Esoto 9:1-35
9 Ona fetalai mai lea o Ieova iā Mose: “Ia e alu iā Farao ma e fai atu iā te ia, ‘O le mea lenei ua fetalai mai ai Ieova le Atua o tagata Eperu: “Ia tuu mai loʻu nuu e ō ina ia latou auauna mai iā te aʻu.+
2 Peitaʻi, afai e te musu e tuu mai i latou e ō, ma faaauau ona e taofia i latou,
3 faauta! o le a oo mai le aao o Ieova+ i au lafumanu i le fanua. E oo le faamaʻi mataʻutia+ i solofanua, i asini, i kamela, i lafu povi, ma lafu mamoe.
4 E faaesea e Ieova lafumanu a tagata Isaraelu ma lafumanu a tagata Aikupito, ma e lē mate se manu e tasi a le fanauga a Isaraelu.”’”+
5 Ua faatulaga foʻi e Ieova le taimi e faapea: “O a taeao o le a faia ai e Ieova lenei mea i lenei laueleele.”
6 Ona faia lea e Ieova o lenei mea i le aso na sosoo ai, ma ua mamate uma ai manu eseese a Aikupito,+ ae e leai ma se manu e tasi a le fanauga a Isaraelu ua mate.
7 Ua aauina atu e Farao ana auauna e vaai le mea ua tupu, faauta! ua leai ma se manu e tasi a tagata Isaraelu ua mate. E ui i lea, ua faamaaa pea e Farao lona loto, ma ua ia lē tuu mai le nuu e ō.+
8 Ona fetalai mai lea o Ieova iā Mose ma Arona: “Ia faatutumu o oulua lima i lefulefu mai i le ogaumu, ma ia togi faasalalau solo i luga e Mose i luma o Farao.
9 O le a avea le lefulefu ma efuefu ninii i le atunuu atoa o Aikupito, e avea foʻi ma maʻi sua ogaoga i tagata ma manu i le atunuu atoa o Aikupito.”
10 Ua la ave le lefulefu mai i le ogaumu ma tutū i luma o Farao, ona togi lea i luga e Mose o le lefulefu, ma ua avea ai ma maʻi sua ogaoga ua tutupu i tagata ma manu.
11 Ua lē mafai ona tutū ositaulaga o ē e faia faiga faaagaga i luma o Mose ona o maʻi sua, auā ua tutupu maʻi sua i ositaulaga o ē e faia faiga faaagaga, ma tagata uma o Aikupito.+
12 Ae ua tuu pea e Ieova Farao i lona lotomaaa, ua lē faalogo o ia iā i laʻua, e pei ona fetalai mai ai Ieova iā Mose.+
13 Ua fetalai mai Ieova iā Mose: “Ia e usupō i le taeao ma tū i luma o Farao, ma e fai atu iā te ia, ‘O le mea lenei ua fetalai mai ai Ieova le Atua o tagata Eperu: “Ia tuu mai loʻu nuu e ō ina ia latou auauna mai iā te aʻu.
14 Auā o le taimi nei ou te auina atu ai aʻu mala iā te oe, i au auauna, ma ou tagata, ina ia e iloa ai, e leai se tasi e tusa ma aʻu i le lalolagi atoa.+
15 Na mafai ona ou tuu atu loʻu lima e taia ai oe ma ou tagata i se faamaʻi mata‘utia, ma soloiesea* oe mai i lenei lalolagi.
16 Ae o le mea tonu lenei ua ou tuu ai pea oe ia e ola, ina ia ou faaali atu ai iā te oe loʻu mana, ma faailoa atu loʻu igoa i le lalolagi uma.+
17 Po ua e faasausili pea i loʻu nuu i le lē tuuina mai o i latou e ō?
18 O le mea lea, ou te faatotō ifo ai le uatoʻa mamafa tele i le taimi faapenei a taeao, e leʻi tupu muamua se mea faapea i Aikupito, mai lava i le aso na amata ai ona ʻainā seʻia oo mai i le asō.
