Faamasino 21:1-25
-
Faasaoina le ituaiga o Peniamina (1-25)
21 Ua tautō tagata o Isaraelu i Mesepa+ e faapea: “Aua neʻi iai se tasi o i tatou e avatu sona afafine e fai ma avā a se tagata Peniamina.”+
2 Ua ō ane le nuu i Peteli+ ma nonofo ai i inā i luma o le Atua moni seʻia oo i le afiafipō, ua latou fetagisi leotetele foʻi.
3 Ua latou faapea atu: “Ieova e, le Atua o Isaraelu, aiseā ua tupu ai lenei mea i Isaraelu? Aiseā ua mou atu ai le tasi ituaiga o Isaraelu i le asō?”
4 Ua fealapō tagata i le aso na sosoo ai ma fai le fata faitaulaga i inā, ma ofo atu ai taulaga mū ma taulaga faifaatasi.+
5 Ona faapea atu lea o le fanauga a Isaraelu: “O ai mai i ituaiga uma o Isaraelu e leʻi alu aʻe e faapotopoto i luma o Ieova?” Auā na latou faia se tautoga tele, o so o se tasi e leʻi alu aʻe i luma o Ieova i Mesepa, e fasiotia lava o ia.
6 Ona faanoanoa ai lea o le fanauga a Isaraelu ona o le mea na tupu iā Peniamina lo latou uso. Ua latou faapea ane: “Ua tafiesea i le asō le tasi ituaiga o Isaraelu.
7 O le ā se mea tatou te faia ina ia maua ai ni avā a i latou ua totoe, auā ua uma ona tatou tautō iā Ieova,+ e lē avatua se tasi o o tatou afafine e fai ma a latou avā?”+
8 Ua latou fesili atu: “O ai mai i ituaiga o Isaraelu e leʻi alu aʻe i luma o Ieova i Mesepa?”+ E leʻi sau se tasi mai i Iapese-kiliata i le togālauapi, i le mea na iai le faapotopotoga.
9 Auā ina ua faitauina le nuu, na latou iloa ai e leai se tagata mai i ē e nonofo i Iapese-kiliata na iai i inā.
10 Ona aauina atu lea e le faapotopotoga i inā o tagata e sili ona totoa e toʻa 12,000. Ua latou poloaʻi atu iā i latou: “Inā ō ia, ma outou fasiotia tagata o loo nonofo i Iapese-kiliata i le pelu, e oo lava i fafine ma tamaiti.+
11 O le mea lenei e ao ona outou faia: O tane uma, ma fafine uma na momoe ma se tane, e tatau ona outou fasiotia.”
12 Ua latou maua i ē na nonofo i Iapese-kiliata, o teine taupou e toʻa 400, o ē e leʻi momoe lava ma se tane. Ona latou aumaia lea o i latou i le togālauapi i Sailo,+ i le nuu o Kanana.
13 Ona aauina atu lea e le faapotopotoga uma o se fe‘au i le fanauga a Peniamina sa i le papa o Rimoni,+ ma faapea atu iā i latou ia filemu.
14 Ua toe foʻi ane Peniamina i lenā taimi. Ona latou avatu lea iā i latou o fafine na faasaoina mai i fafine o Iapese-kiliata,+ ae e leʻi tofu i latou uma ma le fafine.
15 Ua faanoanoa le nuu ona o le mea na tupu iā Peniamina,+ auā ua faaesea e Ieova o ia mai i isi ituaiga o Isaraelu.
16 Ona faapea ane lea o toeaina o le faapotopotoga: “O le ā se mea tatou te faia ina ia maua ai ni avā a tane ua totoe, auā ua faaumatia fafine uma o Peniamina?”
17 Ua latou tali ane: “Ia iai se tofi mo i latou ua faasaoina o Peniamina, ina ia lē tafiesea ai se ituaiga mai iā Isaraelu.
18 A o i tatou, e faasā ona avatu o tatou afafine e fai ma a latou avā, auā ua tautō le fanauga a Isaraelu e faapea: ‘Ia malaia lē e na te avatu se avā iā Peniamina.’”+
19 Ona latou faapea atu lea: “Faauta! E iai se tausamiga a Ieova e faia i lea tausaga ma lea tausaga i Sailo,+ lea e i le itu i mātū o Peteli, ma i le itu i sasa‘e o le ala tele e alu a‘e mai i Peteli e oo atu i Sekema, ma i le itu i saute o Lepona.”
20 Ua latou poloaʻi atu i tagata Peniamina: “Inā ō ia ma ia outou lalafi e faatalitali i togāvine.
21 Afai e tou te vāai ua ō atu fafine talavou* o Sailo e sisiva faataamilo, ia ta‘itasi outou ma ō atu mai i togāvine ma ave se avā mai i fafine talavou o Sailo, ona outou toe fo‘i lea i le nuu o Peniamina.
22 Ae afai e ō mai o latou tamā po o latou tuagane e tagi mai iā i matou, ona matou fai atu lea iā i latou, ‘Ia outou alolofa mai iā i matou ona o i latou, auā e le‘i mafai ona matou avatua ni avā mo i latou i le taua,+ ma e le‘i mafai foʻi ona outou avatua ni avā mo i latou, ina neʻi nofosala ai outou.’”+
23 Ona faia lea faapea e tagata Peniamina, ua ta‘itasi i latou ma ave se avā mai i fafine na sisiva. Ona latou toe foʻi lea i lo latou tofi, ua toe fausia o latou aai+ ma nonofo ai.
24 Ona taape lea o le fanauga a Isaraelu mai i inā i lenā taimi, e taʻitasi i lona ituaiga ma lona aiga; ua latou ō ese mai i inā, e taʻitasi i lona lava tofi.
25 Sa leai se tupu i Isaraelu i na aso.+ Sa ta‘itasi i latou ma fai le mea ua tonu i lana vaai.*
