Faamasino 7:1-25
7 Ona usupō lea o Ierupaala, o Kitiona+ lava lea, ma tagata uma sa faatasi ma ia, ua tolauapi i le vaipuna o Harota; a o ʻautau a Mitiana, o loo i lona itu i mātū i le aʻega o Morē, i le fanua laugatasi.*
2 Ua fetalai mai Ieova iā Kitiona: “Ua toʻatele naʻuā tagata o iā te oe, ou te lē tuuina atu ai Mitiana i o latou lima,+ ina neʻi mitamita Isaraelu i oʻu luma ma faapea mai, ‘O loʻu lava lima na ou faaola ai iā te aʻu.’+
3 O lenei, seʻi e valaau atu faamolemole a o faalogo mai tagata ma faapea atu, ‘O so o se tasi e fefe ma mataʻu, inā toe foʻi ia i lona aiga.’”+ Ona tofotofoina lea o i latou e Kitiona. O lea, e to‘a 22,000 tagata na toe foʻi i o latou aiga, ae toʻa 10,000 na totoe.
4 Peita‘i ua fetalai mai Ieova iā Kitiona: “O loo toʻatele pea tagata. Ia ave ifo i latou i le vai ina ia ou tofotofo ai i latou i inā mo oe. Pe a ou fai atu, ‘O ia lenei e lua te ō,’ ona oulua ō ai lea ma ia, ae pe a ou fai atu, ‘E lua te lē ō,’ ona lē alu ai lea o ia.”
5 Ua ia ave ifo tagata i lalo i le vai.
Ona fetalai mai lea o Ieova iā Kitiona: “Ia tuu ese o ē uma e inu etoeto le vai e pei o se taʻifau, mai i ē e punonou ma feinu.”
6 E toʻa 300 le aofaʻi o tane na inu etoeto i o latou lima. Ae o isi tagata uma, na latou punonou e feinu.
7 Ona fetalai mai lea o Ieova iā Kitiona: “O tagata e toʻa 300 na inu etoeto, ou te faaolaina ai outou, ou te tuuina atu ai foʻi Mitiana i lou lima.+ A o isi tagata uma, ia tuu atu i latou e toe fo‘i i aiga.”
8 Ua latou aveese meaʻai ma pū mai i tagata, ma ua tuuina atu tane uma o Isaraelu e ō i o latou aiga; ae ua ia taofi i tane e toʻa 300. Sa i lalo ifo i le fanua laugatasi le ʻautau a Mitiana.+
9 O le pō lava lenā na fetalai mai ai Ieova iā te ia: “Inā tulaʻi ia, ma osofa‘i le togālauapi, auā ua ou tuuina atu i latou i lou lima.+
10 Ae afai e te fefe e osofa‘i, ia lua ō ifo ma Fora lau auauna i le togālauapi.
11 Ia e faalogo i mea o loo latou talanoa ai, ona e maua ai lea o le lototele* e osofa‘i le togālauapi.” Ona la ō ifo lea ma Fora lana auauna e latalata i le togālauapi a le ‘autau.
12 Ua ufitia le fanua laugatasi e Mitiana, o Amaleka, ma tagata uma mai i Sasaʻe,+ ua toʻatele e pei o sē akerise; o a latou kamela foʻi e lē mafaitaulia,+ ua tele e pei o le oneone o le matafaga.
13 E oo atu Kitiona o loo faamatala e se tagata i lana uō se miti e faapea: “O laʻu miti lenei na fai. Na iai se falaoa karite lapotopoto o loo taavale atu i le togālauapi o Mitiana. Ona alu atu lea ma taia ai se faleʻie, ua paʻū ai i lalo.+ Ua mafuli ai le faleʻie ma ua taatia i lalo.”
14 Ona faapea mai lea o lana uō: “E mautinoa o le pelu lenā a Kitiona+ le atalii o Ioasa, le tagata Isaraelu. Ua tuuina atu e le Atua Mitiana ma le ʻautau atoa i lona lima.”+
15 Ina ua faalogo Kitiona i le miti ma lona uiga,+ ona ia ifo lea ma tapuaʻi i le Atua. Ua ia toe foʻi i le togālauapi a Isaraelu ma faapea atu: “Inā tutula‘i ia, auā ua tuuina mai e Ieova le ʻautau a Mitiana i o outou lima.”
16 Ona ia vaevaeina lea o tane e toʻa 300 i vaega e tolu, ma avatu iā i latou uma o pū,+ ma fagu tetele e lē o iai ni vai, ma o loo iai foʻi sulu i totonu o fagu.
17 Ua faapea atu o ia iā i latou: “Ia outou vaavaai mai ma faia mea e pei lava ona ou faia. Pe a ou latalata i le togālauapi, ia outou faia e pei lava ona ou faia.
18 Pe a matou ilia pū, o aʻu ma i latou uma o iā te aʻu, ia outou ilia foʻi pū ina ia soo atoa ai le togālauapi, ma ia outou alalaga atu, ‘Mo Ieova ma Kitiona!’”
19 Ona ō mai ai lea o Kitiona ma tagata e toʻa 100 o iā te ia, ua latalata i le togālauapi i le amataga o le leoleoga i le vaeluapō.* O lea faatoʻā uma lava ona sui le leoleoga. Ona latou ilia ai lea o pū+ ma taʻei faguvai tetele na i o latou lima.+
20 Ona ilia lea e vaega e tolu o a latou pū ma taʻei fagu tetele. Ua uu sulu i o latou lima tauagavale, ae ili pū i o latou lima taumatau, ma ua latou alalaga atu: “O le pelu a Ieova ma Kitiona!”
21 Ua taʻitasi le tagata ma tū i lona tulaga e siʻomia ai le togālauapi, ona taufetuli ai lea o le ‘autau atoa ma fe‘ei a o sosola ese.+
22 Ae ua ili pea e le toʻa 300 a latou pū, ona faaoo atu ai lea e Ieova o le pelu a le tasi i le isi o le ʻautau uma;+ ae ua sosola pea ʻautau ua oo atu lava i Peteseta, e oo atu i Sererata, ma oo atu ai i tuaoi o Apele-meola+ i Tapata.
23 Ona faapotopoto faatasi ai lea o tane o Isaraelu mai i Nafatali, o Asera, ma Manase uma,+ ma ua latou tuliloaina Mitiana.
24 Ua aauina atu e Kitiona o avefeʻau i vaega maugā uma o Efaraima, ua faapea atu: “Inā ō ifo ia e osofa‘ia Mitiana, ma maua mea e sopo‘ia ai vai e oo atu i Petepara ma Ioritana.” Ona faapotopoto faatasi ai lea o tane uma o Efaraima, ua latou ō atu ma maua mea e sopo‘ia ai vai e oo atu i Petepara ma Ioritana.
25 Ua latou puʻea perenise e toʻalua o Mitiana, o Oreva ma Seeva; ua latou fasiotia foʻi Oreva i luga o le papa o Oreva,+ ae fasiotia Seeva i le mea e soli ai vine o Seeva. Ua latou tuliloa pea iā Mitiana+ ma latou aumaia ulu o Oreva ma Seeva iā Kitiona i le itu o Ioritana.
Faamatalaga Pito i Lalo
^ E faasino atu i le fanua laugatasi i le pito i lalo o se vanu.
^ Epe., “ona malolosi ai lea o ou lima.”
^ E amata pe ā o le 10 i le pō e oo i le 2 i le vaveao.