19 O lea, ia aauina atu nisi o au auauna e aumai au lafu, ma mea uma o iā te oe i le fanua i se mea e malu ai. O se tagata po o se manu e maua i le fanua e leʻi aumaia i le fale, o le a totō ifo uatoʻa iā i latou ma fano ai.”’”
20 O so o se tasi o auauna a Farao ua mataʻu i le fetalaiga a Ieova, ua vave lava ona ia aumaia ana auauna ma ana manu i fale,
21 a o sē ua lē ano i fetalaiga a Ieova, ua tuu pea ana auauna ma ana lafu i le fanua.
22 Ua fetalai mai Ieova iā Mose: “Ia faaloaloa lou lima i le lagi, ina ia totō ifo ai le uato‘a i le atunuu atoa o Aikupito,+ i luga o tagata, o manu, ma laau ʻaina uma o le fanua o le atunuu o Aikupito.”+
23 Ona faaloaloa lea e Mose o lona tootoo i le lagi; ma ua aumaia ai e Ieova o faititili ma le uatoʻa, ua oo mai foʻi le afi* i le lalolagi, ma ua faaauau ona faatotō ifo e Ieova le uatoʻa i le atunuu o Aikupito.
24 Ua iai le uatoʻa, ma le afi ua fefiloi ma le uatoʻa. Ua mamafa tele, ma e leʻi tupu muamua se mea faapea i le atunuu atoa o Aikupito, talu mai le taimi na faavaeina ai lea atunuu.+
25 Ua taia e le uatoʻa mea uma i le fanua i le atunuu atoa o Aikupito, e mai i tagata e oo lava i manu, ma ua faatamaʻia ai laau ʻaina uma, ma laau eseese uma o le fanua.+
26 E na o le laueleele o Kosena lea e iai le fanauga a Isaraelu, e leʻi totō ifo i ai le uatoʻa.+
27 Ua aami e Farao o Mose ma Arona ma faapea atu iā i laʻua: “Ua ou agasala i lenei taimi. E amiotonu Ieova, ae o aʻu ma oʻu tagata, ua matou sesē.
28 Ia ʻaiʻoi atu iā Ieova ia faauma le faititili ma le uatoʻa. Ona ou malie lea e tuu atu outou e ō, ma e tou te lē toe nonofo lava.”
29 Ua fai mai Mose iā te ia: “O le taimi lava ou te alu ese ai i fafo mai i le aai, ou te faaloaloa atu oʻu lima iā Ieova. Ona taofia loa lea o faititili ma e lē toe totō ifo le uatoʻa, ina ia e iloa ai o Ieova e ona le lalolagi.+
30 A o oe ma au auauna, ua ou iloa e tou te lē matataʻu lava iā Ieova le Atua.”
31 Ua faaleagaina foʻi laau o lino* ma karite, auā ua matutua karite ma ua fuga mai laau o lino.
32 A o saito ma kaseme,* e leʻi faaleagaina auā e masani ona tuai ona matutua.
33 Ua alu ese Mose i fafo mai i le aai mai iā Farao, ua faaloaloa ona lima iā Ieova, ona uma ai lea o faititili ma le uatoʻa, ma ua lē toe totō ifo le timu i le lalolagi.+
34 Ua iloa e Farao ua uma le timu, o le uatoʻa ma faititili, ona ia toe agasala lea i le faamaaaina o lona loto,+ o ia atoa ma ana auauna.
35 Ua faaauau ona maaa le loto o Farao, ma ua ia lē tuu mai le fanauga a Isaraelu e ō, e pei ona fetalai mai ai o Ieova e ala iā Mose.+
Faamatalaga Pito i Lalo
^ Po o le “ma fano ai.”
^ Atonu e faasino atu i le emo o uila malolosi.
^ O le “lino” o se laau na totō i Aikupito e fai mai ai ofu lino.
^ O se ituaiga o saito e lē tāua tele. O le upu Peretania, o le spelt.
