Esoto 40:1-38
40 Ona fetalai mai lea o Ieova iā Mose:
2 “O le ulua‘i aso o le masina muamua, e te faatū ai le faleʻie paia, o le fale‘ie lea o le feiloaʻiga.+
3 Ia e tuu le atolaau o le feagaiga* i totonu,+ ma tautau le ʻie puipui e taofia ai le ō atu i le Atolaau.+
4 E te avane foʻi i inā le laulau+ ma tuu ai mea e ao ona iai, e te avane le tuugāmolī+ ma tutu ona molī.+
5 Ona e tuu lea o le fata faitaulaga auro e faamū ai mea manogi+ i luma o le atolaau o le feagaiga,* ma tautau le ʻie pupuni i le faitotoʻa o le faleʻie paia.+
6 “E te tuu le fata faitaulaga e fai ai taulaga mū,+ i luma o le faitotoʻa o le faleʻie paia, o le faleʻie lea o le feiloaʻiga,
7 ma ia tuu le faatanoa i le vā o le faleʻie o le feiloaʻiga ma le fata faitaulaga ma sasaa i ai ni vai.+
8 E te faia le lotoā+ e faataamilo ai ma tautau le ʻie pupuni+ o le faitotoʻa o le lotoā.
9 E te ave le suāuu e faauu ai+ ma faauu le faleʻie paia ma mea uma ua iai,+ e te faapaia le faleʻie paia ma ana mea uma e faaaogā ai, ina ia avea o se mea paia.
10 Ia e faauu le fata faitaulaga e fai ai taulaga mū ma ana mea uma e faaaogā ai, ma faapaia le fata faitaulaga ina ia avea ma fata faitaulaga e sili ona paia.+
11 E te faauu foʻi le faatanoa ma lona tulaga ma faapaia ai.
12 “Ona e aumaia lea o Arona ma ona atalii ia lata ane i le faitotoʻa o le faleʻie o le feiloaʻiga, ma e ao ona latou tāʻeele ai i le vai.+
13 E te faaofuina Arona i ofu paia+ ma faauu iā te ia,+ ma faapaia iā te ia, ina ia auauna mai o ia o se ositaulaga iā te aʻu.
14 Mulimuli ane, e te aumaia ona atalii ma e te faaofuina i latou i ofu talaloa.+
15 E te faauuina i latou e pei ona e faauu ai i lo latou tamā,+ ina ia latou auauna mai ai o ni ositaulaga iā te aʻu, ma e aogā pea lo latou faauuina o ni ositaulaga i o latou tupulaga o loo mulimuli mai.”+
16 Ona faia lea e Mose e tusa ma mea uma lava na poloaʻi mai ai Ieova iā te ia.+ Ua faapea lava ona ia faia.
17 I le masina muamua, o le tausaga lona lua, i le aso muamua o le masina, ua faatūina ai le faleʻie paia.+
18 Ina ua faia e Mose le faleʻie paia, ua ia tuu i lalo o lagolago,+ ua faatulaga auivi laupapa,+ ua sulu ai pou faalava+ ma faatutū poutū.
19 Ona ia fofola lea o le ufiufi+ i luga o le faleʻie paia ma fofola ai foʻi le ufiufi+ mulimuli o le faleʻie i luga aʻe o le isi ufiufi, e pei ona poloaʻi mai ai Ieova iā Mose.
20 Mulimuli ane, ua ia ave le Molimau*+ ma teu i totonu o le Atolaau,+ ma sulu amo+ o le Atolaau ma tuu le ufiufi+ i luga o le Atolaau.+
21 Ona ia avatu lea o le Atolaau i totonu o le faleʻie paia ma tautau le ʻie puipui+ e vaelua ai ma taofia ai le ō atu i le atolaau o le feagaiga,*+ e pei ona poloaʻi mai ai Ieova iā Mose.
22 Ona ia tuu ai lea o le laulau+ i totonu o le faleʻie o le feiloaʻiga, i le itu i mātū o le faleʻie paia, i fafo o le ʻie puipui,
23 ma ua ia faatulaga faaputuga o falaoa+ i luga o le laulau i luma o Ieova, e pei ona poloaʻi mai ai Ieova iā Mose.
24 Ua ia tuu le tuugāmolī+ i totonu o le faleʻie o le feiloaʻiga, i luma o le laulau, i le itu i saute o le faleʻie paia.
25 Ua ia tutu molī+ i luma o Ieova, e pei ona poloaʻi mai ai Ieova iā Mose.
26 Ona ia tuu lea o le fata faitaulaga+ auro i totonu o le faleʻie o le feiloaʻiga i luma o le ʻie puipui,
27 ina ia faamūina ai mea manogi lelei+ i luga o le fata faitaulaga,+ e pei ona poloaʻi mai ai Ieova iā Mose.
28 Ona ia tautau lea o le ʻie pupuni+ o le faitotoʻa o le faleʻie paia.
29 Ua ia tuu le fata faitaulaga e fai ai taulaga mū+ i luma o le faitotoʻa o le faleʻie paia, o le faleʻie lea o le feiloaʻiga, ina ia faia ai e ia o taulaga mū+ ma taulaga i meaʻai, e pei ona poloaʻi mai ai Ieova iā Mose.
30 Ona ia tuu lea o le faatanoa i le vā o le faleʻie o le feiloaʻiga ma le fata faitaulaga, ma sasaa i ai ni vai mo le fufuluina+ o vae ma lima.
31 Ua fufulu e Mose, Arona ma ona atalii o latou lima ma vae i vai.
32 Ua latou fufulu ai i so o se taimi e latou te ō atu ai i totonu o le faleʻie o le feiloaʻiga, pe faalatalata atu foʻi i le fata faitaulaga,+ e pei ona poloaʻi mai ai Ieova iā Mose.
33 Mulimuli ane, ua ia faia le lotoā+ faataamilo i le faleʻie paia ma le fata faitaulaga, ma tautau le ʻie pupuni o le faitotoʻa o le lotoā.+
Ua faamāeʻaina e Mose le galuega.
34 Ua ufitia le faleʻie o le feiloaʻiga i le ao ma ua tumu le faleʻie paia i le mamalu o Ieova.+
35 Ua lē mafai ona alu Mose i totonu o le faleʻie o le feiloaʻiga, ona ua iai le ao i luga aʻe ma ua tumu le faleʻie paia i le mamalu o Ieova.+
36 Pe a siitia le ao mai i luga o le faleʻie paia, ona tapena lea o faleʻie o le fanauga a Isaraelu, ma faaauau la latou malaga i se isi mea.+
37 Peitaʻi, pe afai e lē siitia le ao, ona lē tapenaina lea o o latou faleʻie ma ō, seʻi vaganā ua oo i le aso ua siitia ai le ao.+
38 Auā ua iai le ao a Ieova i luga o le faleʻie paia i le ao, ae ua iai pea i ona luga le afi i le pō, ma ua vāai i ai aiga uma o Isaraelu, a o faagasolo la latou malaga i lea mea ma lea mea.+
Faamatalaga Pito i Lalo
^ Epe., “atolaau o le Molimau.”
^ Epe., “atolaau o le Molimau.”
^ E faasino atu i papamaa o loo iai Tulafono e Sefulu.
^ Epe., “atolaau o le Molimau.”
