Esoto 4:1-31
4 Peitaʻi, ua tali atu Mose: “Ae faapefea pe afai latou te lē talitonu iā te aʻu ma lē faalogo i loʻu leo?+ Auā latou te faapea mai nei, ‘E leʻi faaali atu Ieova iā te oe.’”
2 Ua fetalai mai Ieova iā te ia: “O le ā lenā mea o loo i lou lima?” Ua ia tali atu: “O le tootoo.”
3 Ona ia fetalai mai lea: “Ia togi i le eleele.” Ua ia togi le tootoo i le eleele ona liu gata+ ai lea; ona oso ese ai lea o Mose.
4 Ua fetalai mai Ieova iā Mose: “Ia aapa atu lou lima ma tago i lona siʻusiʻu.” Ua aapa atu lona lima ma uu lona siʻusiʻu, ona toe liu tootoo ai lea i lona lima.
5 Ona fetalai mai lea o le Atua: “Ia faia faapea, ina ia latou talitonu ai na faaali atu iā te oe+ Ieova le Atua o o latou augātamā, le Atua o Aperaamo, le Atua o Isaako, ma le Atua o Iakopo.”+
6 Ua toe fetalai mai Ieova iā te ia: “Faamolemole ia tuu lou lima i totonu o le gauga i le fatafata o lou ofu.” Ona tuu lea o lona lima i totonu o le gauga o lona ofu. Ina ua seʻi mai i fafo lona lima, faauta, ua lepela lona lima e pei o le kiona!+
7 Ona ia fetalai mai lea: “Ia toe tuu lou lima i le gauga o lou ofu.” Ona ia toe tuu lea o lona lima i le gauga o lona ofu. Ina ua seʻi mai lona lima, ua toe lelei e pei o lona tino!
8 Ua ia fetalai mai: “Pe a faapea e latou te lē talitonu iā te oe ma e lē uaʻi atu i le faailoga muamua, e mautinoa lava o le a latou talitonu i le faailoga+ e sosoo ai.
9 Ae pe afai e latou te lē talitonu foʻi i ia faailoga e lua ma e lē faalogo i lou leo, ona e asu ane lea o ni vai mai i le vaitafe o le Naila ma sasaa i le eleele mātūtū; o le vai e te asuina mai i le vaitafe o le Naila o le a liutoto lava i luga o le eleele mātūtū.”+
10 Ona fai atu lea o Mose iā Ieova: “Faamolemole Ieova e, e lē o aʻu o se failauga agavaa talu mai le taimi ua te‘a, pe talu mai foʻi ona e fetalai mai i lau auauna, auā e lē lelei saʻu failauga.”*+
11 Ona fetalai mai lea o Ieova iā te ia: “O ai na faia le gutu o le tagata, po o ai foʻi na faia o ē e gūgū, o ē e tutuli, o ē e lelei le vaai, po o ē ua pō le vaai? Pe e lē o aʻu ea o Ieova na faia ia mea?
12 O lea, inā alu ia, ou te fesoasoani iā te oe pe a e tautala,* ma aʻoaʻo atu foʻi iā te oe i upu e te tautala ai.”+
13 Peita‘i ua fai atu o ia: “Ieova e, ou te faamālūlū atu, faamolemole ia e auina atu se tasi o lē ua e finagalo i ai.”
14 Ona matuā toʻasā lea o Ieova iā Mose ma fetalai mai: “Ae faapefea lou uso o Arona+ le sa Levī? Ou te iloa e lelei lava lana failauga. O loo sau o ia e faafeiloaʻi iā te oe. Pe a vaai mai o ia iā te oe, e fiafia ai lona loto.+
15 Ia e tautala atu iā te ia ma tuu atu ia upu i lona gutu;+ ou te faatasi ma oulua pe a lua tautatala atu,+ ou te aʻoaʻo foʻi iā te oulua i mea lua te faia.
16 E tautala atu o ia i le nuu e fai ma ou sui; e avea o ia ma fofoga taumomoli mo oe, ma e fai oe ma sui o le Atua iā te ia.+
17 E te ave lenei tootoo i lou lima ina ia e faia ai faailoga.”+
18 Ona toe fo‘i lea o Mose iā Ietero le tamā o lana avā+ ma faapea atu: “Faamolemole, ua ou fia alu ma toe foʻi i oʻu uso i Aikupito ina ia ou iloa ai po o feola pea i latou.” Ua tali mai Ietero iā Mose: “Ua lelei, inā alu ia ma le filemu.”
19 Ona fetalai mai lea o Ieova iā Mose i Mitiana: “Ia e foʻi atu i Aikupito auā ua feoti+ uma tagata na fia fasioti iā te oe.”
20 Ua faatiʻetiʻe e Mose lana avā ma ona atalii i le asini ma toe foʻi o ia i Aikupito. Ua ave foʻi e Mose le tootoo o le Atua moni i lona lima.
21 Ua toe fetalai mai Ieova iā Mose: “Pe a e toe foʻi atu i Aikupito, ia e faia vavega uma ua ou tuuina atu iā te oe le mana e faia ai+ i luma o Farao. A o aʻu ou te tuu ai pea o ia i lona lotomaaa,+ ma na te lē tuuina atu le nuu e ō.+
22 Ia e fai atu iā Farao, ‘O le mea lenei na fetalai mai ai Ieova: “O Isaraelu o loʻu atalii, o laʻu ulumatua.+
23 Ou te fai atu iā te oe, Ia tuu mai loʻu atalii ina ia auauna iā te aʻu. Pe a e musu e tuu mai o ia ona ou fasiotia lea o lou atalii, o lau ulumatua.”’”+
24 Ua i le ala o ia i le mea e api ai, ua fetaiaʻi Ieova+ ma ia ma ua saʻili e ia se auala e fasiotia ai o ia.*+
25 Mulimuli ane, ua tago Sepora+ i se maa e maʻai ona pito ma peritome ai lana tama, ona lafo atu lea o le pa‘u o lona tino i ona vae ma faapea atu: “Ua avea oe o se alii faaipoipo iā te aʻu e ala i lenei toto.”
26 Ua Ia faamamulu o ia. Ua faapea atu Sepora, ‘o se alii faaipoipo e ala i lenei toto,’ ona o le peritomega.
27 Ua fetalai mai Ieova iā Arona: “Ia e alu e faafetaui Mose+ i le toafa.” Ona alu lea o ia ma ua la fetaui i le mauga o le Atua moni+ ma sogi atu iā te ia.
28 Ona faamatala atu lea e Mose iā Arona o afioga uma a Ieova, o lē na auina mai o ia,+ ma faailoga uma na poloaʻi mai iā te ia e fai.+
29 Ua mavae lea, ona ō lea o Mose ma Arona ua la faapotopotoina toeaina uma o le fanauga a Isaraelu.+
30 Ua faamatala atu e Arona upu uma na fetalai mai ai Ieova iā Mose, ma ua ia faia faailoga+ a o vāai i ai le nuu.
31 Ona talitonu+ ai lea o le nuu. Ina ua latou faalogo ua liuliualo mai Ieova i le fanauga a Isaraelu,+ ma ua ia silafia le sauāina+ o i latou, ona latou punonou lea ma faapaʻuʻū faō.
Faamatalaga Pito i Lalo
^ Epe., “e mamafa le gutu ma mamafa le laulaufaiva.”
^ Epe., “ou te faatasi ma lou gutu.”
^ Atonu e faasino atu i le atalii o Mose.
