Faataoto 11:1-31
11 E inosia e Ieova le fua faatautau lē faamaoni,*Ae e fiafia o ia i le fua e saʻo lelei.*+
2 Pe a oo mai le faamaualuga, ona mulimuli mai ai lea o le faalumaina,+Ae e iai le atamai i ē e faamaulalo.+
3 O le faamaoni o ē e amio saʻo e taʻitaʻia ai i latou,+A o le faaʻoleʻole o ē e lē faamaoni e fano ai i latou.+
4 E lē aogā le tamaoaiga* i le aso o le toʻasā,+Ae o le amiotonu o le a laveaʻiina ai mai i le oti.+
5 O le amiotonu a le tagata e lē ponā, e faasaʻoina ai lona ala,Ae e paʻū le tagata amioleaga ona o lana lava amioleaga.+
6 O le amiotonu o ē e amio saʻo, o le a laveaʻiina ai i latou,+Ae o le manaʻo o ē e faa‘ole‘ole, o le a maua ai lava i latou.+
7 Pe a oti le tagata amioleaga, ua mou atu lona faamoemoe;E mou atu foʻi lona faatuatuaga i lona lava malosi.+
8 E laveaʻiina lava le tagata amiotonu mai i puapuaga,Ae e suitulaga i ai lē e amioleaga.+
9 O le gutu o lē ua fulitua i le upu moni* e faaleagaina ai lona tuaoi,A o le poto e faasaoina ai ē e amiotonu.+
10 E olioli le aai ona o le lelei o ē e amiotonu,Ma pe a faaumatia tagata amioleaga, o le a alalaga fiafia.+
11 E faaeaina le aai ona o le faamanuiaga o tagata amio saʻo,+Ae e lepetia le aai ona o gutu o ē e amioleaga.+
12 O lē ua leai se mafaufau,* ua ʻinoʻino o ia i lona tuaoi,A o le tagata e iai moni le faautaga loloto, e filemu pea o ia.+
13 O lē e taufaaleaga, e fealualuaʻi solo o ia ma taʻu atu mataupu faalilolilo,+A o le tagata e maufaatuatuaina,* e na te lē faailoa atu ni tala faalilolilo.*
14 Pe a leai se taʻitaʻiga atamai, e mafatia tagata,Ae pe a toʻatele ē e faufautua, e taulau manuia ai.*+
15 O sē e na te faamaonia le aitalafu a se tagata ese, e leaga lava lona i‘uga,+A o lē e ‘alofia le* lūlū lima i se maliega, e saogalemu o ia.
16 O le fafine tauagafau e na te maua le mamalu,+A o tane sauā, e latou te faoa ‘oa.
17 O le tamāloa agalelei,* ua agalelei o ia iā te ia lava,+A o le tagata sauā, ua ia faaoo faafitauli iā te ia lava.*+
18 O le tagata amioleaga ua ia maua le totogi pepelo,+A o lē e lūlū le amiotonu, ua ia maua le taui moni.+
19 O lē e tūmausalī mo le amiotonu e iʻu i le ola,+A o lē e tuliloaina le mea leaga e iʻu i le oti.
20 E inosia e Ieova i latou e faapiʻopiʻo o latou loto,+Ae e fiafia o ia i ē e lē ponā o latou ala.+
21 Ia e mautinoa i lenei mea:* E lē sao se tagata leaga mai i le faasalaga,+Ae o le a sao le fanau a ē e amiotonu.
22 E pei o le mama auro i le isu o le puaa,E faapena foʻi le fafine e lalelei ae ua lē faaaogā lelei lona mafaufau.
23 O le naunautaʻiga o tagata amiotonu, e i‘u i le lelei,+A o le faamoemoe o tagata amioleaga, e i‘u i le toʻasā.
24 E iai le tagata e foa‘i atu le tele o mea,* ae e faateleina pea ana mea;+E iai foʻi le isi tagata e taofi mea ua tatau ona avatuina, ae e iʻu o ia i le mativa.+
25 E manuia* le tagata limafoaʻi,+Ma o lē e na te faafouina* isi, e faafouina o ia.+
26 O lē e taofia saito, e fetuuina o ia e le nuu,Ae e latou te faamanuiaina lē e na te faatauina atu.
27 O lē e matuā saʻili e fai le mea lelei, e na te saʻilia le alofa,+A o lē e saʻili mo mea leaga, e oo lava ia mea iā te ia.+
28 O lē ua faatuatua i ana ʻoa, o le a paʻū o ia,+A o ē e amiotonu, o le a lauusiusi e pei o lau o laau.+
29 O lē e faaoo faafitauli i* lona aiga, e fai le matagi ma ona tofi,+Ma e fai le tagata valea ma auauna a le tagata ua atamai lona loto.
30 O le fua o le tagata amiotonu o le laau lea o le ola,+Ma o lē e na te mauaina tagata, e atamai o ia.+
31 Afai e moni e tauia le tagata amiotonu i le lalolagi,E sili atu la ona tauia le tagata amioleaga ma le tagata agasala!+
Faamatalaga Pito i Lalo
^ Po o le “i le maa e fua ai mea e atoa.”
^ Po o le “faaaimamago.”
^ Po o “ʻoa.”
^ Po o “lē e amioleaga.”
^ Po o le “ua leai se uunaʻiga lelei o le loto.”
^ Epe., “o lē e faamaoni i le agaga.”
^ Epe., “tanumaʻi le mataupu.”
^ Po o le “e iai le faaolataga.”
^ Epe., “e ʻinoʻino i le.”
^ Po o “O le tamāloa e alofa faamaoni.”
^ Po o le “ua ia faalumaina o ia lava.”
^ Epe., “Tago le lima i le isi lima.”
^ Epe., “faasalalau atu ana mea.”
^ Epe., “puta.”
^ Epe., “matuā faasūsūina.”
^ Po o “O lē e faalumaina.”
