Esoto 3:1-22
3 Ua fai Mose ma leoleo mamoe o le lafu a le tamā o lana avā, o Ietero+ le ositaulaga i Mitiana. A o ia taʻitaʻiina atu le lafu i le itu i sisifo o le toafa,* ona ia oo atu lea i le mauga o le Atua moni, e taʻua o Horepa.+
2 Ona faaali mai lea o le agelu a Ieova iā te ia i se afi mumū i le laau tuitui.+ A o ia vaavaai atu pea, faauta, o loo mumū pea le laau tuitui ae e lē o liu efuefu.
3 Ua faapea ifo Mose: “Seʻi oʻu afe ane ou te matamata i lenei mea uigaese, pe aiseā ua lē liu efuefu ai le laau tuitui.”
4 Ua silasila mai Ieova ua ia afe ane e matamata i ai, ona valaau mai lea o le Atua iā te ia mai i le laau tuitui ma fetalai mai: “Mose! Mose e!” ua ia tali atu: “O aʻu lenei.”
5 Ona ia fetalai mai lea: “Aua e te sōsō mai i inei. Ia aveese ou seevae mai i ou vae, auā e paia le eleele o loo e tū ai.”
6 Ua ia toe fetalai mai: “O aʻu o le Atua o lou tamā, le Atua o Aperaamo,+ le Atua o Isaako,+ ma le Atua o Iakopo.”+ Ona pupuni lea e Mose o ona mata, auā ua fefe o ia e vaai atu i le Atua moni.
7 Ua fetalai mai Ieova: “Ua ou iloa lava le sauāina o loʻu nuu o loo i Aikupito, ma ua ou faalogo i lo latou ōi ona o ē e faamalosia i latou e faia galuega; ua ou iloa lelei puapuaga o loo mafatia ai i latou.+
8 Ou te alu ifo e laveaʻi iā i latou mai i lima o tagata Aikupito+ ma aumai i latou mai i lenā atunuu ae avatu i se atunuu e lelei ma telē, i le laueleele o loo tafe ai le suāsusu ma le meli,+ i le mea o loo nonofo ai le ʻau Kanana, o le ʻau Hetī, o le ʻau Amorī, o le ʻau Perisē, o le ʻau Hivī, ma le ʻau Iepusē.+
9 Faauta! ua oo mai iā te aʻu le alaga o le fanauga a Isaraelu, ma ua ou iloa sauāga o loo faasauā+ ai tagata Aikupito iā i latou.
10 O lea, inā sau ia, ou te auina atu oe iā Farao, ma o le a e aumaia loʻu nuu o le fanauga a Isaraelu mai i Aikupito.”+
11 Peitaʻi ua fai atu Mose i le Atua moni: “O ai aʻu ou te alu atu ai iā Farao ma ou aumai le fanauga a Isaraelu mai i Aikupito?”
12 Ona ia fetalai mai lea: “Ou te faatasi ma oe,+ ma o le faailoga lenei e te iloa ai o aʻu na auina atu oe: Pe a mavae lou aumaia o le nuu mai i Aikupito, ona outou auauna* ai lea i le Atua moni i lenei mauga.”+
13 Ae ua faapea atu Mose i le Atua moni: “Ae faapefea pe a ou alu atu i le fanauga a Isaraelu ma ou faapea atu iā i latou, ‘O le Atua o o outou augātamā na auina mai aʻu iā te outou,’ ae latou te faapea mai iā te aʻu, ‘O ai lona suafa?’+ O le ā la laʻu tala e fai atu iā i latou?”
14 Ua fetalai mai le Atua iā Mose: “E Avea Aʻu ma Lē Ou te Loto i Ai.”*+ Ua ia toe fetalai mai: “Ia faapenei ona e fai atu i le fanauga a Isaraelu, ‘E Avea Aʻu ma Lē Ou te Loto i Ai, o ia lea na auina mai aʻu iā te outou.’”+
15 Ua toe fetalai mai le Atua iā Mose:
“Ia faapenei ona e fai atu i le fanauga a Isaraelu, ‘Ua auina mai aʻu iā te outou e Ieova le Atua o o outou augātamā, le Atua o Aperaamo,+ le Atua o Isaako,+ ma le Atua o Iakopo.’+ O loʻu igoa lenā e faavavau,+ e manatua ai aʻu i lea tupulaga ma lea tupulaga.
16 Ia e alu ma faapotopoto toeaina o Isaraelu, ma e fai atu iā i latou, ‘Na faaali mai iā te aʻu Ieova le Atua o o outou augātamā, o le Atua o Aperaamo, o Isaako ma Iakopo, ma faapea mai: “Ou te matuā uaʻi atu iā te outou,+ ma mea ua faia iā te outou i Aikupito.
17 O lea ua ou faapea atu ai, ou te aveesea outou mai i le mea na sauāina+ ai outou e tagata Aikupito, ma avatu i le laueleele o le ʻau Kanana, o le ʻau Hetī, o le ʻau Amorī,+ o le ʻau Perisē, o le ʻau Hivī, ma le ʻau Iepusē,+ o le laueleele lea e tafe ai le suāsusu ma le meli.”’+
18 “E latou te faalogo i lou leo,+ ma e tou te ō, o oe ma toeaina o Isaraelu i le tupu o Aikupito, ma outou fai atu iā te ia: ‘Na faaali mai Ieova le Atua o tagata Eperu+ iā i matou. O lea, faamolemole se‘i o matou ō i se malaga e tusa ma le tolu aso i le toafa, ina ia matou faia ai taulaga iā Ieova lo matou Atua.’+
19 Ae ua ou iloa lelei, e lē tuuina e le tupu o Aikupito outou e ō seʻiloga e faamalosia o ia+ e se lima malosi.
20 O lea, ou te faaoo atu loʻu lima ma taia ai Aikupito i aʻu gaoioiga mamana uma ou te faaoo i ai; a mavae lea ona ia aauina atu lea o outou.+
21 Ou te faagaeeina le fiafia i loto o tagata Aikupito i lenei nuu, ma pe a outou ō, e lē savalivali fua+ se tasi.
22 E taʻitasi le fafine ma talosaga atu i lona tuaoi, ma le fafine ua nofo i lona fale mo mea siliva, o mea auro ma ofu e faaofu ai o outou atalii ma afafine; ma e tou te faamativaina ai tagata Aikupito.”+
