Failauga 12:1-14
12 Ia e manatua o Lē e Sili na Foafoaina oe i aso o lou talavou,+ a o leʻi oo mai aso e tigā* ai+ ma oo mai tausaga e te faapea ifo ai: “E leai soʻu fiafia i ai”;
2 a o leʻi faapouliuligia+ le lā ma le malamalama, ma le masina ma fetu, ma toe fo‘i mai ao pe a mavae* timuga mamafa;
3 i le aso e gatete ai o ē e leoleoina fale, ma faanoʻunoʻu ai tane malolosi, ma ua lē toe olo e fafine fatu auā ua to‘aitiiti i latou, ma ua faapouliuligia le vaai a fafine o loo vāai atu i faamalama;+
4 pe a tapunia faitotoʻa i le ala, pe a itiiti le leo o le mea e olo ai fatu, pe a tulaʻi se tasi i le tagi a le manulele, ma ua vaivai fo‘i teine pepese uma.+
5 Ua fefe foʻi le tasi i mea maualuluga, ma ua iai mea e matataʻu ai i le ala. Ua fuga mai le laau o le sekati,+ ma ua faatosotosololoa le savali a le sē, ua lē toe manogi se meaʻai* auā ua savali atu le tagata i lona fale e nofo mau ai,+ ma ua savavali solo i le ala o ē e faavauvau;+
6 a o leʻi motusia le maea siliva, ma e leʻi nutililiia le ipu faaofuofu auro, ma ta‘e le sioki i le vaipuna, ma nutililiia foʻi le uili o le vaieli.
7 Ona toe foʻi atu lea o le efuefu i le eleele+ e pei ona iai muamua, ma e toe foʻi atu le agaga* i le Atua moni o lē na foa‘iina mai.+
8 Ua faapea mai le failauga:+ “E matuā i‘uvale!* E i‘uvale mea uma lava.”+
9 E lē gata ina tele le atamai o le failauga, ae na ia aʻoaʻoina pea tagata i mea na ia iloa,+ ma na ia manatunatu ma faia ni saʻiliʻiliga auʻiliʻili, ina ia tuufaatasia* ai le tele o faataoto.+
10 Na saʻili le failauga ina ia maua upu e logoleleia+ ma tusiaina upu saʻo o le upu moni.
11 O upu a ē e atamamai ua pei o tui e tui ai povi,+ ma o a latou faamatalaga ua aoaoina ua pei o fao ua faamauina lelei; ua tuuina mai e le leoleo mamoe e toʻatasi.
12 Loʻu atalii e, e ese mai i nei mea, ia e utagia lenei lapataʻiga: E leai se iʻuga o le tusiaina o le tele o tusi, ma o le tele o le taimi e alu ai e vaivai ai le tino.+
13 O le faaiʻuga lenei o mea uma ua faalogo i ai: Ia mataʻu i le Atua moni+ ma tausi i ana poloaʻiga,+ auā o le matafaioi lea a tagata.+
14 Auā o le a faamasino e le Atua moni gaoioiga uma, e aofia ai ma mea uma ua natia, ina ia iloa ai pe lelei pe leaga.+
Faamatalaga Pito i Lalo
^ Po o le “malaia.”
^ Pe atonu “faatasi ma.”
^ E faasino atu le faaupuga Eperu i se ituaiga o vivao e faaoso ai le fia ʻai.
^ Po o le “malosi o le ola.”
^ Po o le “faatauvaa.”
^ Po o le “faatulagaina.”
