Esoto 25:1-40
25 Ua fetalai mai Ieova iā Mose:
2 “Ia e fai atu i le nuu o Isaraelu, ia latou aumaia ni foaʻi mo aʻu; ia taʻitasi tagata uma ma foaʻi e tusa ma le mea ua manatu i ai lona loto, ma ia outou aumaia ia foaʻi mo aʻu.+
3 O foaʻi nei ia outou talia mai iā i latou: o auro,+ o siliva,+ o ʻapamemea,+
4 o filo lanu moana, o fulufulu mamoe lanu violē,* o mea ua vali mūmū sesega, o ʻie lino lelei, o fulufulu ʻoti,
5 o paʻu o mamoe poʻa ua vali mūmū, o paʻu o takesa,* o laau o le setima,+
6 o le suāuu mo molī,+ o le suāuu pasama e faauu ai+ ma fai ai le mea manogi lelei e mū,+
7 o maa soama, ma isi maa e teuteu ai le efota+ ma le ufifatafata.+
8 E ao ona latou faia se faleʻie paia mo aʻu, ma ou te nofo* faatasi ma i latou.+
9 Ia outou faia le faleʻie paia ma mea uma o le a iai, ia mulimulituʻi i le ata ua ou faaali atu iā te oe.+
10 “Ia latou faia se atolaau* mai i laau o le setima, e lua ma le ʻafa kupita* lona umi, e kupita ma le ʻafa lona lautele, ma le kupita ma le ʻafa lona maualuga.+
11 Ia e ufiufi i le auro māoʻi.+ Ia e ufiufi ai totonu ma fafo ma e faia se teuteu auro e faataamilo ai.+
12 Ia e tunu ma fai ai ni mama auro se fā mo le Atolaau ma tuu i luga aʻe o ona vae e fā, e lua mama i le tasi itu ma mama e lua i le isi itu.
13 Ia e fai amo i laau o le setima ma ufiufi ai i le auro.+
14 Ia e sulu amo i totonu o mama o loo i itu o le Atolaau ina ia mafai ai ona amo le Atolaau.
15 E ao ona tuu ai pea amo i mama o le Atolaau; e lē tatau ona aveeseina.+
16 E ao ona tuu i totonu o le Atolaau le Molimau* ou te avatu iā te oe.+
17 “E ao ona e faia se ufiufi i le auro māoʻi, e lua ma le ʻafa kupita lona umi ma le kupita ma le ʻafa lona lautele.+
18 E ao ona e faia ni kerupi auro se lua; ia e fausia i auro e ala i le faaaogāina o le samala ma tuu i pito e lua o le ufiufi o le atolaau.+
19 Ia faia kerupi i luga o le ufiufi i ona pito e lua, o le tasi kerupi i le tasi pito ma le isi kerupi i le isi pito.
20 E ao ona fālō i luga o la apaʻau e lua, ma faamalumalu i le ufiufi o le Atolaau i o la apaʻau,+ ma ia la faafesagaʻi. Ia faasasaga i lalo mata o kerupi i le ufiufi.
21 Ia e tuu le ufiufi+ i luga o le Atolaau, ma ia e tuu i totonu o le Atolaau le Molimau* ou te avatu iā te oe.
22 Ou te faaali atu aʻu iā te oe i inā ma ou te tautala atu iā te oe mai i luga o le ufiufi o le atolaau.+ E mai i le vā o kerupi e lua o loo i luga o le atolaau o le feagaiga,* ou te faailoa atu iā te oe o mea uma ou te poloaʻi atu ai mo le fanauga a Isaraelu.
23 “E ao ona e faia se laulau+ i laau o le setima, e lua kupita lona umi, e kupita lona lautele ma e kupita ma le ʻafa lona maualuga.+
24 E ao ona e ufiufi i le auro māoʻi ma faia ni ona teuteu auro e faataamilo ai.
25 Ia e faia se laupapa e tusa lona lautele ma le lautele o le alofilima* e faataamilo i autafa o le laulau, ma se teuteu auro e faataamilo i le laupapa.
26 E ao ona e faia ni mama auro se fā ma tuu i tulimanu e fā, lea e pipii ai vae e fā o le laulau.
27 E ao ona latalata mama i le laupapa e soo ai, e fai ma lagolago i amo e amo ai le laulau.
28 E ao ona e faia amo mai i laau o le setima ma ufiufi ai i le auro, ma ia amo ai le laulau.
29 “E ao ona e faia ona ipu mafolafola, o ipu, o fagu, ma ipu faaofuofu e latou te faaaogā e liligi ai taulaga o meainu. Ia e faia na mea i le auro māoʻi.+
30 E ao foʻi ona e tuu i luga o le laulau o le falaoa e laulauina i luma, ma ia lē aunoa ona e faia faapea i oʻu luma.+
31 “E ao ona e faia se tuugāmolī+ i le auro māoʻi. Ia faia le tuugāmolī i le auro e ala i le faaaogāina o le samala. E ao ona iai lona ʻau, o ona lālā, o ona ipu, o ona pona, ma ona fuga, ma e fesootaʻi ona vaega uma.+
32 E ono lālā e falala mai i le ʻau o le tuugāmolī, e tolu lālā i le tasi itu ma le isi tolu lālā i le isi itu.
33 E tolu ipu e foliga e pei o ni fugālaau o le sekati i le lālā e tasi, e sosoo ona pona ma ona fuga, ma o le isi lālā e iai ipu e tolu e foliga e pei o ni fugālaau o le sekati, e sosoo ona pona ma ona fuga. O le auala lenei e falala mai ai lālā e ono mai i le ‘au o le tuugāmolī.
34 O le ʻau o le tuugāmolī e iai ipu e fā e foliga e pei o ni fugālaau o le sekati, e sosoo ona pona ma ona fuga.
35 E iai le pona i lalo o ulua‘i lālā e lua e falala mai i le ‘au, ma le isi pona i lalo o isi lālā e lua e sosoo ai, ma le isi pona i lalo o isi lālā e lua e sosoo ai, auā o ia lālā e ono e falala mai i le ‘au o le tuugāmolī.
36 O pona ma lālā ma le tuugāmolī atoa, e faia uma i le auro māoʻi e tasi e ala i le faaaogāina o le samala.+
37 E ao ona e faia ni molī se fitu mo le tuugāmolī, ma pe a tutu molī, e malamalama ai mea i ona luma.+
38 E faia foʻi i le auro māoʻi ona iofi ma ona salefu.*+
39 E ao ona faia le tuugāmolī ma mea e faaaogā ai mai i le taleni* o le auro māoʻi.
40 Ia faamautinoa ua e faia e tusa ma le ata sa faaali atu iā te oe i le mauga.+
Faamatalaga Pito i Lalo
^ Po o le “ua vali violē.”
^ Atonu e faasino atu le upu Eperu i se manu o le sami lea e taʻua i le faa-Peretania o le seal.
^ Po o le “ma e faatū loʻu faleʻie.”
^ Po o le “pusa.”
^ E faasino atu i papamaa o loo iai Tulafono e Sefulu.
^ E faasino atu i papamaa o loo iai Tulafono e Sefulu.
^ Epe., “atolaau o le Molimau.”
^ O se mea e pei o se tamaʻi suō e aveese ai malala mai i le afi.
