Faamasino 2:1-23
2 Ona alu aʻe lea o le agelu a Ieova+ mai i Kilikala+ i Pokima ma faapea atu: “Na ou aveesea outou mai i Aikupito ma avatu i le laueleele na ou tautō ai i o outou augātamā.+ Na ou faapea atu fo‘i, ‘Ou te lē solia lava laʻu feagaiga ma outou.+
2 A o outou, aua tou te osia se feagaiga ma ē o nonofo i lenei nuu.+ Ae ia outou talepe i lalo o latou fata faitaulaga.’+ Ae ua outou lē usiusita‘i i loʻu leo.+ Aiseā ua outou faia ai lenei mea?
3 O lea na ou toe faapea atu ai, ‘Ou te lē tutuliesea i latou mai i o outou luma,+ ma e latou te maileia outou,+ ma faasesēina outou e tapua‘i i o latou atua.’”+
4 Ina ua fai atu e le agelu a Ieova nei upu i tagata uma o Isaraelu, ona fetagisi leotetele ai lea o le nuu.
5 O lea ua latou faaigoa ai lenā nofoaga o Pokima,* ma latou faia ai i inā le taulaga iā Ieova.
6 Ina ua aauina ese atu e Iosua le nuu, ona ō lea o le fanauga a Isaraelu e taʻitasi i o latou tofi, e fai mo i latou le laueleele.+
7 Sa auauna pea le nuu iā Ieova i aso uma o Iosua, ma aso uma o toeaina o ē na iai pea ina ua mavae Iosua, o ē na vāai i galuega tetele uma na faia e Ieova mo Isaraelu.+
8 Ona maliu ai lea o Iosua le atalii o Nuno le auauna a Ieova, i le 110 o ona tausaga.+
9 Ua latou tanu o ia i le laueleele o lona tofi i Timenata-heresa,+ i le vaega maugā o Efaraima, i le itu i mātū o le mauga o Kaasa.+
10 Ona maliliu lea o lenā tupulaga uma* ae tulaʻi mai le isi tupulaga ina ua mavae atu i latou, o ē e latou te leʻi iloa Ieova po o galuega na ia faia mo Isaraelu.
11 Ua faia e le fanauga a Isaraelu mea leaga i le silafaga a Ieova, ma ua latou auauna* iā Paala.+
12 Ona latou lafoaʻi lea o Ieova le Atua o o latou tamā o lē na aumaia i latou mai i le nuu o Aikupito,+ ma mulimuli atu i isi atua, o atua o tagata na siʻomiaina i latou,+ ua latou ifo foʻi i ai, ma latou faatigā ai iā Ieova.+
13 Ua latou lafoaʻi iā Ieova ae auauna iā Paala ma tupua o Asaira.+
14 Ona matuā toʻasā ai lea o Ieova iā Isaraelu, ma ua ia tuuina atu i latou i lima o ē e faomea, ina ia faoa a latou mea.+ Ua ia faatauina atu i latou i lima o o latou fili o loo siʻomia ai i latou,+ ma ua lē mafai foʻi ona latou tetee atu i o latou fili.+
15 O mea uma na latou ō atu i ai, ua teena ai i latou e le aao o Ieova ma oo i ai mala,+ e pei ona fetalai mai ai Ieova, e pei foʻi ona tautō ai Ieova iā i latou;+ ua latou matuā puapuagatia+ foʻi.
16 Ona tofia lea e Ieova o faamasino, o ē na faaolaina i latou mai i lima o ē na faoa a latou mea.+
17 Peita‘i, e oo lava i faamasino e latou te leʻi faalogo i ai, ae ua latou tapua‘i i isi atua* ma ifo i ai. Ua vave ona latou liliuese mai i le ala na savavali ai o latou augātamā, o ē na usiusitaʻi i poloaʻiga a Ieova.+ E latou te leʻi faia faapena.
18 Na faatasi Ieova i faamasino ta‘itasi ina ua tofia e Ieova o faamasino e taʻitaʻia i latou,+ na ia faaolaina i latou mai i lima o o latou fili i aso uma o faamasino ta‘itasi; auā ua alofa mutimutivale*+ Ieova i lo latou ōi ona o ē e faasauā,+ ma ē na faatigā iā i latou.
19 Ae pe a oti se faamasino, ona latou toe faia lea o mea e sili atu ona leaga nai lo o o latou tamā, i lo latou mulimuli atu i isi atua, ua auauna ma ifo iā i latou.+ E latou te leʻi lafoa‘ia a latou amioga leaga ma lo latou faauamaaa.
20 O le i‘uga, na matuā toʻasā Ieova iā Isaraelu,+ ma ua fetalai mai: “Ona ua solia e lenei nuu o laʻu feagaiga+ na ou poloaʻi ai i o latou augātamā ma ua lē usiusita‘i iā te a‘u,+
21 o le mea lea, ou te lē tulia ai mai i o latou luma o se nuu e tasi o nuu e le‘i faato‘ilaloina e Iosua ina ua maliu o ia,+
22 ina ia tofotofo ai pe e tausia e Isaraelu ala o Ieova+ i lo latou savavali ai, e pei ona faia e o latou tamā.”
23 O le mea lea na tuu ai pea e Ieova o nei nuu, e leʻi vave tutuliesea i latou, e na te leʻi tuuina atu foʻi i latou i lima o Iosua.
Faamatalaga Pito i Lalo
^ Lona uiga “Ē e Fetagisi.”
^ Po o “Ona faatasia lea o lenā tupulaga uma i o latou augātamā.” O se faaupuga faafatusolo lea mo le oti.
^ Po o le “tapua‘i.”
^ Po o le “latou faia faiga faatalitane ma isi atua.”
^ Po o le “faanoanoa.”
