Esoto 5:1-23
5 Mulimuli ane, ua ō atu Mose ma Arona ma faapea atu iā Farao: “O le fetalaiga lenei a Ieova le Atua o Isaraelu, ‘Ia tuu mai loʻu nuu e ō ina ia o latou faamanatu se tausamiga iā te aʻu i le toafa.’”
2 Ae ua faapea mai Farao: “O ai Ieova+ ou te faalogo ai i lona leo ma tuu atu tagata Isaraelu e ō?+ Ou te lē iloa lava Ieova, ma ou te lē tuuina atu foʻi tagata Isaraelu e ō.”+
3 Ae ua la faapea atu: “Na faaali mai le Atua o tagata Eperu iā i maʻua. Faamolemole, matou te fia ō i se malaga e tusa ma le tolu aso i le toafa, ma fai taulaga ai iā Ieova lo matou Atua;+ a leai, e na te taia i matou i se faamaʻi po o le pelu.”
4 Ona tali mai lea o le tupu o Aikupito iā i laʻua: “Mose ma Arona, aiseā ua lua faapogaia ai tagata e tuu a latou galuega? Ia toe fo‘i e fai a outou galuega!”*+
5 Ua toe faapea mai Farao: “Se‘i vaai i le to‘atele o tagata o loo galulue i lenei nuu, ae ua oulua manana‘o e latou te tuua a latou galuega.”
6 I lea lava aso, ua faatonu ai e Farao pule o galuega* ma o latou fesoasoani* e faapea:
7 “Aua neʻi outou toe aoao maia vao mamago ma avatu i tagata e fai ai piliki.+ Ia ō i latou lava e ao mai ni a latou vao mamago.
8 Ia outou faamalosia pea i latou ia faia le aofaʻiga o piliki e pei o le taimi muamua. Ia aua neʻi outou faaitiitia le aofaʻiga mo i latou, auā ua faapalapala i latou. O le mea lea ua latou alalaga mai ai: ‘Ua matou fia ō e fai taulaga i lo matou Atua!’
9 Ia matuā faamamafa galuega a nei tagata, ina ia pisi ai ma aua neʻi latou faalogo atu i tala pepelo.”
10 Ua ō atu pule o galuega+ ma o latou fesoasoani, ma fai atu i le nuu: “O le faatonuga lenei a Farao, ‘Ou te lē toe avatu iā te outou vao mamago.
11 Ia outou ō ma aumai vao mamago mo outou po o fea lava tou te maua ai, ae e lē faaitiitia lava a outou galuega.’”
12 Ona taapeape ai lea o le nuu i le laueleele uma o Aikupito e ao mai vao mamago mai i fanua ua uma ona seleseleina.
13 Ua faatonu pea i latou e pule o galuega e faapea: “Ia ta‘itasi outou ma faamāe‘a a outou galuega o aso ta‘itasi, e pei lava o le taimi na saunia ai vao mamago mo outou.”
14 Ua sasaina+ foʻi e pule o galuega a Farao a latou fesoasoani na tofia mai i le fanauga a Isaraelu. Ua latou fesili atu iā i latou: “Aiseā ua lē atoa ai le aofaʻiga o piliki na masani ona outou faia? O le mea lenā na tupu ananafi ma le asō.”
15 Ua ō atu fesoasoani na tofia mai i le fanauga a Isaraelu ma faitio atu iā Farao e faapea: “Aiseā ua e faia ai faapea au auauna?
16 Ua leai ni vao mamago ua aumaia i au auauna ae ua faatonuina i matou, ‘Ia faia piliki!’ Ua latou sasaina foʻi au auauna, a o ou lava tagata ua sesē.”
17 Ae ua fai mai o ia: “Ua outou faapalapala, ua outou faapalapala lava!+ O le mea lea ua outou faapea mai ai, ‘Ua matou fia ō e fai taulaga iā Ieova.’+
18 O lea, ia ō e galulue! E tusa pe lē avatua vao mamago iā te outou, ae ia outou faia le aofaʻiga lava lea o piliki.”
19 Ona iloa lea e fesoasoani na tofia mai i le fanauga a Isaraelu, ua iai i latou i se tulaga pagatia ona o le faatonuga: “Ia aua neʻi outou faaitiitia le aofaʻiga o piliki e faia i le aso.”
20 A o latou ō ese mai iā Farao, ona latou fetaui lea ma Mose ma Arona, o faatalitali atu iā i latou.
21 Ua latou fai atu iā i laʻua: “Tau ina silasila mai Ieova iā te oulua ma faamasino oulua, talu ai o oulua ua māfua ai ona ʻinoʻino mai Farao ma ana auauna iā i matou, ma ua oulua tuuina le pelu i o latou lima e fasioti ai i matou.”+
22 Ua liliu atu Mose iā Ieova ma faapea atu: “Ieova e, aiseā ua e faapuapuagatia ai lenei nuu? Aiseā foʻi ua e auina mai ai aʻu?
23 Talu mai le taimi na ou alu atu ai i luma o Farao e tautala i lou suafa,+ na atili ai ona ia faia mea leaga i lenei nuu,+ a o lenei ua e lē laveaʻia lava lou nuu.”+
Faamatalaga Pito i Lalo
^ Po o le “e amo a outou avega.”
^ Po o “pule o ē e tutuli faamalosi le nuu e fai galuega.”
^ O i latou na tofia mai i le fanauga a Isaraelu.
