Faamasino 4:1-24
4 Ina ua oti Euta, ona toe faia foʻi lea e le fanauga a Isaraelu o mea e leaga i le silafaga a Ieova.+
2 O lea, na faatauina atu ai i latou e Ieova i lima o Iapino le tupu o Kanana,+ o lē na pule i Hasora. O le taʻitaʻi o lana ʻautau o Sesera, o lē na nofo i Haroseta+ o nuu ese.*
3 Ona alalaga atu lea o le fanauga a Isaraelu iā Ieova,+ auā ua iai iā Iapino le 900 o kariota o le taua e iai uʻamea maamaʻai,*+ na ia matuā faasauā foʻi i le fanauga a Isaraelu+ mo tausaga e 20.
4 O le taimi lenā o loo avea ai le perofeta fafine+ o Tepora le avā a Lapitota, ma faamasino iā Isaraelu.
5 Na masani ona nofo o ia i lalo o le laau o le pama a Tepora, i le vā o Rama+ ma Peteli+ i le vaega maugā o Efaraima; ma na ō aʻe le fanauga a Isaraelu iā te ia ina ia faamasinoina.
6 Na ia aami Parako+ le atalii o Apinoamo mai i Ketesa-nafatali,+ ma faapea atu iā te ia: “Pe e leʻi poloaʻi mai ea Ieova le Atua o Isaraelu? ‘Inā alu atu ia i le mauga o Tapora, faatasi ma tane e toʻa 10,000 mai i le fanauga a Nafatali ma le fanauga a Sepulona.
7 Ou te avatu iā te oe i le ālia o Kisona+ o Sesera le taʻitaʻi o le ʻautau a Iapino, o ana kariota o le taua ma ana ‘autau, ma ou te tuuina atu o ia i lou lima.’”+
8 Ona faapea mai lea o Parako iā te ia: “Afai e ta te ō, ona ou alu lea; ae afai e ta te lē ō, ou te lē alu foʻi.”
9 Ua faapea atu o ia: “Ta te ō lava. Ae e lē viia oe i le osofa‘iga o le a e faia, auā e tuuina atu e Ieova Sesera i le lima o se fafine.”+ Ona tulaʻi ai lea o Tepora ma ō faatasi ma Parako i Ketesa.+
10 Ona faapotopoto ai lea e Parako o tagata o Sepulona ma Nafatali+ i Ketesa, ma na mulimuli atu iā te ia tane e toʻa 10,000. Na alu aʻe foʻi Tepora faatasi ma ia.
11 O le taimi lea, ua vavaeese ai Kaveru le tagata Keni mai i le ituaiga o Keni,+ o ē na tupuga mai iā Opapo, o le tamā o le avā a Mose,+ ma faatūina lona faleʻie e latalata i le laau telē i Saanaima lea e i Ketesa.
12 Ua latou taʻu atu iā Sesera e faapea, ua alu aʻe Parako le atalii o Apinoamo i le mauga o Tapora.+
13 Ona faapotopoto loa lea e Sesera o le 900 o ana kariota uma o le taua e iai uʻamea maamaʻai,* ma ‘autau uma o loo faatasi ma ia, mai i Haroseta o nuu ese i le ālia o Kisona.+
14 Ona fai atu lea o Tepora iā Parako: “Inā tū ia i luga, auā o le asō e tuuina atu ai lava e Ieova o Sesera i lou lima. Pe e lē o Ieova ea o loo muamua atu i ou luma?” Ona alu ifo ai lea o Parako mai i le mauga o Tapora, faatasi ma tane e toʻa 10,000 o loo mulimuli atu iā te ia.
15 Ua faafenumia‘i+ e Ieova o Sesera ma ana kariota uma o le taua ma ʻautau uma i luma o le pelu a Parako. Ona alu ese lea o Sesera mai i le kariota ma sola.
16 Ae ua tuliloa e Parako o kariota o le taua ma ʻautau uma e oo atu i Haroseta o nuu ese. Ua fasiotia ai ʻautau uma a Sesera i le pelu, ma e leai se tasi na totoe.+
17 Ae ua sola Sesera i le faleʻie o Iaeli+ le avā a Kaveru+ le tagata Keni, auā na lelei le vā o Iapino+ le tupu o Hasora ma le aiga o Kaveru.
18 Ona sau ai lea i fafo o Iaeli e faafetaiaʻi iā Sesera ma faapea atu iā te ia: “Afe mai ia i inei, loʻu alii, afe mai. Aua e te fefe.” Ona ia afe ane lea i lona faleʻie, ma ua ia ufiufi iā te ia i se palanikeke.
19 Ona fai mai lea o Sesera iā te ia: “Faamolemole, seʻi aumai lava sina vai seʻi oʻu inu ai, ua ou fia inu lava.” Ona tatala lea e Iaeli o le fagupa‘u o loo iai le susu ma avatu iā te ia e inu ai,+ ua uma lea, ona ia toe ufiufi lea iā te ia.
20 Ua faapea mai Sesera iā te ia: “Inā tū ia i le faitoto‘a o le faleʻie, ma pe afai e sau se tasi ma fesili mai iā te oe, ‘Po o iai se tagata i inei?’ ia e fai atu i ai, ‘E leai!’”
21 Peita‘i, ua ave e Iaeli le avā a Kaveru se pine o le faleʻie ma le samala i lona lima. Ona ia alu atu lemū lea iā Sesera ma tutu‘i le pine i ona manifinifi* ma ua ati ai i le eleele, a o moegase o ia ua lē lavā. Ona oti ai lea o ia.+
22 O loo tuliloa mai e Parako Sesera, ona alu atu lea o Iaeli i fafo ma faafetaiaʻi iā te ia ma fai atu i ai: “Sau, seʻi oʻu faasino atu iā te oe le tagata o loo e saʻilia.” Ua alu atu o ia i totonu, ma vaaia ua oti Sesera, o loo tū ai le pine i ona manifinifi.
23 O lea, ua faatoʻilaloina ai e le Atua o Iapino le tupu o Kanana i luma o le fanauga a Isaraelu+ i lenā aso.
24 Ua mamafa pea lava le lima o le fanauga a Isaraelu iā Iapino le tupu o Kanana,+ seʻia oo ina latou faaumatia Iapino le tupu o Kanana.+
Faamatalaga Pito i Lalo
^ Po o “Haroseta-hakoima.”
^ Epe., “kariota uʻamea o le taua.”
^ Epe., “kariota uʻamea o le taua.”
^ E faasino atu i le vaega o le ulu i le vā o le taliga ma le muāulu.
