Esoto 20:1-26
20 Ona fetalai mai lea o le Atua i nei upu uma:+
2 “O aʻu o Ieova lou Atua, o lē na aveesea oe mai i le atunuu o Aikupito, o le mea na e nofo pologa ai.+
3 Aua neʻi e fai mo oe nisi atua e ese mai iā te aʻu.*+
4 “Aua neʻi e faia se tupua ua tā po o se faatusa o se mea o i le lagi i lugā, po o se mea i lalo nei i le laueleele, po o se mea i le vai i lalo o le laueleele.+
5 Aua e te ifo i ai pe auauna i ai,+ auā o aʻu o Ieova lou Atua, o le Atua e manaʻo e tapuaʻi mai e tau lava o aʻu,+ o lē na te faasalaina atalii ona o mea sesē a o latou tamā, e oo i le tupulaga e tolu ma le fā, o i latou o ē e ʻinoʻino mai iā te aʻu,
6 ae ou te faaalia le alofa faamaoni i afe o tupulaga, o ē e alolofa mai iā te aʻu ma tausi i aʻu poloaʻiga.+
7 “Aua e te faaaogā ma le lē tatau le suafa o Ieova lou Atua,+ auā e lē faasaoina e Ieova mai i le faasalaga, o lē e faaaogā ma le lē tatau Lona suafa.+
8 “Ia manatua le aso Sapati ina ia faapaiaina pea.+
9 Ia e galue ma faia au galuega uma i aso e ono,+
10 ae o le aso lona fitu, o le sapati lea iā Ieova lou Atua. Aua e te faia ai se galuega, o oe, o lou atalii, ma lou afafine, o lau tane pologa, ma lau teine pologa, o au manu lalata foʻi, ma le tagata ese o loo aumau i le aai* o loo e nofo ai.+
11 Auā na faia e Ieova i aso e ono o le lagi ma le lalolagi, o le sami, ma mea uma o loo iai, ona amata ai lea ona mālōlō o ia i le aso lona fitu.+ O le mea lea na faamanuia ai e Ieova le aso Sapati ma faapaiaina.
12 “Ia e āva i lou tamā ma lou tinā+ ina ia faaumiumi ai ou aso i le laueleele o le a foaʻi atu e Ieova lou Atua iā te oe.+
13 “Aua e te fasioti tagata.+
14 “Aua e te mulilua.+
15 “Aua e te gaoi.+
16 “Aua e te molimau pepelo pe a e molimau faasaga i lou tuaoi.+
17 “Aua e te manaʻo i le fale o lou tuaoi. Aua foʻi e te manaʻo i le avā a lou tuaoi,+ o lana tane pologa, o lana teine pologa, o lana povi poʻa, o lana asini, po o se isi lava mea a lou tuaoi.”+
18 Ua faalogo le nuu uma i faititili ma le taalili o le pū, ua latou vaaia foʻi le emo o uila ma le asu mai i le mauga; ua latou iloa atu nei mea ona latou gatete ai lea ma tutū mamao atu.+
19 Ua latou faapea mai iā Mose: “Ia e tautala mai iā i matou a o matou faalogo atu, ae aua le fetalai mai le Atua iā i matou neʻi o matou feoti.”+
20 Ua faapea atu Mose i le nuu: “Aua tou te fefefe, auā ua afio mai le Atua moni e tofotofoina outou,+ ina ia faaauau ona outou matataʻu iā te ia ma outou lē agasala ai.”+
21 Ua tutū mamao pea le nuu, a o faalatalata atu Mose i le ao pogisa lea o loo iai le Atua moni.+
22 Ua toe fetalai mai Ieova iā Mose: “O le mea lenei e te fai atu ai i le fanauga a Isaraelu, ‘Ua outou iloa, na ou tautala atu iā te outou mai i le lagi.+
23 Aua neʻi outou faia ni atua siliva e tapua‘i i ai e faaopoopo mai iā te a‘u, aua foʻi tou te faia ni atua auro mo outou.+
24 Ia e faia mo aʻu se fata faitaulaga mai i le eleele, ina ia e fai ai taulaga, o taulaga mū, o taulaga faifaatasi,* o lau lafu mamoe, ma au lafumanu. Ou te alu atu iā te oe ma faamanuia atu iā te oe i mea uma ou te filifilia ina ia manatua ai loʻu igoa.+
25 Afai foʻi e te faia se fata faitaulaga i maa mo aʻu, aua e te faia i maa ua vaneina i meafaigaluega.+ Auā pe a e vaneina i le tofi, ona e faaleagaina ai lea o le fata faitaulaga.
26 Aua fo‘i neʻi e alu a‘e i ni faasitepu i loʻu fata faitaulaga, ina neʻi iloa atu ou totogasā.’*
Faamatalaga Pito i Lalo
^ Po o le “e tetee mai iā te aʻu.” Epe., “e faasagatau mai i oʻu foliga.”
^ Epe., “i faitotoʻa.”
^ Po o “taulaga o le filemu.”
^ Epe., “lou lē lavalavā.”
