Faamasino 17:1-13
-
Tupua a Mika ma lana ositaulaga (1-13)
17 Sa iai i le vaega maugā o Efaraima+ se tagata e igoa iā Mika.
2 Sa ia fai atu i lona tinā: “Pe e te manatua tupe siliva e 1,100 ia na aveesea mai iā te oe, ma na e fetuuina lē na avea a o o‘u faalogo i ai? O loo iā te aʻu tupe siliva. O aʻu na avea.” Ona fai mai lea o lona tinā: “Ia faamanuia Ieova iā te oe laʻu tama.”
3 Ona ia faafoʻi lea o tupe siliva e 1,100 i lona tinā, ae na faapea mai lona tinā: “Ou te faapaiaina tupe siliva iā Ieova mai i loʻu lima mo laʻu tama, ina ia fai ai se faatusa ua tā ma se tupua uʻamea.+ O lenei, ou te toe avatu iā te oe.”
4 Ina ua uma ona ia toe faafoʻi o tupe siliva i lona tinā, ona ave lea e lona tinā o tupe siliva e 200 ma avatu i le tagata e faia mea siliva. Ua ia faia ai se faatusa ua tā ma se tupua uʻamea; ma sa tuu i le fale o Mika.
5 Na iai iā Mika se fale o atua, ma ua ia faia se efota+ ma tupua o terafimi,*+ ma tofia* se tasi o ona atalii ina ia auauna o se ositaulaga mo ia.+
6 Sa leai se tupu i Isaraelu i na aso.+ Sa taʻitasi i latou ma fai le mea ua tonu i lana vaai.*+
7 O lea, sa iai se tauleʻaleʻa mai i Peteleema+ i Iuta o le aiga o Iuta. O ia foʻi o se sa Levī+ sa nofo i inā mo sina taimi.
8 Na tuua e le tauleʻaleʻa le aai o Peteleema i Iuta ina ia suʻe se mea e nofo ai. A o alu atu o ia, ua taunuu i le vaega maugā o Efaraima i le fale o Mika.+
9 Ona fai atu lea o Mika iā te ia: “O fea e te sau ai?” Ae ua ia fai mai iā te ia: “O aʻu o le sa Levī mai i Peteleema i Iuta, ma ou te alu e suʻe se mea ou te nofo ai.”
10 Ona fai atu lea o Mika iā te ia: “Sau ta nonofo ma fai oe ma tamā* ma ositaulaga mo aʻu. Ou te avatu iā te oe o tupe siliva e sefulu i le tausaga ma ofu mo ositaulaga, ma au meaʻai.” Ona alu atu ai lea o le sa Levī.
11 Ua lotomalie le sa Levī e nonofo ma Mika, ma na avea foʻi le tauleʻaleʻa e pei o se tasi o ona atalii.
12 E lē gata i lea, na tofia e Mika* le sa Levī ina ia auauna o se ositaulaga mo ia,+ ma na nofo o ia i le fale o Mika.
13 Ona faapea ane lea o Mika: “Ua ou iloa nei ua faamanuia aʻu e Ieova, auā ua avea le sa Levī ma ositaulaga mo aʻu.”
Faamatalaga Pito i Lalo
^ Po o “atua o aiga; faatagata.”
^ Epe., “ma faatumu le lima o.”
^ Po o le “tonu i lona manatu.”
^ Po o le “ma faufautua.”
^ Po o le “na faatumu e Mika le lima o.”
