Failauga 2:1-26
2 Ona ou faapea ifo lea i loʻu loto: “Inā sau ia, seʻi oʻu tofo i mea e faafiafia ai* ma vaai po o ā mea lelei e maua mai ai.” Ae faauta! e i‘uvale foʻi lea mea.
2 Ua ou fai atu e faatatau i le ʻata, “Ua valea lea!”
Ma mea e faafiafia ai,* “O le ā le aogā o ia mea?”
3 Na ou manatunatu ifo i loʻu loto e ala i le faamalieina o aʻu i le uaina,+ a o taʻitaʻiina pea aʻu i lo‘u lava atamai; na ou tuliloaina fo‘i le valea ina ia iloa ai po o ā mea e sili ona lelei e faia e tagata, i nai aso e latou te ola ai i lalo o le lagi.
4 Sa ou faia galuega tetele.+ Sa ou fausia fale mo aʻu;+ sa ou totōina togāvine mo aʻu.+
5 Sa ou faia mo aʻu togālaau ma fanua e totō ai laau, sa ou totō ai foʻi laau ʻaina eseese uma.
6 Sa ou faia mo aʻu faatanoa vai, ina ia faasūsūina ai le vaomatua e faatupuina ai laau.
7 Sa iā te aʻu auauna tane ma auauna teine,+ sa iā te a‘u fo‘i auauna na fananau i loʻu aiga.* Sa iā te aʻu foʻi le anoanoaʻi o lafumanu, o povi ma mamoe,+ e sili atu i so o se tasi na muamua iā te aʻu i Ierusalema.
8 Sa ou faaputuina siliva ma auro mo aʻu,+ o oloa a tupu ma itumalo.+ Sa ou faapotopotoina tama pepese ma teine pepese mo a‘u, atoa fo‘i ma mea e matuā faafiafiaina ai atalii o tagata, o se fafine lea, ioe, o fafine e to‘atele.*
9 O lea, ua sili aʻu ma ua atili ona faateleina aʻu mea i lo o se tasi na muamua atu iā te aʻu i Ierusalema.+ Ua tumau fo‘i loʻu atamai iā te aʻu.
10 Ou te le‘i teena so o se mea na ou manaʻo i ai.*+ Ou te leʻi taofia loʻu loto mai i so o se mea e faafiafiaina ai,* auā na olioli loʻu loto ona o aʻu galuega mamafa uma, ma o loʻu taui* lea mo aʻu galuega mamafa uma.+
11 Ae ina ua ou manatunatu i galuega uma na faia e oʻu lima, ma galuega mamafa uma na ou tigāina e faatino,+ na ou iloa ai e i‘uvale mea uma, ma o le ʻai a le matagi;+ e leai se mea e aogā moni i lalo o le lā.+
12 Ona ou liliu atu lea i le atamai ma le valea ma amioga faavalevalea.+ (Auā o le ā le mea e mafai ona fai e se tagata e mulimuli mai i le tupu? E na o mea ua uma ona faia.)
13 Ua ou iloa ai e sili ona aogā le atamai nai lo o amioga faavalevalea,+ e pei ona sili ona aogā o le malamalama i le pogisa.
14 O lē e atamai e na te iloa lelei lona ala;*+ a o lē e valea e savali i le pogisa.+ Ua oo fo‘i ina ou iloa e tasi le iʻuga e oo iā i laʻua uma.+
15 Ona ou faapea ifo lea i loʻu loto: “O le mea e oo i le tagata valea e oo foʻi iā te aʻu.”+ O le ā la se aogā iā te a‘u o le matuā tele o lo‘u atamai? Ona ou faapea ifo lea i loʻu loto: “E i‘uvale foʻi lea mea.”
16 Auā e lē manatuaina pea le tagata atamai po o le tagata valea.+ Auā i aso o i luma o le a galo i latou uma. Ma e faapefea ona oti le tagata atamai? E pei lava o le tagata valea.+
17 Sa ou ʻinoʻino i le olaga,+ auā o mea uma sa faia i lalo o le lā na faapopoleina ai a‘u, auā o mea uma e i‘uvale,+ ma o le ʻai a le matagi.+
18 Sa ou ʻinoʻino i aʻu galuega mamafa uma ia sa ou tigāina ai i lalo o le lā,+ auā e tatau ona ou tuua mo le tagata e sosoo mai iā te aʻu pe a mavae atu aʻu.+
19 O ai sē e na te iloa po o ia o se tagata atamai po o se tagata valea?+ Ae o le a pule o ia i mea uma na ou galue mamafa ai, ma o mea ia na ou faia i loʻu atamai i lalo o le lā. E i‘uvale fo‘i lea mea.
20 O lea na amata ai ona faanoanoa loʻu loto i galuega mamafa uma na ou tigāina ai i lalo o le lā.
21 Auā e mafai ona galue mamafa se tagata e ta‘ita‘ia i le atamai, ma le poto ma le tomai, ae e tatau ona ia tuuina atu lona tofi i se tagata e leʻi galue mamafa ai.+ E i‘uvale fo‘i lea mea ma o se mea e leaga tele.
22 O le ā le mea ua maua e le tagata mai i ana galuega mamafa uma, ma lona sogasogā lea ua uuna‘ia ai o ia* e galue mamafa i lalo o le lā?+
23 Auā o ona aso uma, ua oo iā te ia le tigā ma le atuatuvale+ ona o lana galuega, ua lē mapu foʻi lona loto e oo lava i le pō.+ E i‘uvale fo‘i lea mea.
24 E leai se mea e sili i le tagata nai lo o le ʻai ma inu, ma maua le fiafia i ana galuega mamafa.+ Ua ou iloa fo‘i, o lea mea e mai i le aao o le Atua moni,+
25 auā o ai se tasi e sili ona lelei ana meaʻai ma ana meainu nai lo o aʻu?+
26 E na te avatu i le tagata e faafiafiaina o ia le atamai, o le poto ma le olioli,+ ae ua ia tuuina atu i le tagata agasala le galuega o le aoaoina ma faaputu, ina ia avatu i lē e faafiafiaina le Atua moni.+ E i‘uvale fo‘i lea mea ma o le ‘ai a le matagi.
Faamatalaga Pito i Lalo
^ Po o le “i le olioli.”
^ Po o “le olioli.”
^ Epe., “atalii o le fale.”
^ Po o “o se tamaʻitaʻi, ioe, o tamaʻitaʻi.”
^ Epe., “na manaʻo i ai oʻu mata.”
^ Po o le “olioli ai.”
^ Po o le “tofi.”
^ Epe., “ua i lona ulu ona mata.”
^ Epe., “ma le tauivi o lona loto.”
