Esoto 24:1-18
24 Ua ia fetalai mai iā Mose: “Ia ō a‘e iā Ieova, o oe, o Arona, o Natapu, o Aviu,+ ma toeaina e toʻa 70 o Isaraelu, ma ia outou ifo mai i se mea mamao.
2 E ao iā Mose ona faalatalata atu na o ia iā Ieova; ae aua neʻi faalatalata atu isi, ma e lē tatau foʻi ona ō aʻe le nuu faatasi ma ia.”+
3 Ua sau Mose ma faamatala atu i le nuu afioga uma a Ieova ma iʻuga o faamasinoga uma,+ ona tali mai lea o tagata uma ma le leo e tasi: “O upu uma ua fetalai mai ai Ieova, ua matou malilie e fai.”+
4 Ua tusia e Mose afioga uma a Ieova.+ Ona usupō lea o ia i le taeao, ma fausia se fata faitaulaga i le auvae mauga, ma ni maa faamanatu se 12 mo ituaiga e 12 o Isaraelu.
5 Ua mavae lea, ona ia aauina atu lea o tauleleʻa Isaraelu, ua latou faia taulaga mū ma taulaga i povi poʻa, o taulaga faifaatasi+ ia iā Ieova.
6 Ua ave e Mose le ʻafa o le toto ma tuu i ipu faaofuofu, ae ua ia sausau le fata faitaulaga i le isi ʻafa o le toto.
7 Ua ia ave le tusi o le feagaiga ma faitau leotele atu i le nuu.+ Ona latou faapea mai lea: “O mea uma ua fetalai mai ai Ieova, e matou te malilie e fai ma usiusitaʻi i ai.”+
8 Ona ave lea e Mose o le toto ma sausau ai le nuu+ ma faapea atu: “O le toto lenei o le feagaiga ua osia e Ieova ma outou e tusa ai ma upu uma ua outou faalogo i ai.”+
9 Ona ō aʻe lea o Mose, o Arona, o Natapu, o Aviu, ma toeaina e toʻa 70 o Isaraelu,
10 ma ua latou iloa atu le Atua o Isaraelu.+ Ua i lalo o ona aao se mea e pei o se paepae ua faia i maa safaira, ma ua mamā foʻi e pei o le lagi.+
11 E na te leʻi faasalaina tane iloga o Isaraelu,+ ma ua latou vaaia se faaaliga a le Atua moni, ma ua aai ma feinu.
12 Ua fetalai mai Ieova iā Mose: “Ia e sau iā te aʻu i le mauga ma e nofo ai. Ou te tuu atu iā te oe papamaa o loo iai le tulafono, ma le poloaʻiga ua uma ona ou tusia ina ia aʻoaʻo ai i latou.”+
13 Ua tulaʻi Mose ma Iosua lana auauna,+ ma ua alu aʻe Mose i le mauga o le Atua moni.+
14 Ae ua fai atu Mose i toeaina: “Ia outou faatali atu i nei mo i maʻua seʻia ma toe foʻi mai iā te outou.+ O loo iā te outou Arona ma Huro.+ O se tasi e iai sana mataupu e faamasinoina, ia alu atu iā i laʻua.”+
15 Ona alu aʻe lea o Mose i le mauga a o ufitia le mauga i le ao.+
16 Ua iai pea le mamalu o Ieova+ i le mauga o Sinai,+ ma ua ufitia le mauga i le ao mo aso e ono. Ae i le aso lona fitu, ua ia valaau atu ai iā Mose mai i le ao.
17 Ua pei le mamalu o Ieova o se afi mumū i luga o le tumutumu o le mauga i le vaai a le fanauga a Isaraelu.
18 Ua ulu atu Mose i totonu o le ao ma alu aʻe i le mauga.+ Ua nofo pea Mose i le mauga mo ao e 40 ma pō e 40.+
