Faamasino 10:1-18
10 Ua mavae Apimeleko, ona tulaʻi mai lea o Tulaga le atalii o Pua, le atalii o Toto o le tagata o Isakara e faaola iā Isaraelu.+ Sa nofo o ia i Samira i le vaega maugā o Efaraima.
2 Na ia faamasino iā Isaraelu i tausaga e 23, ona oti ai lea o ia ma ua tanu i Samira.
3 Ua mavae o ia, ona tulaʻi mai lea o Iairo le tagata Kiliata, ua ia faamasino iā Isaraelu i tausaga e 22.
4 E toʻa 30 ona atalii o ē na tiʻetiʻe i asini e 30, ma e 30 foʻi aai na iā i latou. Ua faaigoa nei aai o Havota-iairo+ e oo mai i aso nei; o loo iai i le nuu o Kiliata.
5 Mulimuli ane, ua oti Iairo ma ua tanu i Kamoni.
6 Ua toe faia e le fanauga a Isaraelu mea e leaga i le silafaga a Ieova,+ ua latou auauna iā Paala,+ o tupua o Asaira, o atua o Arama,* o atua o Saitonu, o atua o Moapi,+ o atua o tagata Amonī,+ ma atua o tagata Filisitia.+ Ua latou tuulafoa‘ia Ieova, ua lē auauna atu foʻi iā te ia.
7 Ona matuā toʻasā ai lea o Ieova iā Isaraelu, ma ia faatauina atu i latou i lima o Filisitia ma tagata Amonī.+
8 O lea, ua latou faatigā ma matuā faasauā ai i le fanauga a Isaraelu i lenā tausaga, e 18 tausaga na latou faasauā ai i le fanauga uma a Isaraelu, o ē sa i le itu o Ioritana i le laueleele o tagata Amorī i Kiliata.
9 Ua sopoʻia foʻi e tagata Amonī Ioritana ina ia latou tau ma Iuta ma Peniamina, ma le aiga o Efaraima; ua matuā mafatia lava Isaraelu.
10 Ona alalaga atu lea o le fanauga a Isaraelu iā Ieova mo se fesoasoani,+ ua faapea atu: “Ua matou agasala iā te oe, auā ua matou tuulafoa‘ia lo matou Atua, ae auauna iā Paala.”+
11 Ae ua fetalai mai Ieova i le fanauga a Isaraelu: “Po ou te le‘i faaolaina ea outou mai i Aikupito,+ o tagata Amorī,+ o tagata Amonī, o tagata Filisitia,+
12 o tagata Saitonu, o Amaleka, ma Mitiana, ina ua latou faasauā iā te outou? Ina ua outou alalaga mai iā te aʻu, na ou faaolaina outou mai i o latou lima.
13 Ae ua outou tuulafoaʻiina aʻu ma auauna atu i isi atua.+ O le mea lea, ou te lē toe faaolaina ai outou.+
14 Inā ō atu ia i atua na outou filifilia, ma alalaga atu ai mo se fesoasoani.+ Ia latou faaolaina outou i taimi o lo outou puapuaga.”+
15 Ae ua faapea atu le fanauga a Isaraelu iā Ieova: “Ua matou agasala. Ia e faia iā i matou o mea uma ua e finagalo i ai. Ae faamolemole, tau ina ia e laveaʻi iā i matou i le asō.”
16 Ona latou aveesea lea o atua ese mai iā i latou ma auauna iā Ieova,+ ma ua lē mafai ona ia silasila mai pea* i puapuaga o Isaraelu.+
17 Ua faapotopoto faatasi tagata Amonī+ ma tolauapi i Kiliata. Ua faapotopoto faatasi foʻi le fanauga a Isaraelu ma tolauapi i Mesepa.
18 Ona faapea ane lea o tagata ma perenise o Kiliata o le tasi i le isi: “O ai e na te taʻitaʻia le taua faasaga i tagata Amonī?+ Ia avea o ia ma ta‘ita‘i o ē uma o loo nonofo i Kiliata.”
