Faamasino 1:1-36
1 Ua mavae le oti o Iosua,+ ona fesili ai lea o le fanauga a Isaraelu* iā Ieova:+ “O ai o i matou e alu aʻe muamua e tau ma tagata Kanana?”
2 Ona tali mai lea o Ieova: “E alu aʻe Iuta.+ Faauta! Ou te tuuina atu le laueleele i lona lima.”
3 Ona fai atu lea o Iuta iā Simeona lona uso: “Seʻi o ta ō aʻe i le laueleele ua tofia mai iā te a‘u*+ ma ta siitaua i tagata Kanana, ona ta ō atu foʻi lea i le laueleele ua tofia atu iā te oe.” Ona alu ai lea o Simeona faatasi ma ia.
4 Ina ua alu aʻe Iuta, ona tuuina atu lea e Ieova o tagata Kanana ma tagata Perisē i o latou lima,+ ma ua latou faatoʻilaloina tane e to‘a 10,000 i Piseka.
5 Ua latou maua Atoni-piseka i Piseka, ona latou tau ai lea ma ia ma faatoʻilaloina tagata Kanana+ ma tagata Perisē.+
6 Ua sola ese Atoni-piseka, ae ua latou tuliloa o ia ma puʻe iā te ia, ona latou tipiesea lea o ona limamatua ma ona vaematua.
7 Ona faapea ane lea o Atoni-piseka: “E toʻa 70 tupu na tatipi ese o latou limamatua ma o latou vaematua, na samusamu i lalo o laʻu laulauʻai. E pei o le mea na ou faia, ua faapea ona toe taui mai e le Atua iā te aʻu.” Mulimuli ane, ona latou ave lea o ia i Ierusalema,+ ma ua oti ai i inā.
8 E lē gata i lea, ua siitaua atu tane o Iuta iā Ierusalema+ ma faatoʻilalo i ai, ua latou fasia i le pelu ma susunuina le aai i le afi.
9 Mulimuli ane, ona ō ifo lea o tane o Iuta e siitaua i tagata Kanana o loo nonofo i vaega maugā, ma laufanua o Nekepi* ma Sefila.*+
10 Ona ō atu lea o tane o Iuta e tau ma tagata Kanana o loo nonofo i Heperona (o le igoa muamua o Heperona o Kiriata-arapa), ua latou ō atu ma fasi iā Sesai, Aimano, ma Talemai.+
11 Ua latou ō atu mai i inā ma faasagatau i ē o loo nonofo i Tiperi.+ (O le igoa muamua o Tiperi o Kiriata-sapera.)+
12 Ona faapea atu lea o Kalepo:+ “O le tagata e na te fasia ma faatoʻilaloina Kiriata-sapera, ou te avatu i ai loʻu afafine o Akesa e fai ma ana avā.”+
13 Ona faatoʻilaloina lea o le aai e Otinielu+ le atalii o Kinasa+ le uso laʻitiiti o Kalepo. Ona ia avatu lea o Akesa lona afafine e fai ma ana avā.
14 A o alu Akesa i le fale, ua ia faatauanau iā Otinielu e talosaga atu mo se fanua mai i lona tamā. Ona oso ese lea o Akesa mai i le asini.* Ua fesili atu Kalepo iā te ia: “O le ā se mea e te manaʻo ai?”
15 Ua faapea mai Akesa iā te ia: “Faamolemole ia tuuina mai iā te aʻu se faamanuiaga, auā ua e tuuina mai iā te aʻu se fasi fanua i le itu i saute,* ia e tuuina mai fo‘i iā te aʻu o Kulo-maima.”* Ona tuuina atu lea e Kalepo iā te ia o Kulo i luga ma Kulo i lalo.
16 Ona ō aʻe lea o ē na tupuga mai i le tamā o le avā a Mose+ le tagata Keni,+ mai i le aai o laau pama+ faatasi ma le fanauga a Iuta i le toafa* o Iuta lea e i le itu i saute o Arata.+ Ua latou ō atu ma nonofo faatasi ma le nuu.+
17 Ae na alu atu Iuta faatasi ma Simeona lona uso, ma osofa‘ia tagata Kanana na nonofo i Seifata ma faaumatia ai.+ Ona latou faaigoa ai lea o lea aai o Horema.*+
18 Mulimuli ane, ua faatoʻilaloina e Iuta o Kasa+ ma ona laueleele, o Asekelona+ ma ona laueleele, ma Ekerona+ ma ona laueleele.
