Farao ma Aikupito ona o le fanauga a Isaraelu,+ ma faafitauli uma na oo iā i latou i le malaga,+ ma le auala na laveaʻiina ai e Ieova i latou.
9 Ua fiafia Ietero ona o mea lelei uma na faia e Ieova mo Isaraelu, e ala i le laveaʻiina o i latou mai i Aikupito.*
10 Ona fai mai lea o Ietero: “Ia viia Ieova, o lē na laveaʻiina outou mai i Aikupito ma Farao, o lē na laveaʻiina le nuu mai i le pule sauā a Aikupito.
11 Ua ou iloa nei e silisili Ieova nai lo o isi atua uma,+ ona o le mea na ia faia iā i latou na gaoioi ma le faamaualuga i ona tagata.”
12 Ua aumaia e Ietero, le tamā o le avā a Mose se taulaga mū ma taulaga e ofoina atu i le Atua, ona ō ane lea o Arona ma toeaina uma o Isaraelu, ua aai faatasi ma le tamā o le avā a Mose i luma o le Atua moni.
13 I le aso na sosoo ai, ona nofo lea o Mose e pei ona masani ai e fai ma faamasino mo le nuu, ua laulaututū pea le nuu i luma o Mose mai i le taeao seʻia oo i le afiafi.
14 Ua vaaia e le tamā o le avā a Mose mea uma ua ia faia mo le nuu. Ona fai mai ai lea o ia: “O le ā lenei mea ua e faia mo le nuu? Aiseā ua e nofo toʻatasi ai e faia faamasinoga, a o laulaututū le nuu atoa i ou luma mai i le taeao seʻia oo i le afiafi?”
15 Ae ua fai atu Mose i le tamā o lana avā: “Ona e ō mai pea le nuu iā te aʻu ina ia fesili atu i le Atua.
16 Pe a tulaʻi mai se mataupu, e latou te ō mai iā te a‘u ma e ao ona ou faamasino po o ai e saʻo, ma ou faailoa atu faaiʻuga a le Atua moni ma ana tulafono.”+
17 Ua faapea mai le tamā o le avā a Mose: “E lē o le auala sili lea e taulima ai.
18 E mautinoa e tou te lē lavavā ai, o oe, atoa ma lenei nuu ua outou faatasi, ona e telē tele le avega o loo e amoina, ma e lē mafai ona e tauaveina na o oe.
19 O lenei, ia e faalogo mai iā te a‘u. Ou te fautua atu iā te oe, ma e faatasi le Atua ma oe.+ E avea oe ma sui o tagata i luma o le Atua moni,+ ma e te faaalia nei mataupu i luma o le Atua moni.+
20 E ao ona e lapataʻia i latou e faatatau i poloaʻiga ma tulafono,+ ma ia e faailoa atu iā i latou le ala e ao ona savavali ai, ma le galuega e ao ona latou faia.
21 Ae ia e filifilia mai i le nuu o ni tane agavaa+ e matataʻu i le Atua, o ni tane e maufaatuatuaina, e ‘ino‘ino i le mauaina o tupe i faiga lē tonu;+ ma ia e tofia i latou e avea ma taʻitaʻi o le ta‘itoʻaafe, o taʻitaʻi o le ta‘itoʻaselau, o taʻitaʻi o le ta‘itoʻalima sefulu, ma taʻitaʻi o le ta‘itoʻasefulu.+
22 E ao ona latou faamasinoina tagata pe a tula‘i mai ni mataupu,* ma e latou te aumaia mataupu faigatā uma iā te oe,+ a o mataupu lāiti uma e latou te faamasinoina. Ia faamāmā lau avega e ala i lo latou fesoasoani iā te oe e tauave le avega.+
23 Afai e te faia faapea, ma pe a tusa lea ma le poloa‘iga a le Atua iā te oe, e mautinoa e te gafatia le galuega, ma e ō atu foʻi tagata i le mea e nonofo ai ma le filemu.”
24 Ona faalogo loa lea o Mose i le tamā o lana avā, ma faia mea uma na ia fai atu ai.
25 Ua filifilia e Mose o tane agavaa mai i Isaraelu uma, ua ia tofia i latou e avea ma taʻitaʻi i le nuu, o taʻitaʻi o le ta‘itoʻaafe, o taʻitaʻi o le ta‘itoʻaselau, o taʻitaʻi o le ta‘itoʻalima sefulu, ma taʻitaʻi o le ta‘itoʻasefulu.
26 Ua latou faamasinoina le nuu pe a tula‘i mai ni mataupu. E latou te aumaia mataupu faigatā iā Mose,+ a o mataupu lāiti uma e latou te faamasinoina.
27 Ua mavae lea, ona faamavae lea o Mose i le tamā o lana avā,+ ma ua toe foʻi atu o ia i lona atunuu.
Faamatalaga Pito i Lalo
^ Lona uiga “O le Tagata Ese e Aumau i Inā.”
^ Lona uiga “O Loʻu Atua o le Fesoasoani Lea.”
^ Epe., “mai i le lima o Aikupito.”
^ Epe., “i taimi uma.”