19 Sa faatasi Ieova ma Iuta, ma na fai mo i latou vaega maugā, ae e leʻi mafai ona latou tutuliesea tagata na nonofo i fanua laugatasi, auā e iai a latou kariota o le taua e iai uʻamea maamaʻai.*+
20 Ua latou avatu iā Kalepo o Heperona, e pei ona folafola atu e Mose,+ ona ia tuliesea lea mai i inā o atalii e toʻatolu o Anaki.+
21 Peita‘i, e leʻi tutuliesea e le fanauga a Peniamina tagata Iepusē na nonofo i Ierusalema, o lea na nonofo pea tagata Iepusē faatasi ma le fanauga a Peniamina i Ierusalema e oo mai i aso nei.+
22 Ua ō aʻe le fanauga a Iosefa+ e siitaua atu i Peteli, ma na faatasi Ieova ma i latou.+
23 Ona ō atu faalilolilo lea o le fanauga a Iosefa e mataʻi Peteli (o le igoa muamua o lea aai o Lusa),+
24 ma ua latou iloa atu ai se tamāloa o sau mai i le aai. Ona latou faapea atu lea iā te ia: “Faamolemole, seʻi e faasino mai iā i matou le ala i le aai, ona matou agalelei* atu lea iā te oe.”
25 Ua faasino atu e le tamāloa iā i latou le ala i le aai, ona latou osofaʻia lea o le aai i le pelu, ae tuu atu le tamāloa ma lona aiga uma e ō.+
26 Ua alu atu le tamāloa i le nuu o tagata Hetī ma fausia ai se aai ma faaigoa o Lusa. O le igoa lea o le aai e oo mai i aso nei.
27 E leʻi maua e le fanauga a Manase o Pete-seana ma ona tamaʻi aai, o Tanaka+ ma ona tamaʻi aai, o ē na nonofo i Toro ma ona tamaʻi aai, o ē na nonofo i Ipelamo ma ona tamaʻi aai, o ē na nonofo i Mekito ma ona tamaʻi aai,+ ae ua maumauaʻi tagata Kanana e nonofo pea i lea laueleele.
28 Ina ua matuā malolosi le fanauga a Isaraelu, ona latou faamalosia lea o tagata Kanana e faia galuega mamafa,+ ae e latou te leʻi matuā tutuliesea i latou.+
29 E leʻi tutuliesea fo‘i e le fanauga a Efaraima tagata Kanana o ē na nonofo i Kasera. Na nonofo pea tagata Kanana faatasi ma i latou i Kasera.+
30 E leʻi tutuliesea e le fanauga a Sepulona ē na nonofo i Kiterona ma ē na nonofo i Naalolo.+ Na nonofo pea tagata Kanana faatasi ma i latou, ma faamalosia i latou e fai galuega mamafa.+
31 E leʻi tutuliesea e le fanauga a Asera tagata na nonofo i Ako, o ē na nonofo i Saitonu,+ o Ailava, o Akasepa,+ o Helipa, o Afika+ ma Reopa.+
32 Na nonofo pea le fanauga a Asera faatasi ma tagata Kanana o ē na nonofo i le nuu, auā latou te leʻi tutuliesea i latou.
33 E leʻi tutuliesea e le fanauga a Nafatali o ē na nonofo i Pete-semesa ma ē na nonofo i Pete-anata,+ ae na latou nonofo pea ma tagata Kanana o ē na nonofo i le nuu.+ Na faia e ē na nonofo i Pete-semesa ma Pete-anata a latou galuega mamafa.
34 Na taofia e tagata Amorī le fanauga a Tanu ia nonofo i vaega maugā, auā e latou te leʻi faatagaina i latou e ō ifo i le fanua laugatasi.+
35 Na maumauaʻi tagata Amorī e nonofo i le mauga o Heresa, i Ailona,+ ma Salapima.+ Ae ina ua malolosi* tele lima o le fanauga a Iosefa, ona faamalosia ai lea o tagata Amorī e fai galuega mamafa.
36 O le laueleele o tagata Amorī sa amata mai i le aʻega o Akarava,+ e mai i Sela e agaʻi i luga.
Faamatalaga Pito i Lalo
^ Epe., “o atalii o Isaraelu.”
^ Epe., “i lo‘u tofi.”
^ Po o “le itu i saute.”
^ Po o “le fanua maulalo.”
^ Pe atonu “Ona pati lea o ona lima a o tiʻetiʻe i le asini.”
^ Po o “i Nekepi.”
^ Lona uiga “Faatanoa o Vai.”
^ Tagaʻi i le Uiga o Upu.
^ Lona uiga “O le Mea ua Faaumatia.”
^ Epe., “kariota uʻamea o le taua.”
^ Epe., “faaalia atu lea iā te oe le alofa faamaoni.”
^ Epe., “mamafa.”
